Nabe Tzijobelil 24 - Quiché Bible

Ri qui patanijic ri e u rija'l ri Aaron

¹ Ri e rija'lil ri Aaron xukuje' e c'o tak u k'ijol ri qui chac. Ri e u c'ojol ri Aaron e are' ri Nadab, Abiu, Eleazar xukuje' ri Itamar.

² U mac c'u rech chi xcäm ri Nadab xukuje' ri Abiu, nabe xecäm chuwäch ri qui tat, man c'o ta c'u qui c'ojol xebalaxic, ri Eleazar xukuje' ri Itamar pa qui k'ab xcanaj wi can ri u cojic tabal tok'ob.

³ Ri David, ruc' ri u to'banic ri Sadoc, rija'lil ri Eleazar, xukuje' ri rech ri Ahimelec, rija'lil ri Itamar, xjach qui wäch che u banic tak ri qui chac pa tak ri qui k'ijol.

⁴ Xebil c'ut chi ri achijab ri e rija'lil ri Eleazar are sibalaj e q'ui na chquiwäch ri e rech ri Itamar, xejachalaxic jeri' chi xecanaj can wuklajuj c'amal tak be chque ri e rija'lil ri Eleazar wajxakib c'ut rija'lil ri Itamar.

⁵ Ri chac xejach rumal taklebenic tak chquixo'l conojel, chquixo'l c'ut ri e rija'lil ri Eleazar xukuje' chquixo'l ri e rija'lil ri Itamar e co tastalic tak pataninelab, pataninelab chuwäch ri Dios.

⁶ Aninak c'ut ri Semaiy ri ajtz'ib, u c'ojol ri Natanael are c'u jun chque ri aj levitib, xebutz'ibaj tak ri qui bi' chuwäch ri ajawinel, chquiwäch ri c'amal tak be, chuwäch ri cojol tabal tok'ob Sadoc, chuwäch ri Ahimelec, u c'ojol ri Abiatar, xukuje' chquiwäch ri e c'amal tak qui be ri jujun tak ja winak chquiwäch tak ri e cojol tabal tok'ob xukuje' chquiwäch tak ri aj levitib. Ri qui cholajil che tak ri chacunic quebesax tak ulok jas ri caquitaklebej, quieb patanijic chque ri e rija'lil ri Eleazar jun c'ut chque ri e rija'lil ri Itamar.

^7-18 Aretak xebesax ulok tak ri taklebenic, je qui k'ijol tak ri chac wa' xecanajic, cachaptaj bic ruc' ri nabe queq'uis c'ä ruc' ri juwinak quiejeb: Joiarib Jedaiy Harim Seorim Malquiy Mijamin Cos Abiy Jexu Secaniy Eliasib Jaquim Hup Jesebeab Bilg Imer Hezir Apses Petaiy Hezequiel Jaquin Gamul Delaiy Maasiy

¹⁹ Je c'u qui jachanic tak ri chac wa' xbanic che ri patanijic chupam ri rachoch ri Dios, je jas ri nak'atisabal ri u bim ri Ajawaxel, ri u Dios ri Israel, ri u takom u banic rumal ri Aaron, ri qui mam.

²⁰ Ri e aj levitib ri c'ä e c'o na e are tak wa': Subael, ri e rija'lil ri Amram; Jehediy, ri e rech ri Subael;

²¹ Isiy, ri are' nabeal, chque ri aj Rehebiy;

²² Selomot, aj Izar; Jahat, aj Selomot;

²³ ri e rija'lil ri Hebron: Jeriy, ri nabe; Amariy, ri ucab; Jahaziel, ri urox; xukuje' ri Jecaman, ri ucaj.

²⁴ E c'o xukuje': Micaiy, u c'ojol ri Uziel; Samir, u c'ojol ri Micaiy;

²⁵ Isiy, rachalal ri Micaiy; Zacariy, u c'ojol ri Isiy.

²⁶ Mali xukuje' ri Musi, e u c'ojol ri Merar; ri e u c'ojol ri Jaaziy, xukuje' u c'ojol ri Merar.

²⁷ Ri e rija'lil ri Merar ri e rech ri Jaaziy, ri u c'ojol, e c'o ri Soham, Zacur xukuje' ri Ibri;

²⁸ e are' chi c'ut ri e rech ri Mali, Eleazar, ri man xec'oji' ta u c'ojol,

²⁹ xukuje' ri Sis; ri Jerameel, u c'ojol ri Sis;

³⁰ ri e u c'ojol ri Musi, e are' ri Mali, Edar xukuje' ri Jerimot. E are' tak aj levitib wa' pa ri calaxic.

³¹ Xukuje' ri e are' xejach rumal taklebenic, ri e ralaxic ri nabeal jacha' xukuje' ri e rech ri chak'axel, junam xban chque cuc' tak ri c'o quebux che ri e rija'lil ri Aaron, chuwäch ri ajawinel David, ri Sadoc, Ahimelec xukuje' ri e c'amal tak qui be ri calaxic ri e cojol tabal tok'ob xukuje' ri quech ri aj levitib.