Ri Daniel 10 - Quiché Bible

C'utwächinic ri xril ri Daniel chuchi' ri nima' Tigris

¹ Pa ri urox junab re ri rajawinic ri Sir ri aj Pers, ri Daniel ri cäbix Beltsasar che, xril jun kas k'alajisanic ri sibalaj c'ax u ch'obic ri quel cubij. Are c'u ri Daniel xucoj ronojel ri u no'j che u ch'obic, xcuin c'u che u ch'obic ri quel cubij ri k'alajisanic ri xya' che.

² “Pa tak ri k'ij ri', in, ri Daniel, juwinak jun k'ij sibalaj xinbisonic.

³ Man xebentij ta je'lalaj tak wa ja', man xinna' ta u tijic ti'j mawi u wa'l uva, man c'o ta jun c'oc'al xincojo c'ä xeboc'ow na juwinak jun (21) k'ij.

⁴ Pa ri juwinak quiejeb (24) rajilabal ri nabe ic' re ri junab, in c'o chuchi' ri nima' Tigris.

⁵ Xtaki' c'u apan nu wäch, xinwil c'u jun achi e u cojom sakloloj atz'iak re lino xukuje' jun ximibal u pam re utzalaj k'an puak.

⁶ Ri u cuerp carepc'unic jacha' ri topas, ri u palaj carepc'unic jacha' jun caypa', ri e u bak'wäch e jacha' ri k'ak' ri quenicowic, ri e u k'ab xukuje' ri rakan quejulk'inic jacha' ri k'an ch'ich', ri e u ch'abal e je ta ne ri e re q'uialaj winak.

⁷ Xuwi ri in xincuinic xinwil ri c'utwächinic, ri achijab ri e c'o wuc' man c'o ta jas xquilo, xemajtaj c'u rumal ri xe'n ib xebanimaj c'ut xebe qui c'ula' tak quib.

⁸ Xincanaj c'u can nu tuquel, xinwil c'ut we nimalaj c'utwächinic ri'. Sibalaj c'u xinsakmaquic xinna' c'ut chi xbe ri nu chuk'ab.

⁹ Aretak xinto xch'awic, xpe wanima' xintzakic xinliq'ue can cho ri ulew.

¹⁰ Xinuchap c'u jun k'abaj xinuwalijisaj c'ut, c'ä xinuchacaba' na canok paquiwi' ri nu k'ab xukuje' paquiwi' ri nu ch'ec.

¹¹ Xubij c'u chwe: ‘Daniel, ri cälok'ok'ex rumal ri Dios, kas utz u tatabexic chabana' ri quenbij chawe: Chatwalijok,; in takom c'u ulok awuc'.’ Xuwi c'u xq'uistaj qui bixic tak we tzij ri' rumal, ri in quinbirbitic, xintaq'ui'c.

¹² Xubij c'u chwe: ‘Maxe'j awib Daniel, kas c'u pa ri nabe k'ij chi' aretak xatzucuj qui ch'obic ri c'axalaj tak jastak, xpe c'u pa awanima' ri u mach'ic awib chuwäch ri a Dios, ri are' xutatabej ri bochi'nic ri xabano. Rumal ri' in petinak in.

¹³ Ri tako'n aj caj ri cätoban pa ri rajawibal ri Pers xuk'atij nu wäch juwinak jun k'ij; are c'u ri Miquel, jun chque ri tako'n aj caj ri nimak qui k'ij, xpe che nu to'ic, are c'u ri in in canajinak can nu tuquel chquinakaj ri ajawinelab re Pers.

¹⁴ In petinak c'u che u k'alajisaxic ri cuc'ulmaj na ri a tinimit pa ri q'uisbal tak k'ijol ri quepe na, ri c'utwächinic c'ut ri awilom are' cubij we k'ijol ri'.’

¹⁵ Aretak cätajin cubij wa' chwe, in benak nu wäch cho ri ulew man c'o ta c'u jun tzij xinbij.

¹⁶ Xak c'ätetal c'u xpe jun ri cäjunamataj ruc' jun rija'l winak xuchap ri qui chi' ri nu chi'. Xinbij c'u che ri c'o chnuwäch: “Ajawaxel, we c'utwächinic ri' c'axc'obisam canok, resam ri nu chuk'ab.

¹⁷ ¿Jas ta cuban we pataninel ech la ri' cäcuinic cätzijon ta uc' la, man c'o ta chi c'u jubik' nu chuk'ab man c'o ta chi c'u ne wuxlab?

¹⁸ Ri jun ri cäjunamataj ruc' jun rija'l winak xinuchap chi jumul, xebuya' c'ac' nu chuk'ab

¹⁹ xubij c'u chwe: ‘Maxe'j awib mawi matoc il. Ri Dios catulok'ok'ej; ¡chachajij anima' chc'ol c'u a chuk'ab! Aretak cätajin cätzijon wuc', xinna' chi xpe chajin anima' chwe, xinbij c'ut: Ajawaxel tzijom la wuc', e tzelem c'u la ri nu chuk'ab.’

²⁰ Xubij c'u chwe: ‘¿La aweta'm jasche in petinak che awilic? Rumal rech chi camic quintij chi na nu chuk'ab ruc' ri tako'n aj caj ri cätoban pa ri rajawibal ri Pers. Aretak c'ut quinq'uis u tijic nu chuk'ab ruc', cäpe na ri tako'n aj caj ri cätoban pa Gres.

²¹ Camic quinbij chawe ri tz'ibatal chupam ri wuj ri c'o wi ri kastzij: Pa ri nu tijoj chuk'ab cuc', xak xuwi c'o ri u to'banic ri Miquel wuc', ri tako'n aj caj ri to'banel pa Israel.’ ”