Nabe Tzijobelil 26 - Quiché Bible

Chajil tak oquibal xukuje' niq'uiaj chajinelab chic

¹ Aretak xejach tak ri qui chac ri chajil tak oquibal e are' tak wa' ri xecanajic: Chque ri aj coretib, Meselemiy, u c'ojol ri Core, u c'ojol ri Ebiasap.

² Ri e u c'ojol ri Meselemiy: Zacariy, ri nabeal; Jozabad, ri ucab; Zebadiy, ri urox; Jatniel, ri ucaj;

³ Elam, ri uro'; Johanan, ri uwak, Elioenay c'ut ri uwuk.

⁴ Ri e u c'ojol ri Obed-edom: Semaiy, ri nabeal; Jozabad, ri ucab; Joa, ri urox; Sacar, ri ucaj; Natanael, ri uro';

⁵ ri Amiel, ri uwak; Isacar, ri uwuk; ri Peultay, ri uwajxak. Tewichi'm c'ut ri Obed-edom rumal ri Dios ruc' ri u ya'ic e q'ui u c'ojol.

⁶ Ri Semaiy, ri u c'ojol ri Obed-edom, xec'oji' canok quieb u c'ojol ri xquik'at tzij paquiwi' ri cachalal rumal rech chi e achijab ri c'o nimalaj qui cuinem.

⁷ Ri e u c'ojol ri Semaiy e are' wa' Otni, Rapael, Obed, Elzabad, Eliu xukuje' ri Samaquiy, e cowilaj tak achijab.

⁸ Conojel wa', e rija'lil ri Obed-edom, ri e u c'ojol xukuje' ri e rachalal, e cowilaj tak achijab ri cäquicoj qui chuk'ab pa ri patanijic. Chi conojel, e oxc'al quieb (62) ri e rija'lil ri Obed-edom.

⁹ Ri e u c'ojol xukuje' ri e rachalal ri Meselemiy: e wajxaklajuj (18), conojel e cowilaj tak achijab.

¹⁰ Ri e u c'ojol ri Hos, ri e rija'lil ri Merar: Simri, ri are' c'amal be, man are' ta c'u nabeal c'ojolaxel, xucoj ri u tat che c'amal be; Hilsiy, ri ucab;

¹¹ ri Tebaliy, ri urox; Zacariy, ri ucaj. Ri e u c'ojol xukuje' ri e rachalal ri Hos e oxlajuj chi conojel.

¹² E are tak wa' ri qui chac ri e chajil tak oquibal. Chque ri e are', junam xukuje' chque ri e c'amal tak be xukuje' tak ri e cachil, are' xya'taj ri patanijic chque chupam ri rachoch Dios.

¹³ Xban ri taklebenic paquiwi' ri e chak'axelab ri e nabealab jas ka ri u cholajil ri cachoch chque tak ri oquibal chquijujunal.

¹⁴ Ri Selemiy are xutaklebej ri oquibal ri c'o pa ri elebal k'ij, che ri Zacariy ri u c'ojol ri utzalaj ya'l no'j, are' xutaklebej ri riquiak'ab elebal k'ij.

¹⁵ Ri Obed-edom are xutaklebej ri u mox elebal k'ij, ri e u c'ojol are xquitaklebej ri qui chajixic ri jastak ri e c'o chupam ri rachoch Dios.

¹⁶ Ri Hos are xutaklebej ri u kajebal k'ij jawije' c'o wi ri oquibal re Salequet, pa ri be ri pakapic. Je qui jachic tak wa' we pataninic ri' xbanic:

¹⁷ k'ij chi k'ij quec'oji' wakib chajil tak oquibal pa ri elebal k'ij, quiejeb pa ri u wiquiak'ab elebal k'ij, quiejeb chi c'ut pa ri u mox elebal k'ij, e cacab chi c'ut che jujun chque ri e c'olom wi ri jastak.

¹⁸ Cho ri uwo ja, pa ri be chu kajebal k'ij, e c'o quiejeb che ri be xukuje' quieb che ri kas uwo ja.

¹⁹ Je qui jachic tak wa' ri qui patan ri e chajil tak oquibal chque ri e rija'lil ri Core xukuje' chque ri e re ri Merar.

²⁰ E c'o chi c'u niq'uiaj aj levitib e cojom che qui chajixic ri e u k'inomal ri rachoch Dios xukuje' ri e c'olom wi ri tastalic tak sipanic.

²¹ Chque ri e u c'ojol ri Laadan, ri e rija'lil ri Jerson xukuje' ri e rech ri Jehiel,

²² ri e u c'ojol ri Jehiel, Zetam, xukuje' ri Joel ri rachalal e are' chajinelab che ri k'inomal ri c'o chupam ri rachoch Dios.

²³ E are tak c'ut ri e rija'lil ri Amram, ri Izar, ri Hebron xukuje' ri Uziel,

²⁴ ri chajinel ri nim na u k'ij chque ri k'inomal are' ri Sebuel, rija'lil ri Jerson xukuje' ri Moises.

²⁵ E rachalaxic ri e aj Eliezer: ri Rehabiy, u c'ojol ri Eliezer; Jesaiy, u c'ojol ri Rehabiy; Joram, u c'ojol ri Jesaiy; Zicr, u c'ojol ri Joram; xukuje' ri Selomit, u c'ojol ri Zicr.

²⁶ Ri Selomit xukuje' tak ri e rachalal pa qui k'ab xjach wi ri e c'olotal wi ri k'inomal ri e tastalic tak jastak ri e u tasom ri David, ri e c'amal tak qui be ri jujun tak ja winak, mil tak ajch'ojab ri e c'amal tak qui be ri jujun tak sient ajch'ojab xukuje' ri c'amal tak qui be ri ajch'ojab ri qui tasom che ri Ajawaxel.

²⁷ E jastak wa' ri e rikom pa tak ri ch'o'j, ri e qui jachom rech quebajwataj chupam ri rachoch Dios.

²⁸ Xukuje' e c'o chi' ri e u tasom ri Samuel ri k'axal tzij, ri Saul ri u c'ojol ri Sis, ri Abner ri u c'ojol ri Ner, xukuje' ri Joab ri ral ri Sarb. Ronojel ri tasom c'o ri Selomit che u chajixic xukuje' tak ri e rachalal.

²⁹ E are' tak c'ut ri e rija'lil ri Izar, ri latz'obinak qui wäch pa ri jastak naj chque ri aj israelib jacha' e takanelab e k'atal tak tzij, e are' ri Quenaniy xukuje' ri e u c'ojol.

³⁰ Chque tak ri e rija'lil ri Hebron, ri e cojom paquiwi' ri Israel ri e c'o pa ri elebal k'ij che ri Jordan, xukuje' pa ri jastak rech ri Ajawaxel jacha' xukuje' pa ri u patanixic ri ajawinel, e are' wa' ri Hasabiy xukuje' tak ri rachalaxic, e jumil wukub sient (1,700) cowilaj tak achijab.

³¹ Pa ri junab cawinak re ri rajawinic ri David xchomax tak quij ri e jujun tak ja winak chque ri e rija'lil ri Hebron, xriktaj c'u chquixo'l chi e c'o cowilaj tak achijab pa Jazer re Galaad. Ri c'amal tak qui be ri e rija'lil ri Hebron are' ri Jeriy;

³² junam coc' tak ri rachalaxic, e cowilaj tak achijab, ri e quieb mil wukub sient (2,700) c'amal tak qui be ri jujun tak ja winak. Ri ajawinel David xebucoj paquiwi' tak ri amak' aj Ruben xukuje' aj Gad xukuje' ri pa niq'uiaj che ri ramak' Manases, pa conojel ri jastak rech ri Dios o ri jastak rech ri ajawinel.