Nabe Tzijobelil 23 - Quiché Bible

Ri levitib xukuje' tak ri qui patanijic

¹ Aretak c'u nim winak chic ri David oc'owinak chic ri e u junab, xucoj ri Salomon ri u c'ojol che ajawinel puwi' ri Israel,

² xebumulij conojel tak ri e c'amal u be ri Israel, xukuje' ri e cojol tabal tok'ob e cachil tak ri e aj levitib.

³ Xebajilax c'ut ri aj levitib ri e c'o chi juwinak lajuj (30) qui junab capakic, aretak c'u xebajilatajic ri cajilabal ri xelic e juwinak wajxaklajuj mil (38,000) achijab, e aj levitib.

⁴ Chque wa' xetas juwinak quiejeb mil (24,000) che u c'amic u be ri chac che u yaquic ri rachoch Dios, wakib mil (6,000) che k'atal tak tzij xukuje' takanelab,

⁵ quiejeb mil (4,000) chi c'ut rech quequichajij tak ri oquibal, quiejeb mil (4,000) chi c'ut rech e are' quebanow ri k'ijilanic che ri Ajawaxel cuc' tak ri chaconisan re trompet ri xtakan ri David che qui banic che we patanijic ri'.

⁶ Ri David xebuk'at pa tak mulaj, je jas ri u cholajil ri e u c'ojol ri Levi; ri Levi are' qui tat ri Jerson, ri Coat xukuje' ri Merar.

⁷ Ri e u c'ojol ri Jerson: Laadan xukuje' ri Simeiy.

⁸ Ri e u c'ojol ri Laadan e oxib: Jehiel, ri nabeal, Zetam xukuje' ri Joel.

⁹ Ri e u c'ojol ri Simeiy xukuje' e oxib: Selomit, Haziel xukuje' ri Haran. E are' tak wa' ri e c'amal tak qui be ri jujun tak ja winak chque ri e rija'lil ri Laadan.

¹⁰ Ri e u c'ojol ri Simeiy e quiejeb: Jahat, Ziz, Jeus xukuje' ri Beriy.

¹¹ Ri nabeal are' ri Jahat, ri ucab Ziz rumal c'u rech chi ri Jeus xukuje' ri Beriy man e q'ui taj ri qui c'ojol xebalaxic, xa' c'u jun ja winak xban chque che patanijic.

¹² Ri e u c'ojol ri Coat e quiejeb: Amram, Izar, Hebron xukuje' ri Uziel.

¹³ Ri e u c'ojol ri Amram are' ri Aaron xukuje' ri Moises. Ri Aaron xcha' rumal ri Dios che qui cojic tak ri sipanic ri sibalaj e tastal na, che u c'atisaxic ri c'oc' k'ol chuwäch ri Ajawaxel che u patanixic xukuje' che u tewichi'xic amak'el, ekle'n wa' ri rajawaxic u banic rumal ri Aaron xukuje' cumal ri e u c'ojol re amak'el.

¹⁴ Ri Moises, ri achi ri pataninel rech ri Dios, xukuje' ri e rija'lil xecoj chquixo'l ri ramak' ri Levi.

¹⁵ Ri e u c'ojol ri Moises e are' wa' Jerson xukuje' ri Eliezer.

¹⁶ Chque ri e u c'ojol ri Jerson, ri nabeal are' ri Sebuel.

¹⁷ Ri nabe u c'ojol ri Eliezer are' ri Rehabiy, man xec'oji' ta chi c'ut e u c'ojol, c'u ri Rehabiy xec'oji' q'ui u c'ojol.

¹⁸ Ri nabe u c'ojol ri I are' ri Selomit.

¹⁹ Ri e u c'ojol ri Hebron e are': ri Jeraiy, ri nabeal; Amariy, ri ucab; Jahaziel, ri urox, Jecaman c'ut ri ucaj.

²⁰ Ri e u c'ojol ri Uziel e are': Micaiy, ri nabeal, Isiy c'ut, ri ucab.

²¹ Ri e u c'ojol ri Merar e are' ri Mali xukuje' ri Musi. Ri e u c'ojol ri Mali e are' ri Eleazar xukuje' ri Sis.

²² Ri Eleazar xcämic, man xebalax ta u c'ojol: xak xuwi u mia'l xebalax, ri xec'uli' cuc' tak ri cachalaxic wi quib, ri e u c'ojol ri Sis.

²³ Ri e u c'ojol ri Musi e oxib: Mali, Edar xukuje' ri Jeremot.

²⁴ E are' tak wa' ri rija'lil ri Levi, je jas ri qui cholajil ri rachalaxic, ri xetz'ibax tak ulok qui bi' pa ri ajilanic e jacha' c'amal tak qui be ri achalaxic, ri jutak winak qui junab capakic, ri latz'obinak qui wäch che ri patanijic chupam ri rachoch Dios.

²⁵ Ri David u bim ulok: “Ri Ajawaxel, ri u Dios ri Israel u yo'm uxlanem che ri u tinimit u jekebam c'ut ri kas u jekelibal pa Jerusalen chbe k'ij sak.

²⁶ Rumal ri' ri e aj levitib man caquik'axela' ta chic ri u Lic'om Rachoch ri Ajawaxel pa jalan tak c'olbal mawi ri jastak ri quecoj che ri k'ijilanic.”

²⁷ Je c'u ri', je xbanic jas ri q'uisbal tak u chomanic ri David, xebajilax ri rija'lil ri Levi ri jujun tak winak qui junab cäpakic,

²⁸ xecanaj c'u can chuxe' ri qui takanic ri e cojol tabal tok'ob, ri e rija'lil ri Aaron, che qui banic tak ri patan chupam ri rachoch Dios, e are' quejosk'in tak ri e u wäch tak ri ja ri alaj tak ja xukuje' ri qui josk'ixic tak ri tastalic tak jastak, xukuje' ri niq'uiaj patan chic chupam ri rachoch Dios.

²⁹ Pa qui k'ab xcanaj wi ri qui cholajixic tak ri caxlanwa ri e tasom, ri coc'alaj c'äj, ri quebanbex tak ri watz'otz' tak caxlanwa ri man caya' ta ch'am cuc', chque tak ri sipanic ri quetzac pa xarten, ri k'or, conojel tak ri alal xukuje' tak ri pajbal.

³⁰ Rajawaxic chi ronojel k'ij e c'o chupam ri rachoch Dios ak'abibal xukuje' benak k'ij che u ya'ic maltioxinic xukuje' che u k'ijilaxic ri Ajawaxel,

³¹ xukuje' aretak quechi'x tak ri tabal tok'ob ri quechajirisax chuwäch ri Ajawaxel pa tak ri k'ij re uxlanem, pa tak ri nimak'ij re ri c'ac' ic' xukuje' pa tak ri nimak'ij ri nimak tak na qui banic, amak'el quepatanij chuwäch ri Ajawaxel je jas ri cajilabal ri c'utum che qui banic wa'.

³² Xukuje' jachom pa qui k'ab ri u chajixic ri Lic'om Rachoch Dios re rikoj ib ruc' ri Dios xukuje' ri k'ijilabal, quepatanij chupam ri rachoch Dios junam cuc' ri cachalal ri junam camak', ri e rija'lil ri Aaron.