Ri Daniel 6 - Quiché Bible

Ri Daniel cäya' cuc' ri coj

¹ Ri ajawinel Dariy xuchomaj qui cojic jun sient ruc' juwinak (120) k'atal tak tzij puwi' ri rajawibal rech quetakan puwi'.

² Xebucoj c'u oxib solinelab paquiwi' wa', che quilic rech utz qui banic ri chac cäquiban ri k'atal tak tzij, rech man c'o ta c'ax curik ri ajawinel. Jun chque we solinelab ri' are ri Daniel,

³ ri chanim xilitajic chi man junam ta cuc' ri niq'uiaj solinelab chic xukuje' cuc' ri c'amal tak be paquiwi' tak ri tinimit rumal ri nimalaj u no'j ri c'olic; rumal ri' ri ajawinel xuchomaj u cojic che takanel rech are' cak'atow tzij puwi' ri nim tinimit.

⁴ Ri solinelab xukuje' ri k'atal tak tzij xquitzucuj u rikic jun mac pa ri u c'aslemal che u tzujuxic chuwäch ri ajawinel chi man utz ta ri k'atan tzij ri cätajin cuban pa ri ajawibal, man xquirik ta c'u jun tzujubal rech ri Daniel rumal rech chi ronojel ri cubano sibalaj tz'akat u banic cubano, man c'u xecuin ta che u banic jun rekle'n ri Daniel chuwäch ri ajawinel.

⁵ Xquitakej c'u u chomaxic jas cäquibano rech cäkaj pa qui k'ab, xquibij c'ut: “Man cäkarik ta na jun mac ri cäkatzujubej ta rech ri Daniel, we man jun jasach re ri u cojonic.”

⁶ Je c'u ri', ri solinelab xukuje' ri k'atal tak tzij xquijunamaj qui tzij xebe che rilic ri Dariy, aretak c'u e c'o chi chuwäch xquibij che: “Chc'asal la, amak'el,

⁷ conojel ri k'atal tak tzij ri quetakan puwi' ri nim tinimit xquiban jun mulin ib, ri xquichomaj wi u ya'ic jun takanic chi cäya' la chi juwinak lajuj (30) k'ij, man c'o ta jun winak cutz'onoj ta jun jasach che jun dios mawi che jun winak, xane' xuwi che la. Jachin c'u ri man cäniman taj cäq'uiak na chupam ri c'olbal ri e c'o wi ri coj.

⁸ Rumal c'u ri', chya' tzij la che u tz'akatisaxic u banic we takanic ri', chtz'ibaj ri bi' la chuxe' rech man cuya'taj cäjalc'atixic, je cäcanajic jacha' ri qui pixab ri aj medib xukuje' ri aj persib, ri man cuya' taj chi ma ta cäbanic jas ri cubij.”

⁹ Xuya' c'u u tzij ri ajawinel Dariy che wa', xutz'ibaj ri u bi' chuxe' ri takanic.

¹⁰ Aretak c'ut xretamaj ri Daniel chi ri Dariy xuya' u tzij che u banic we takanic ri', xbe cho rachoch, xebujak ri e u wenta'n ri u warabal, ri benak u wäch pa Jerusalen, xxuqui che u banic ch'awem ruc' Dios, xk'ijilan c'u che ri Dios. Ox mul c'ut cuban wa' ronojel k'ij, jas ri u banom ulok amak'el.

¹¹ Conojel c'ut we achijab ri' xeboc chupam ri rachoch ri Daniel, man c'o ta cunabej xequirika' cätajin cuban ch'awem ruc' Dios, cäk'ijilan c'u che ri Dios.

¹² Xebextax c'u che rilic ri ajawinel chunataxic ri takanic che, xquibij c'u che: “Ri lal, yo'm la jun takanic, ri je cubij wa': ri winak ri pa we juwinak lajuj k'ij ri' cuban jun bochi'nic che apachique dios o apachique winak we ta ma ta che la, cäq'uiak na chupam ri c'olbal ri e c'o wi ri coj, ¿la ma ta kastzij?” Ri ajawinel xutzelej u bixic: “Je' wa. Ri takanic rajawaxic u tz'akatisaxic jas ri cubij ri qui pixab ri aj medib xukuje' ri aj persib, ri man cuya' taj chi ma ta cäbanic jas ri cubij.”

¹³ Xquitakej c'u u bixic che: “Ri Daniel, jun chque ri aj judeyib ri e c'amom ulok waral, mawi jubik' nim ta quil wi la rumal, mawi nim quil wi ri takanic ri yo'm la u bixic chi cäbanic, kilom c'ut chi ox mul ronojel k'ij cuban ch'awem ruc' ri u Dios.”

¹⁴ Ri ajawinel aretak xuta' ri xbix che cumal ri winak, sibalaj xbisonic, xutzucuj jas ta ri xuban che u to'ic ri Daniel. C'ä xkaj na ri k'ij, xuban ronojel ri xcuin che u banic che u to'ic ri Daniel,

¹⁵ xebopan chi c'u jumul ri achijab ruc' ri ajawinel xquibij c'u che: “Ri lal, kas eta'm la ri cubij ri qui pixab ri aj medib xukuje' ri aj persib, man c'o ta jun k'ilonic o jun takanic ri u tz'ibam ri u bi' ri ajawinel chuxe' ri manta catz'akatisax u banic.”

¹⁶ Xtakan c'u ri ajawinel che u c'amic ulok ri Daniel, che u q'uiakic chupam c'olbal ri e c'o wi ri coj. C'ä majok c'u chq'uiak ri Daniel pa qui chi' ri coj, ri ajawinel xubij che ri Daniel: “Are ri a Dios, ri sibalaj jic u patanixic cabano, chatcolowok.”

¹⁷ Aretak c'o chic ri Daniel chupam ri c'olbal ri e c'o wi ri coj, xc'am ulok jun abaj che u tz'apixic u chi' ri qui c'olbal ri coj, ri ajawinel xut'ik ruc' ri u t'ikbal re ajawinel xukuje' cuc' ri qui t'ikbal tak ri e rach k'atal tak tzij, rech xukuje' kas cätz'akatisax ri cubij ri pixab puwi' ri Daniel.

¹⁸ Xtzelej c'u ri ajawinel chupam ri nimalaj rachoch, xek'oyol c'ut, man xwa' taj mawi xuquicotisaj ta rib jas ri cuban amak'el; man xcuin ta c'ut xwar ronojel ri jun ak'ab.

¹⁹ Xuwi xsakaric, aninak xbe pa ri c'olbal ri e c'o wi ri coj.

²⁰ Aretak nakaj chi c'o wi ri ajawinel, ruc' bis xusiq'uij ri Daniel, je xubij wa: “Daniel, pataninel rech ri c'aslic Dios, ¿la xcuin ri a Dios che a to'ic pa qui chi' ri coj?”

²¹ Ri Daniel xutzelej u bixic che: “Chc'asal la amak'el.

²² Ri nu Dios xutak ulok ri u tako'n aj caj ri xtz'apin u pa qui chi' ri coj rech man c'o ta jun c'ax cäquiban chwe, reta'm c'u ri Dios chi man c'o ta nu mac, man c'o ta c'u jun lawaloyil nu banom ta che la.”

²³ Sibalaj c'u xquicot ri ajawinel xuya' c'u takanic chi quesax ulok ri Daniel chupam ri c'olbal ri e c'o wi ri coj. Aretak xesataj ulok, man c'o ta jun socotajic xrik che, rumal rech chi xujiquiba' u c'u'x chrij ri u Dios.

²⁴ Xuya' c'u takanic ri ajawinel che qui c'amic ulok ri achijab ri xetzujun ri Daniel, junam cuc' tak ri quixokil xukuje' tak ri calc'ual xeq'uiak pa ri c'olbal ri e c'o wi ri coj; c'ä majok c'u ne chebopan chquiwäch ri coj aretak xquiq'uiakala' quib che qui t'okopixic.

²⁵ Are c'u ri Dariy xebutz'ibaj tak wuj chque ri winak ri e c'o pa conojel ri nimak tak tinimit xukuje' tak ch'abal ri e c'o cho ri uwächulew, je xubij bic wa' chque: “Quinrayij jamaril chiwe xukuje' rutzil i wäch,

²⁶ quinya' c'u takanic xukuje' quintakanic chi pa ronojel ri wajawibal, nim chil wi xukuje' chyo'k u k'ij ri u Dios ri Daniel. Rumal rech chi are' Dios ri c'aslic, jekel c'u amak'el. Ri rajawinic mawi jubik' casachisax ta u wäch, mawi c'o u q'uisbalil ri u cuinem.

²⁷ Are' ri Colonel xukuje' ri Toronel; ri quebuban tak etal ri e mayibal pa ri caj xukuje' cho ri uwächulew. Are' xcolow ri Daniel pa qui chi' ri coj.”

²⁸ Ri Daniel xutakej ruxic jun achi ri nim u k'ij pa ri rajawibal ri Dariy, xukuje' pa ri rajawibal ri Sir ri ajawinel pa Pers.