Nabe Tzijobelil 27 - Quiché Bible

Quecoj banal tak ch'o'j xukuje' k'atal tak tzij pa ri rajawibal ri David

¹ Ri cätakenic are' ri qui tz'ibal ri aj israelib ri e ajilam tak, ri e c'amal tak qui be ri jujun tak ja winak, ri c'amal tak qui be ri jujun tak mil ajch'ojab xukuje' ri jujun tak sient ajch'ojab, xukuje' ri takanelab ri quepatanij che ri ajawinel, xukuje' chque ri jutak k'at ajch'ojab ri quepatanij che ri jujun tak ic' pa ronojel ri jun junab. Chquijujunal ri jujun tak k'at e juwinak quiejeb mil (24,000) achijab.

² Nabe juk'at, chajinelab pa ri nabe ic': ri c'amal u be are' ri Jasobeam, u c'ojol ri Zabdiel,

³ rija'lil ri Pares xukuje' are c'u takanel paquiwi' conojel ri c'amal tak be que ri ajch'ojab ri quepatanij che ri nabe ic'.

⁴ Ri juk'at chajinelab chic che ri ucab ic': ri c'amal u be are' ri Doday ri aj ahohit.

⁵ Ri juk'at chajinelab chic che ri urox ic': ri c'amal u be che ri ch'o'j are' ri Benaiy, u c'ojol ri Joiad qui nimal ri e cojol tabal tok'ob Joiad.

⁶ Are' c'u jun chque ri juwinak lajuj cowilaj tak achijab are' c'u c'amal u be xukuje'. Are c'u ri Amisabad are' cätakan puwi' we juk'at ri'.

⁷ Ri juk'at chajinelab chic che ri ucaj ic': ri c'amal u be are' ri Asael, rachalal ri Joab. Are' c'u c'o ri Zebadiy ri u c'ojol che u q'uexwäch.

⁸ Ri juk'at chajinelab chic che ri uro' ic': ri c'amal u be are' ri Samut ri aj izrait.

⁹ Ri juk'at chajinelab chic che ri uwak ic': ri c'amal u be are' ri Ira, u c'ojol ri Iques, aj Teco.

¹⁰ Ri juk'at chajinelab chic che ri uwuk ic': ri c'amal u be are' ri Heles ri aj paltit, rija'lil ri Eprain.

¹¹ Ri juk'at chajinelab chic che ri uwajxak ic': ri c'amal u be are' ri Sibecay ri aj Hus, rija'lil ri Zera.

¹² Ri juk'at chajinelab chic che ri ubelej ic': ri c'amal u be are' ri Eliezer ri aj Anatot, rija'lil ri Benjamin.

¹³ Ri juk'at chajinelab chic che ri ulajuj ic': ri c'amal u be are' ri Maharay ri aj Netop, rija'lil ri Zera.

¹⁴ Ri juk'at chajinelab chic che ri ujulajuj ic': ri c'amal u be are' ri Benaiy ri aj piraton, rija'lil ri Eprain.

¹⁵ Ri juk'at chajinelab chic che ri ucablajuj ic': ri c'amal u be are' ri Helday ri aj Netop, rija'lil ri Otoniel.

¹⁶ Ri c'amal tak qui be ri amak' re Israel e are' tak wa': che ri ramak' ri Ruben, ri Eliezer, u c'ojol ri Zicr; che ri rech Simion, ri Sepatiy, u c'ojol ri Maac;

¹⁷ che ri rech ri Levi, ri Hasabiy, u c'ojol ri Kemuel; e u tz'akatil ri e rija'lil ri Aaron, ri Sadoc;

¹⁸ che ri ramak' ri Juda, ri Eliu, jun rachalal ri David; ri rech ri Isacar, ri Omri, u c'ojol ri Micael;

¹⁹ che ri rech ri Zabulon, ri Ismaiy, u c'ojol ri Abdiy; che ri rech ri Neptali, ri Jerimot, u c'ojol ri Asriel;

²⁰ che ri rech ri Eprain, ri Osey, u c'ojol ri Azaziy; che ri rech ri pa niq'uiaj ri ramak' ri Manases, ri Joel, u c'ojol ri Pedaiy;

²¹ che ri rech ri jun pa niq'uiaj chic ri amak' ri Manases ri c'o pa Galaad, ri Id, u c'ojol ri Zacariy che ri re ri Benjamin, Jaasiel, u c'ojol ri Abner;

²² che ri rech ri Dan, ri Azareel, u c'ojol ri Jeroham. E are' tak wa' ri e c'amal tak qui be tak ri amak' aj Israel.

²³ Ri David man xerajilaj taj ri c'ä maja' catz'akat jujun tak winak qui junab, rumal rech chi ri Ajawaxel u chi'm chi quebupok'colisaj na ri aj Israel jacha' ri ch'imil ri e c'o chicaj.

²⁴ Ri Joab xuchaplej u banic ri ajilanic, man c'u xuq'uis ta u banic, u mac rech chi we ajilanic ri' xuc'am ulok jun u q'ueyowal puwi' ri Israel. Rumal ri' man c'o ta ri ajilabal chupam ri wuj que ri u tzijobelil ri ajawinel David.

²⁵ Ri chajil puak re ri ajawibal are' ri Azmabet, u c'ojol ri Adiel, are' c'u ri chajinel chque ri tanibal tak jastak ri e c'o pa ri juyub, pa tak ri tinimit, pa tak ri alaj tinimit pa tak ri u c'ulbatil ri ulew, are' ri Jonatan, u c'ojol ri Uziy.

²⁶ Ri cänabej chquiwäch ri aj chaquib ri quetajin tak ri ulew are xcanaj ri Ezri, u c'ojol ri Quelub.

²⁷ Ri cänabej chquiwäch ri ticol tak uva are' c'o ri Simeiy, aj Ramat, ri cojom che u c'olic ri u wa'l uva pa tak ri c'olbal rech are' ri Zabdi, aj Sepam.

²⁸ Ri cänabej chquiwäch ri e yacal tak aseitun xukuje' ri c'ache'laj tak juyubal tak higo ri e c'o pa ri lianic are' xcanaj ri Baal-hanan, aj Jeder; chque c'ut ri e tanibal tak aseit, ri Joas.

²⁹ Ri cänabej chquiwäch ri e yuk'ul tak wacax ri queyuk'ux pa Saron are' xcanaj ri Sitray, ri aj Saron, ri cänabej chquiwäch ri queyuk'un pa ri beya' are' xcanaj ri Sapat, u c'ojol ri Adlay.

³⁰ Ri cänabej chquiwäch ri e yuk'ul tak camey are' xcanaj ri Obil, aj ismael; chque tak ri bur, ri Jehediy, aj Meronot;

³¹ chque tak ri chij, ri Jaziz, aj agarey. Conojel wa' e are tak ri xebuc'am ri e u k'inomal ri ajawinel David.

³² Ri Jonatan, rican ri David, aj no'jalaj achi ri xukuje' c'o retamanic, are' ya'l no'j, xukuje' ri Jehiel, u c'ojol ri Hacmon, are' wa' ri quebachilan ri e u c'ojol ri ajawinel.

³³ Xukuje' ri Ahitopel ya'l u no'j ri ajawinel, xukuje' ri Husay, aj arquit, are' achi wa' ri u jiquibam u c'u'x ri ajawinel chrij.

³⁴ Ri xetaken ri u chac ri Ahitopel are' ri Joiad, u c'ojol ri Benaiy, xukuje' ri Abiatar. Ri qui nimal ajch'ojab ri quechajin ri ajawinel are' ri Joab.