Nabe Tzijobelil 29 - Quiché Bible

Ri David xumulij can ronojel ri cajwatajic c'ä majok checämok

¹ Xubij chi c'ut ri David che ronojel ri tinimit ri u mulin rib: “Ri nu c'ojol Salomon, ri xuwi ri are' xcha' rumal ri Dios, are' jun ala ri c'ä maja' ri u junab, are c'u ri chac sibalaj nim u banic, rumal rech chi man are ta jun ja che jun winak xane' are' ri rachoch ri Dios, ri Ajawaxel.

² Ruc' ronojel tijow chuk'ab nu mulin ri cajwataj che u yaquic ri rachoch ri nu Dios: k'an puak, sak puak, k'an ch'ich', räx ch'ich' xukuje' che' ri quebajwataj che qui banic tak ri jastak chquijujunal. Xukuje' c'u cornalin, abaj ri cäjulk'irisaxic, yujulic, abaj che wikom qui wäch, ronojel qui wäch je'lic tak abaj xukuje' alabastr ri sibalaj tz'ebetalic.

³ Che c'ut u tz'akat chic ronojel ri nu mulin chic che u yaquic ri rachoch Dios, rumal c'ut ri nu lok'ok'ebal c'u'x ri c'o che ri rachoch ri nu Dios, quinjäch che ri rachoch Dios ri k'an puak ri sak puak ri e wech pa wech wi:

⁴ Quieb mil ruc' quieb sient (2,200) quintal coc'alaj k'an puak, job mil ruc' oxc'al (5,060) quintal sak puak ri ch'ajch'ojirisam che qui ch'ukic tak ri tapia pa tak ri ja.

⁵ Ronojel ri k'an puak xukuje' sak puak checoj che qui banic tak ri jastak ri e re k'an puak o e re sak puak ri quebajwatajic, xukuje' che ronojel chac ri rajawaxic u banic cumal ri nawinelab tak ajchaquib. Are c'u ri camic, ¿jachin ri cäraj cätoban pa re wi cuya' jun sipanic che ri Ajawaxel?”

⁶ E are tak c'ut ri c'amal tak qui be ri jujun ja winak, ri e c'amal tak qui be ri amak' re Israel, ri e c'amal tak qui be ri jujun tak mil ajch'ojab xukuje' ri que ri jujun tak sient ajch'ojab, xukuje' ri e c'amal tak qui be ri chac ri u takom qui banic ri ajawinel, xequiya' tak sipanic pa quech tak wi,

⁷ xquiya' c'u che ri chac che u banic ri rachoch Dios oxib mil wakib sient juwinak lajuj (3,630) quintal, xukuje' lajuj mil (10,000) rakan k'an puak, wukub mil quieb sient oxc'al (7,260) quintal sak puak, xukuje' xa' co'l man oxlajuj mil quieb sient (13,200) quintal k'an ch'ich' xukuje' oxc'al cablajuj mil wakib sient (72,600) quintal räx ch'ich'.

⁸ Xukuje' ri e c'o tak je'lic tak abaj cuc' xejach pa ri c'olbal puak rech ri rachoch Dios, ri c'o chuxe' ri u takanic ri Jehiel, rija'lil ri Jerson.

⁹ Ri winak xequicotic rumal we yanic ri' ruc' ronojel animaaj, rumal rech chi e qui yo'm we jastak ri' che ri Ajawaxel ruc' ronojel animaaj. Xukuje' ri ajawinel David nimalaj xquicotic.

¹⁰ Xuk'alajisaj c'ut ri David chi tewichital ri Ajawaxel chquiwäch conojel ri winak ri qui mulin quib, xcha' c'ut: “¡Lal tewichital ba' Ajawaxel chbe k'ij sak, u Dios ri ka tat Israel!

¹¹ ¡E ech la, Ajawaxel, ri nimalil, ri cuinem, ri juluwem, ri ajawinic xukuje' ri nimalaj banic la! Rumal rech chi ronojel ri c'o pa ri caj xukuje' ri c'o pa ri uwächulew e ech la. Ech la xukuje' ri ajawinic, lal Ajawaxel nim na k'ij la chquiwäch conojel.

¹² Uc' la quepe wi ri k'inomal xukuje' ri nimarisabal k'ij. Cätakan la puwi' ronojel. Ri chuk'ab xukuje' ri cuinem pa k'ab la e c'o wi, xukuje' pa k'ab c'u la c'o wi ri u ya'ic ri ajawinic xukuje' ri cuinem chque conojel.

¹³ Rumal ri', ka Dios, cäkaya' maltioxinic che la camic, cakak'ijilaj c'ut ri juluwemalaj bi' la;

¹⁴ are' c'u ri in ¿in jachinok xukuje' jachin ri nu tinimit chi ya'tal chke chi quekachi'j q'ui tak jastak che la? Kastzij ronojel cäpe uc' la xuwi cakaya' ri ka c'amom che la.

¹⁵ Are c'u ri uj chwäch la xa' uj jacha' oc'owenelab ri xak quebe o c'owic jas ri xquiban ri e ka mam, xukuje' c'ut ri ka c'aslemal chuwäch ri uwächulew xak junam ruc' jun mumu'j, ri man c'o ta wi jun eyebal c'uxaj.

¹⁶ ¡O Ajawaxel, ka Dios, e ech la xukuje' uc' la e petinak wi conojel tak we k'inomal ri' ri ka mulin che u yaquic jun ja che ri tastalicalaj ri bi' la!

¹⁷ In weta'm, nu Dios, chi ri lal quebenic'oj tak la ri etamabal tak c'uxaj xukuje' chi are' cakaj ri colomal chwäch la. Rumal ri' ruc' jun colomalaj chomanic nu chi'm ronojel wa' che la. Quincuin c'u che rilic camic ruc' quicotemal chi ri tinimit la, ri u mulin rib waral, u c'amom ulok ri u sipanic chwäch la ruc' ronojel ranima'.

¹⁸ Ajawaxel, u Dios ri Abraham, ri Isaac xukuje' rech ri Israel, ri e ka mam, bana' la chi chjekel amak'el we chajin animaaj ri' chupam ri ranima' ri tinimit la, chc'ama' c'u la u be ri ranima' uc' la.

¹⁹ Ya' ba' la che ri nu c'ojol Salomon jun jicomalaj ranima' rech cacuinic quebutz'akatisaj tak ri e takomal la, ri e tz'ibatalic k'alajisanic tak xukuje' tak ri pixab, chebubana' c'ut ronojel ri caquibij, rech xukuje' cacuin che u yaquic ri ja ri e nu suc'umam wi can ri jastak che u yaquic.”

²⁰ Chuq'uisbalil c'ut xubij ri David chque conojel ri winak ri qui mulin quib: “Chixk'ijilan ba che ri Ajawaxel ri i Dios.” Conojel c'ut ri winak xek'ijilan che ri Ajawaxel, qui Dios ri e qui mam, xexuqui' c'ut xquimejela' quib chuwäch ri Ajawaxel xukuje' chuwäch ri ajawinel.

²¹ Chucab k'ij xquichi'j che ri Ajawaxel tabal tak tok'ob xukuje' tabal tok'ob ri quechajirisaxic: jumil c'ojolab ama'ib tak wacax, jumil ama'ib tak chij xukuje' jumil alaj ama'ib tak chij, e cachilam tak ri e qui sipanic que u wa'l uva xukuje' jumulaj tabal tak tok'ob rumal ronojel Israel.

²² Pa ri k'ij ri' xewa'ic xukuje' xebuq'uianic ruc' nimalaj quicotemal chuwäch ri Ajawaxel. Xquicamulij chi c'ut u cojic ri Salomon ri u c'ojol ri David che ajawinel, xquitas c'ut chuwäch ri Dios jacha' jun nim u k'ij, are' c'u ri Sadoc jacha' cojol tabal tok'ob.

²³ Jeri', ri Salomon xt'uyi' jacha' ajawinel pa ri u tem re ajawibal ri Ajawaxel jacha' ajawinel, che u q'uexwäch ri David ri u tat, sibalaj c'u utz xel pa ronojel. Ronojel c'ut ri Israel xniman che.

²⁴ Conojel c'ut ri c'amal tak be xukuje' ri e qui nimakil tak ri ajch'ojab, junam cuc' conojel ri e u c'ojol ri ajawinel David, xquiya' qui tzij che u to'ic ri ajawinel Salomon.

²⁵ Ri Ajawaxel xubano chi ri Salomon sibalaj xnimar u k'ij chuwäch ronojel Israel, xujelarisaj c'ut ri rajawinic chi jacha' mawi ta ne jubik' c'o ta jun ajawinel re Israel re nabe ri xjunamataj ta ruc'.

U cämical ri David

²⁶ Ri David, u c'ojol ri Isayi, xajawin, c'ut, puwi' ronojel Israel.

²⁷ Cawinak junab c'ut xbeytaj che rajawinel ri Israel, chque tak wa' xajawin wukub junab pa Hebron juwinak oxlajuj junab c'ut pa Jerusalen.

²⁸ Sibalaj c'u nim winak chic xcäm pa jamaril, e rekam q'ui u junab, k'inomal tak xukuje' e nimarisabal tak k'ij. Are' c'u xajawin ri Salomon ri u c'ojol chupam ri u c'olbal.

²⁹ Ri u tzijobelil ri ajawinel David, kas pa ri chaplebal c'ä pa ri q'uisbalil, tz'ibatal chupam ri u tzijobelil tak ri k'axal tzij ri Samuel, chupam ri u tzijobelil tak ri k'axal tzij ri Natan xukuje' chupam ri e rech ri k'axal tzij ri Gad,

³⁰ c'o ronojel ri tzijobelil re ri rajawinic xukuje' ri u cuinem xukuje' tak ri xuc'ulmaj ri are', ri Israel xukuje' ri niq'uiaj tak ulew chic.