Ri Daniel 12 - Quiché Bible

Ri q'uisbal k'ij

¹ “ ‘Pa we jok'otaj ri' cätac'atob na ri Miquel, ri tako'n aj caj to'banel ri sibalaj nim u banic ri to'banel ri cuto' na ri a tinimit. Cux na jun jok'otaj re c'axc'ol, jun jok'otaj ri man c'o ta chi jun ri junam ta ruc' tzä aretak e c'olinak ulok ri nimak tak tinimit. Aretak chupam we jok'otaj ri' quecolotaj na conojel ri winak ri e re ri a tinimit ri tz'ibatal ri qui bi' chupam ri wuj.

² E q'ui chque ri cätajin quewar chupam tak ri mukubal quec'astaj na: jujun quec'asi' na re chbe k'ij sak, jujun chi c'ut che esbal q'uixbal xukuje' che ri xibibal ri e junalic.

³ Ri achijab ri ajno'jab, ri xequic'am qui be q'ui winak pa ri colomalaj be, quejuluw na jacha' ri räxalaj caj; ¡quejuluw na chbe k'ij sak, e junam cuc' tak ri ch'imil!

⁴ Are c'u ri at Daniel, chebawawaj we jastak ri' chi c'uyal, chat'ika' ri wuj c'a copan na ri q'uisbal jok'otaj. E q'uia winak quebe na jeri' quebe na jela', cäquitzucuj u q'uiyirisaxic tak ri quetamanic.’

⁵ In, Daniel, xinwilo chi e c'o chi quieb winak e tac'atoj, jun c'o che ri juperaj u chi' ri nima' ri jun chic che ri juperaj chic.

⁶ Jun c'ut chque xuban we c'otoj chi'aj ri' che ri achi ri u cojom tak sakloloj atz'iak re lino, ri c'o paquiwi' ri ja' re ri nima': ¿Jampa' queq'uis qui tza'm we jastak ri' ri kas man e c'o ta c'o wi?

⁷ Ri achi ri e u cojom tak sakloloj atz'iak re lino xebuyac ri u k'ab chicaj, cätajin cuban ri chi'nic ri kas cäban na pa ri u bi' ri c'aslic Dios, xubij: ‘Pa oxib junab ruc' wakib ic', aretak cätanabax u banic c'ax che ri u cuinem ri u tinimit ri Dios, c'äte ri' cäq'uis na qui tza'm conojel we jastak ri'.’

⁸ Ri in xintatabej ri cubij, man c'o ta c'u jas xinch'obo. Xinc'ot c'u u chi', xinbij che: ‘Ajawaxel, ¿jas ri cäc'ulmataj na aretak cäbantaj ronojel wa?’ xincha' che.

⁹ Ri are' xutzelej u wäch ri nu tzij xubij chwe: ‘Chatakej ri a be, Daniel, e are c'ut we jastak ri' rajawaxic quecanajisax chic'uyal c'ä copan na ri jok'otaj q'uisbalil.

¹⁰ Sibalaj e q'ui ri queboc'ow pa tak ri c'axc'olil ri e yo'm qui bixic, quebel c'u na chquipam e ch'ajch'ojirisam e tz'akatinak. Ri itzel tak winak cäquitakej na qui banic tak etzelal, man cäquich'ob ta c'ut ri cäc'ulmatajic, are c'u ri achijab ri ajno'jab cäquich'ob na ronojel.

¹¹ Jun mil quieb sient jumuch' lajuj (1290) k'ij queboc'ow na tza pa ri jok'otaj aretak cätanabax u cojic ri tabal tok'ob re ronojel k'ij are c'u cäcoj ri tz'ilalaj etzelal awas chupam ri rachoch ri Ajawaxel.

¹² Utz re ri winak ri queye'm ruc' jiquiban c'uxaj c'ä queboc'ow na jun mil oxib sient juwinak olajuj (1335) k'ij.

¹³ Are c'u ri at, Daniel, chatakej ri a be c'ä che ri a q'uistajic, chatuxlan c'ut, chquipam c'ut ri q'uisbal tak k'ij catwalij na che u c'amic ri tojbal awech.’ ”