Ri Daniel 11 - Quiché Bible

¹ “ ‘Xukuje' ri in xinya' chajin anima' che xukuje' xinto' aretak ri Dariy, ri ajawinel pa Med, c'o pa ri nabe junab re ri rajawinic.

² Are c'u ri camic quinya' retamaxic ri kastzij chawe:’ ” “ ‘C'ä quebajawin c'u na oxib ajawinelab pa Pers, aretak c'u e oc'owinak chi wa' jun ucaj ajawinel cäcanaj pa ri takanic ri cux na nimalaj k'inom chquiwäch ri oxib. Aretak c'u cumal quech ri e u k'inomal e u rikom nimalaj cuinem, cuwalijisaj na rib che u ch'äquic ri Ajawibal pa Gres.

Ri ajawinelab ri e c'o pa ri riquiak'ab elebal k'ij xukuje' pa ri u mox elebal k'ij

³ C'äte chi c'u cajawin chi na jun ajawinel ri sibalaj ajch'o'j, ri culic' na ri u takanic paquiwi' tak ri ajawibal are c'u cuban na jachique ri cäraj.

⁴ Aretak c'u jekel chic ri rajawinic cayojyob na, cäban c'u na quiejeb che. Ri u cuinem we ajawinel ri' man cäk'ax ta na pa qui k'ab ri rija'lil, mawi c'u ne c'o ta chi sibalaj nim u chuk'ab we ajawinic ri' jacha' ri nabe canok, cäjachjaxin c'u na e jutak le' chi wi ri quebajawin pa ri u c'olbal.

⁵ Ri ajawinel ri re ri u mox elebal k'ij sibalaj nim ri u cuinem, jun c'ut chque ri rach k'atal tzij are' cäc'oji' na nimalaj u chuk'ab chuwäch ri are', culic' c'u na ri u takanic puwi' ri nimalaj ajawibal.

⁶ Che c'u quieb oxib junab, qui cabichal cuc'ulaj na rib qui wäch: ri ajawinel ri c'o pa u mox elebal k'ij cuya' na ri u mia'l pa c'ulanem che ri ajawinel ri c'o pa riquiak'ab elebal k'ij, rech jic cäc'oji' ri jamaril chquixo'l ri quieb nimak tak tinimit. Man je ta c'u quel na we chomanic ri', ri ralib jacha' xukuje' ri u c'ojol, ri rachajil xukuje' tak ri e u pataninelab quecämisax na.

⁷ Jun c'u aj ralaxic cäch'ojin na cuc' ri ajch'ojab ri aj riquiak'ab elebal k'ij, coc c'u na pa ri rachoch ri ajawinel e are' tak c'ut ri rajch'ojab quetakan na puwi' ri c'ulmatajic.

⁸ Quec'am c'u na bic ri e qui diosib pa Ejipt, ri wächbal ri e c'o cuc', ri e nuc'um tak ch'ich' ri e tzacom pa k'ak' xukuje' niq'uiaj jastak quech chic ri e re k'an puak xukuje' sak puak. Oc'owinak chi c'u quieb oxib junab man ruc' ta ch'o'j ri c'o ta chquixo'l ri quieb nimak tak tinimit,

⁹ ri ajawinel ri c'o pa riquiak'ab elebal k'ij cutzucuj u ch'äquic ri u mox elebal k'ij, man cäticar taj cätzelej c'u na pa rakan.

¹⁰ E are' c'u ri e u c'ojol ri ajawinel ri c'o pa ri riquiak'ab elebal k'ij, quequisuc'umaj na quib che u banic ri ch'o'j, quequicolomaj c'u na ajch'ojab. Jun chque e rachil ri q'uialaj rajch'ojab, coc na che u ch'äquic ri aj mox elebal k'ij; cusachisaj c'u u wäch ronojel jacha' ri cuban jun nima' ri cäpulinic; cutakej c'u ch'äcanic c'ä copan na chunakaj ri rachoch ri ajawinel ri c'o pa u mox elebal k'ij.

¹¹ Ri ch'äcanic ri cäquiban ri ajch'ojab ri quepe pa riquiak'ab elebal k'ij sibalaj cuyac na royowal ri ajawinel ri c'o pa u mox elebal k'ij, quel c'u na bic wa' che u tijic u chuk'ab cuc' ri q'uialaj ajch'ojab ri e c'ulel. Cäch'äcan c'u na paquiwi', chnimalaj conojel.

¹² Ri ch'äcanic ri xuriko xukuje' ri e q'uia tak c'ulel ri xecämic cänojisan na che u banic nimal, are c'u ri u chuk'ab man naj taj cäbeytajic.

¹³ Ri ajawinel ri c'o pa riquiak'ab elebal k'ij cumulij chi c'u jumulaj ajch'ojab, ri c'o na qui q'uial chuwäch ri nabe, chuquieb oxib junab chi c'ut cäbe chi che qui ch'äquic ri e c'o pa u mox elebal k'ij e ruc'am bic q'uialaj ajch'ojab ri cuc'am bic qui ch'ojibal.

¹⁴ Aretak cäc'ulmataj wa', e q'ui ri caquiwalijisaj na quib chrij ri ajawinel ri c'o pa u mox elebal k'ij. Chquixo'l tak wa' e c'o na jujun itzel tak achijab aj israelib, jas ri xc'ut pa ri c'utwächinic, quetzak c'u na.

¹⁵ Ri ajawinel ri c'o pa elebal k'ij cäpe na cuban na jun ak'anibal chrij jun tinimit ri sutim pa tapia, cuch'äc c'u na. Mawi ri cowilaj tak ajch'ojab ri e c'o pa u mox elebal k'ij quecuinic quequik'atij ri ajch'ojab ri e c'ulel.

¹⁶ Ri ch'äcanel cuban na jachique ri cäraj cuc' ri e ch'äctajinak, man c'o ta c'u jachin cäcuin ta che qui k'atexic, cäcanaj c'u na can pa ri Ulew re ri Je'lical, cusachisaj c'u u wäch ronojel ri curik pa ri u be.

¹⁷ Cusuc'umaj c'u na rib che u ch'äquic ronojel ri ulew ri c'o pa ri u mox relebal k'ij; rech c'u cäch'äcanic cuban na jun c'ulwächinic ruc' we ajawinel ri' cuya' c'u na ri u mia'l che, che rixokil, rech cäcuin che u sachisaxic u wäch ri rajawinic, ri u chomam u banic man utz ta c'u quel na.

¹⁸ Cäbe chi c'u na che qui ch'äquic tak ri tinimit ri e c'o pa tak ri tak'aj, e q'ui chque wa' quech'äctaj na rumal; jun c'u qui nimal ajch'ojab cusach na u tza'm we q'uixbal ri', are c'u cuya' na ri ajawinel pa q'uixbal ri petinak pa riquiak'ab elebal k'ij.

¹⁹ Kas chila', cätzelej wi bic ri ajawinel cäbe pa ri cowilaj rachoch ri c'o pa ri rulew; cuc'ulmaj c'u na jun u q'ueyowal ri quesan na ri u c'aslemal, mawi chi c'u jumul quetamax na jas ri xuc'ulmaj.

²⁰ Ri u c'olbal, cac'am na rumal jun ajawinel chic, cutak c'u na jun tok'il cuchuj che u k'inomarisaxic ri rajawibal; xak c'u chuquieb oxib k'ij cäcämisax na, pune' c'u man chupam ta ri ch'o'j.

²¹ Aretak cäminak chic cajawin na jun itzel achi, ri man takal ta che chi coc che ajawinel, ri quebuc'u' ri itzel tak u chomanic, cumajij c'u na ri takanic cumal tak subunic.

²² Kas cuq'uis na tzij paquiwi' tak ri chuk'ab ri cäcaj quech'äcan puwi', xukuje' ne ri xc'amow u be ri c'ulwächinic cucämisaj na.

²³ Xukuje' quebusub na ri qui banom jun c'ulwächinic ruc', pune' c'u xa' e quieb oxib ri winak ri e u c'amom bic, cäch'äcan na.

²⁴ Aretak man c'o ta jun nabeninak coc na pa tak ri ulew ri sibalaj c'o na qui k'inomal ri e c'o pa ri ajawibal cuban c'u na ri man c'o ta jun chque ri e u mam ri je ta xquibano: cujach na ri jastak xukuje' tak ri k'inomal ri e rikom pa ri ch'o'j chquiwäch tak ri e rajch'ojab. Cuchomaj na jas cuban na che qui ch'äquic ri cowilaj tak tinimit ri e kasan pa tapia, pune' c'u ne xa' re quieb oxib k'ij.

²⁵ Cuchajij c'u na anima' rumal ri u cuinem ri c'olic xukuje' ri u chuk'ab, cäch'ojin c'u na ruc' ri ajawinel ri c'o pa ri u mox elebal k'ij ruc' ri qui to'banic ri q'uialaj rajch'ojab che u banic ri ch'o'j. Ri ajawinel ri c'o pa u mox elebal k'ij cäch'ojin na ruc' nimalaj u chuk'ab, coc c'u na pa ri ch'o'j ruc' ri qui to'banic ri q'uialaj rajch'ojab ri sibalaj c'o qui chuk'ab; cäjach na cumal ri quieb qui wäch c'u na, rumal c'u ri' man cäcuin taj cuto' rib pa qui k'ab ri rajch'ojab ri u c'ulel.

²⁶ Kas e are' tak ri querulaj che u tijic qui wa ruc' pa ri kas u mexa, e are quesuc'uman ri u ch'äctajic, quech'äctaj c'u na ri rajch'ojab sibalaj c'u e q'ui ri rach'ojab quecäm na.

²⁷ E are c'u ri quieb ajawinelab ri cäquichomala' xuwi u banic c'ax chquibil tak quib, quet'uyi na pa ri xa' junam mexa quequibila' banoj tak tzij chquixo'l ri jun che ri jun chic, man c'o ta c'u jun quel ta na puwi' ri cuchomaj u banic, rumal rech chi c'ä maja' copan ri u k'ijol.

²⁸ Ri ajawinel ri cäpe pa ri riquiak'ab ri elebal k'ij cätzelej na pa ri rulew cuc'am c'u na bic ronojel ri k'inomal ri u tokim pa ri ch'o'j, cuc'ulelaj c'u na ri tastalic c'ulwächinic; cuban c'u na ri u chomam u banic, c'äte c'u ri' cätzelej na pa ri rulew.

²⁹ Aretak c'u copan ri jok'otaj ri c'utum quebutak chi na bic ri e rajch'ojab che ch'o'j chrij ri u mox elebal k'ij; aretak c'u cuban we ch'o'j ri man cäch'äcan ta na jacha' ri nabe.

³⁰ Ri rajch'ojab quech'äc na cumal ri ajch'ojab ri quepe na pa ri u kajebal k'ij ri e c'amom ulok pa tak jucub, quech'äctaj c'u rumal ri xe'n ib rumal ri' quebanimaj na. Are' c'u ri ajawinel ri aj riquiak'ab ri elebal k'ij cutzokopij na ri royowal puwi' ri tastalicalaj c'ulwächinic, are c'u xebucoj ri xquixutuj can ri c'ulwächinic che u patanixic ri are'.

³¹ Ri e rajch'ojab cäcawasij na ri rachoch Dios xukuje' tak ri cowirisabal, cäquik'il na ri u ya'ic ri tabal tok'ob ri cäya' ronojel k'ij, cäquicoj c'u na chila' jun xibibalalaj awasixic.

³² Ri ajawinel ruc' subunic cutzucuj c'u na qui ch'äquic ri caquixutuj ri c'ulwächinic, are c'u ri tinimit ri culok'ok'ej ri Dios cäcanaj jic cutac'aba' rib chuwäch ri c'axc'ol.

³³ Ri e rajno'jab ri tinimit, e q'uialaj winak xquiya' qui no'j, chanim c'ut quecämisax c'u na, queporox c'u na, queläk'ax c'u na ronojel ri c'o apan cuc', quec'am na bic, quecoj na che lok'om pataninelab pa jule' tak ulew chic. Wa' cabeytaj na jun k'ijol.

³⁴ Aretak copan ri jok'otaj quech ri rikoj tak c'ax cäquirik na jubik' to'banic, pune' c'u e q'ui quek'ax na cuc' xa' che u tok'obisaxic qui wäch.

³⁵ Xukuje' cäban na c'ax chque jujun ri queyo'w tak qui no'j ri winak, rech aretak e c'o pa ri c'ambejebal, quejosk'itajic xukuje' quetz'akatisaxic, c'ä copan na ri jok'otaj q'uisbalil ri c'utum chic.

³⁶ Ri ajawinel ri c'o pa elebal k'ij cuban na ronojel ri cäpe pa u jolom. Sibalaj nim ri nimal ri cäc'amowic chi cuna' na rib chi c'o na u k'ij chquiwäch conojel ri diosib, quebubij c'u na xibibalalaj tak yok'obal che u yok'ic ri kas Dios; ronojel c'ut ri cubano utz quel na chuwäch, c'ä cutak na ulok ri Dios ri c'äjisabal u wäch; rumal rech chi ri cuban c'u na ri Dios, cuban na.

³⁷ We ajawinel ri' man nim ta queril wi ri e qui diosib ri e u mam, mawi ri diosib ri quek'ijilax cumal tak ri ixokib, mawi jun dios chic rumal rech chi cuna' na rib chi c'o na u k'ij chquiwäch conojel wa'.

³⁸ Are c'u cuk'ijilaj na ri dios quech tak ri chuk'ab; cuya' na u k'ij we dios ri' ri man xk'ijilax taj cumal ri e u mam, cuchi'j c'u na k'an puak, sak puak, abaj ri pakal cajil xukuje' niq'uiaj jastak chic ri nimak qui k'ij.

³⁹ Che qui to'ic ri e to'bal tak ib quebucoj na winak ri quequik'ijilaj jun dios ri quech jule' tak winak chic; conojel c'ut ri caquik'ijilaj we ajawinel ri', cunimarisaj na qui k'ij, cuya' na nimak tak quekle'n, quebuya' na culew che u ya'ic rajil q'uexelal chque.

⁴⁰ Aretak copan ri jok'otaj q'uisbalil, ri ajawinel ri c'o pa u mox relebal k'ij cäch'ojin na ruc' ri ajawinel ri c'o pa ri riquiak'ab relebal k'ij; quel c'u na ulok wa' che u c'ulaxic jacha' c'u jun xibibalalaj jasach, cuq'uiak rib chrij ri u mox elebal k'ij, cunojisaj c'u ronojel ri ulew cuc' carwaj re ch'o'j, ajch'ojab ri e c'o qui quiej xukuje' ri q'ui qui jucub.

⁴¹ Xukuje' coc na pa ri Ulew re ri Je'lical quebucämisaj c'u na q'uialaj winak; queto'taj c'u na ri e jekel pa Edom xukuje' ri e c'o pa Moab, q'ui c'u na ri cäto'taj na che ri rulewal ri Amon.

⁴² Ri e rajch'ojab quequich'äc na jule' tak ulew chic, mawi c'u ne cuto' ta can rib ri Ejipt.

⁴³ Quec'am na bic ri k'inomal re k'an puak, re sak puak, xukuje' conojel ri jastak ri pakal cajil ri e c'o pa Ejipt; chanim copan na ri u k'ij ri Libiy xukuje' ri Etiopiy.

⁴⁴ Quebuc'am c'u na tzijol ri e petinak pa elebal k'ij xukuje' u wiquiak'ab elebal k'ij, ri sibalaj cuxibij na rib cumal; ruc' c'u nimalaj oyowal quel na bic, ruc' ri chomanic chi cubana' na jun nimalaj cämisanic,

⁴⁵ quebujekeba' c'u ri kajebal aj ajawinel chuxo'l ri plo ruc' ri tastalic juyub re ri je'lical. Chila' c'ut copan wi na ri k'ijol re ri u cämical, man c'o ta c'u jachin jun cäto'wic.’ ”