Ri Amos 1 - Quiché Bible

K'atan tak tzij paquiwi' ri c'ulja nimak tak tinimit

¹ Are tzijol wa' ri xuya' ri Amos jun yuk'ul chij pa ri tinimit Teco ri xya' u bixic che rumal ri Dios ri cuc'ulmaj na ri Israel, quieb junab majok ri nimalaj cabrakan, pa tak ri u k'ijol ri Uziy, ajawinel re Juda xukuje' pa ri u k'ijol ri Jeroboam ajawinel re Israel (ri Joas are' ri u tat ri Jeroboam).

² Aretak ri Ajawaxel cubano chi cätataj ri u ch'abal jacha' cakulja c'ä chupam ri juyub Sion, ri c'o pa Jerusalen, quechaki'jar c'ut ri ulew jawije' ri e c'o wi tak ri echa' cächaki'jar c'ut ri u wi' ri Carmel.

Ri e aj Damasc

³ Jewa' cubij ri Ajawaxel: “Ri e aj Damasc e q'ui tak etzelal e qui banom man quebenya' ta canok chi ma ta chinsachisaj qui wäch; xequic'äjij ri aj Galaad cuc' tak c'ajibal re räx ch'ich'.

⁴ Rumal ri' quincoj na k'ak' che ri rachoch ri ajawinel Hazael, are c'u we k'ak' ri' cusachisaj na qui wäch tak ri rachoch ri Ben-hadad.

⁵ Quebenjak tak na ri e u chi' ri tinimit Damasc pune' man cäcaj; quinsachisaj na u wäch ri cajawin pa Bicat-aben xukuje' ri cajawin pa Bet-Eden, e are' tak c'ut ri e aj Siriy rech e yutum quec'am na bic pa Kir.” Cächa' ri Ajawaxel.

Ri e aj Gaz

⁶ Jewa' cubij ri Ajawaxel: “Ri e aj Gaz e q'ui tak ri etzelal ri e qui banom ri man quebenya' ta canok chi ma ta chinc'äjisaj qui wäch; xquichap c'u bic ronojel jun tinimit xquic'ayij c'u pa Edom jacha' lok'om pataninel.

⁷ Rumal ri' quincoj na k'ak' chque ri nimak tak u tapia ri Gaz, are c'u we k'ak' ri' cusachisaj na qui wäch tak ri e nimak tak rachoch.

⁸ Quinsachisaj na u wäch ri cajawin pa Asdod xukuje' ri cajawin pa Ascalon. ¡Ruc' ronojel ri nu cuinem quinq'uiak na wib chrij ri Ecron, cacäm c'u ne na ri q'uisbal aj pilistey!” Cächa' ri Ajawaxel.

Ri e aj Tir

⁹ Jewa' cubij ri Ajawaxel: “Ri e aj Tir e q'ui tak ri etzelal ri e qui banom ri man quebenya' ta canok chi ma ta chinc'äjisaj qui wäch; xjach c'u che lok'om pataninel pa u k'ab ri Edom ronojel jun tinimit ri u banom wi' jun c'ulwächinic ruc', aj achalaxic.

¹⁰ Rumal ri' quincoj na k'ak' chque tak ri nimak tak u tapia ri Tir, are c'u we k'ak' ri' cusachisaj na qui wäch tak ri e nimak tak rachoch.”

Ri e aj Edom

¹¹ Jewa' cubij ri Ajawaxel: “Ri e aj Edom e q'ui tak ri etzelal ri e qui banom ri man quebenya' ta canok chi ma ta chinc'äjisaj qui wäch; e c'o c'u ne ch'ich' re ch'o'j pa qui k'ab man ruc' ta c'u tok'obisam wächaj, xquitakej u banic c'ax chque tak ri aj israelib ri e cachalal. Xquitzokopij ronojel ri coyowal, ri qui c'ax na'ic c'ut man xjamartaj.

¹² Rumal ri' quincoj k'ak' pa Teman, are c'u we k'ak' ri cusachisaj na qui wäch tak ri nimak tak ja ri e c'o pa Bosra.”

Ri e aj Amon

¹³ Jewa' cubij ri Ajawaxel: “Ri e aj Amon e q'ui tak ri etzelal ri e qui banom ri man quebenya' ta canok chi ma ta chinc'äjisaj qui wäch; xa' c'u rumal rech chi quebel ch'u'j che u nimarisaxic u wäch ri culew, xequipoch'ola' tak ri ixokib ri e yawab tak winak pa ri ulew re Galaad.

¹⁴ Rumal ri' quincoj na k'ak' chque ri nimak tak u tapia ri Raba, are c'u we k'ak' ri' cusachisaj qui wäch tak ri nimak tak cachoch querachilaj rakoj tak chi'aj re ch'o'j xukuje' tininem quech u k'ijol cakulja.

¹⁵ Are c'u ri rajawinel cac'am na bic pa jun ulew chic, junam quebe tak ri rachijab cuc' ri e nimak tak qui k'ij.” Cächa' ri Ajawaxel.