Nabe Tzijobelil 25 - Quiché Bible

Ri e ok'isal tak trompet xukuje' ri ajbixab

¹ Ri David xukuje' ri c'amal tak qui be ri patanijic re k'ijilanic xequiya' tak patan ri nimak tak qui k'ij chque ri e u c'ojol ri Asap, Heman xukuje' ri Jedutun, ri quek'axen tzij c'o tak qui alaj arp, nimalaj arp xukuje' quetecak tak k'an ch'ich'. Are cajilabal wa' ri quebanow tak we patan ri'.

² Chque ri e u c'ojol ri Asap: Jacur, Jose, Netaniy xukuje' ri Asarel. Ri cac'amow qui be are' ri Asap, ri qui tat, ri quebuya' tak qui bixic ri cubij ri Dios, ri c'o chuxe' ri u takanic ri ajawinel.

³ Ri wakib u c'ojol ri Jedutun: Jedaliy, Zeri, Jesaiy, Simeiy, Hasabiy xukuje' ri Matatiy. Ri cac'amow qui be are' ri Jedutun ri qui tat, ri quebuya' tak qui bixic ri cubij ri Dios ri c'o u arp che qui ya'ic maltioxinic xukuje' che u ya'ic k'ijilanic che ri Dios.

⁴ Ri e u c'ojol ri Heman: Buquiy, Mataniy, Uziel, Sebuel, Jeremot, Hananiy, Hanani, Eliat, Jidalt, Romant-ezer, Josbecaz, Malot, Hotir xukuje' ri Mahaziot.

⁵ Conojel wa' e u c'ojol ri Heman, ri cäca'y pa che' pa abaj ri capatanij che ri ajawinel, je jastak ri chi'nic ri xebuban ri Dios che chi cuban che chi cac'oji' na nimalaj u cuinem; kas c'u je xelic, ri Dios xebuya' che ri Heman cajlajuj (14) u c'ojol xukuje' oxib (3) u mia'l.

⁶ Conojel cac'am qui be rumal ri qui tat aretak quebixon pa tak ri k'ijilanic ri queban chupam ri rachoch Dios quecoj tak quetecak tak k'an ch'ich', nimalaj tak arp xukuje' tak ri guita'r ri sibalaj q'ui u c'amal. Ri Asap, Jedutun xukuje' ri Heman e c'o chuxe' ri u takanic ri ajawinel.

⁷ Ri cajilabal conojel ri ajk'ojomab, xukuje' ri niq'uiaj cachil chic ri quena'w che bixonic chuwäch ri Ajawaxel, e quieb sient jumuch' wajxakib (288).

⁸ Xejach c'ut ri qui chac re ri patanijic chquiwäch apachique ta ne ri caquitaklebej, we e nabealab o e chak'axelab, ajtijab o e tijoxelab.

^9-31 Aretak xebesax tak ulok ri taklebenic, je qui canejic tak ri chac wa' xecanaj pa ri qui cholajil, ruc' ri nabe c'ä ruc' ri juwinak quiejeb: Jose Jedaliy Zacur Izri Netaniy Buquiy Jesarel Jesaiy Mataniy Simeiy Azareel Hasabiy Subael Matatiy Jeremot Hananiy Josbecas Hanani Malot Eliat Hotir Jidalt Mahaziot Romant-ezer Chquijujunal e cachil tak ri cachalal xukuje' tak ri e qui c'ojol e cablajuj.