Nabe Tzijobelil 5 - Quiché Bible

E rija'lil ri Ruben

^1-3 Ri e u c'ojol ri Ruben, ri u nabeal ri Israel, e are' ri Hanoc, Palu, Hezron xukuje' ri Carmi. Ri Ruben are' ri kas nabeal c'ojolaxel, xutzak c'ut ri ya'tal che ri nabealil rumal rech chi xunak ri rixokil ri u tat, ri ya'tal che ri u nabealil xek'axex chque ri e u c'ojol ri Jose, jun chic u c'ojol ri Israel. Are' c'u xux na nim u cuinem ri Juda chquiwäch ri rachalal, che c'ut xel wi na jun c'amal be; are c'u ri ya'tal che ri nabeal c'ojolaxel xya'taj che ri Jose.

^4-6 Ri e rija'lil ri Joel pa ri qui cholajil tak quib, e are' ri Semaiy, Gog, Simeiy, Micaiy, Reaiy, Baal xukuje' ri Beera, c'amal qui be ri aj rubenib, ri xc'am bic jacha' lok'om pataninel rumal ri Tiglat-pileser, ajawinel re Asiriy.

⁷ Ri e rachalal ri Beer, je jas ri qui cholajil ri u k'ab achalaxic xetz'ibaxic, e are' ri Jeiel, ri nim na u k'ij, ri Zacariy

⁸ xukuje' ri Bela, u c'ojol ri Asaz, ri' u mam ri Sema, ri u c'ojol ri Joel. Ri Bela xjeki' pa Aroer ri u c'ulbatil ri rulew copan c'ä pa Neb xukuje' pa Baal-meon.

⁹ Pa ri elebal k'ij xopan c'ä chuchi' ri chaki'j uwo sak ri copan c'ä ruc' ri nima' Euprats, sibalaj c'u xepok'ataj ri rawaj pa ri ulew Galaad.

¹⁰ Pa tak ri k'ijol ri xajawin ri Saul, ri aj rubenib xec'oji' pa ch'o'j cuc' ri aj agareyib, xecuin c'u che qui ch'äquic xquijekeba' c'u quib pa ri elebal k'ij che ri ulew Galaad.

E rija'lil ri Gad

¹¹ Ri e rija'lil ri Gad ri xejeki' chquiwäch ri aj rubenib, pa ri rulew ri Basan, copan c'ä ruc' ri tinimit Salca, e are' ri

¹² Joel, ri nim u k'ij, are' jun ri Sapan, are' chic jun ri Jaanay, xukuje' ri Sapat.

¹³ Ri e rija'lil, pa ri qui cholajil ri cachalaxic, e are' wa' Micael, Mesulam, Seba, Joray, Jacan, Ziy xukuje' ri Heber, e wukub chi conojel.

¹⁴ E are' tak wa' ri e u c'ojol ri Abihail, ri u c'ojol ri Huri, wa' u c'ojol ri Jar, wa' u c'ojol ri Galaad, wa' u c'ojol ri Micael, wa' u c'ojol ri Jesisay, wa' u c'ojol ri Jado, wa' u c'ojol ri Buz.

¹⁵ Ri Ahi, u c'ojol ri Abdiel, ri' u mam ri Gun, xux c'amal qui be ri rachalal.

¹⁶ Conojel xejeki' pa Galaad, pa Basan xukuje' pa tak ri alaj tak qui tinimit, xukuje' pa tak ri juyub re Saron ri queyuk'un wi, c'ä pa tak ri qui c'ulbatil.

¹⁷ Conojel e are' xtz'ibax ri qui bi' chquixo'l ri cachalal pa tak ri u k'ijol ri Jotam, ajawinel re Juda, xukuje' pa tak ri u k'ijol ri Jeroboam, ajawinel re Israel.

Qui tzijobelil ri quieb amak' ruc' pa niq'uiaj

¹⁸ Ri e rija'lil ri Ruben xukuje' ri rech ri Gad, xukuje' ri pa niq'uiaj che ri ramak' ri Manases, e cowilaj tak ajch'ojab, ri e c'o qui quetecak tak ch'ich', xukuje' qui ch'ich' tak re ch'o'j xukuje' qui q'uiakbal ch'ab, ri sibalaj utz qui tijoxic banom che u banic ch'o'j. E cawinak quiejeb mil wukub sient oxc'al (44,760) achijab ri e ya'tal che u banic ch'o'j.

¹⁹ Xech'ojin c'u cuc' ri aj agareyib, xukuje' ruc' ri Jetur, ri Napis xukuje' ri Nodab;

²⁰ xeto' c'ut rumal ri Dios, xekaj c'ut ri aj agareyib pa qui k'ab xukuje' ri quinimom quib che qui to'ic, pa u niq'uiajil c'ut ri ch'o'j ri cätajin cäquibano xquitz'onoj che ri Dios chi chebuto'. Ri Dios xebuto' rumal rech chi xquicu'ba' qui c'u'x chrij.

²¹ Xequic'am c'u bic ri cawaj ri e qui c'ulel, ri e cawinak lajuj mil (50,000) cameyib, quieb sient cawinak lajuj mil (250,000) chij cächil quieb mil (2,000) ama'ib tak bur. Xekaj xukuje' jun sient mil (100,000) winak pa qui k'ab.

²² Sibalaj e q'ui ri c'ulel ri xecämic, rumal rech chi ri ch'o'j are' xbanow ri Dios. Xejeki' c'u can pa tak we c'olbal ri' c'ä xopan na ri k'ijol aretak xebesax bic.

²³ Ri e quija'lil ri pa niq'uiaj che ri ramak' ri Manases xejeki' pa ri ulew ri cächaptaj pa Basan copan c'ä pa Baal-hermon, pa Senir xukuje' pa ri juyub Hermon, sibalaj c'u e q'ui.

²⁴ Ri c'amal tak qui be ri calaxic e are' ri Eper, Isi, Eliel, Asriel, Jeremiy, Hodabiy xukuje' ri Jadiel, conojel e are' e cowilaj tak ajch'ojab, achijab ri nimak qui k'ij xukuje' e c'amal tak qui be ri cachalaxic.

²⁵ Xquic'ulelaj c'ut ri u Dios ri e qui mam man c'u ruc' ta jiquil xebin chuwäch xequik'ijilaj tak ri e qui diosib tak ri tinimit ri xsachisax qui wäch rumal ri Dios xebesax c'u bic chquiwäch.

²⁶ Rumal c'u rech wa', ri u Dios ri Israel xutakchi'j ri Pul, ajawinel re Asiriy, ri u bixic, ri Tiglat-pileser, ri xeyutuw bic ri e aj rubenib xukuje' ri aj gadib xukuje' ri pa niq'uiaj che ri ramak' ri Manases; xebuc'am c'u bic pa Halah, Habor, Har xukuje' chuchi' ri nima' Gozan, ri c'ä e c'o wi camic.