Nabe Tzijobelil 20 - Quiché Bible

Ri raba cak'ax pa u k'ab ri David

¹ Xc'ulmataj c'ut pa jun k'ijol, pa ri chaplebal rech ri junab, chi c'ut qui nak'atisam quib ri ajawinelab quebel bic che u banic ch'o'j, ri Joab xusuc'umaj jun ch'ojinic xusachisaj c'u qui wäch conojel ri aj amonib. Xbe chi c'ut, xusutij c'u rij ri Raba xch'ojin c'u ruc' c'ä xuyojij na canok. Are' c'u ri David, xcanaj can pa Jerusalen.

² Xumajij c'u na ri David che ri u jolom ri rajawinel ri u corona re k'an puak, ri e c'o je'licalaj tak abaj che, ri xpajan oxc'al oxlajuj (73) libra; xcoj c'u che ri u jolom ri David. Xukuje' xebutokij bic q'ui jastak ri sibalaj pakal cajil,

³ e are' tak c'ut ri winak ri xeto'taj can chupam ri tinimit xeresaj bic chila' xebucoj pa chac cuc' tak ramibal xukuje' tak icäj. Junam xuban ri David chque cuc' conojel tak ri nimak tak qui tinimit ri aj amonib, xtzelej c'ut pa Jerusalen e rachil conojel tak ri e rajch'ojab.

Ch'o'j cuc' tak ri tac'atak cakan tak achijab

⁴ Xwalij c'u jun ch'o'j pa Jezer chquij ri pilisteyib. Chi' c'ut ri Sibecay ri aj Hus xumach'irisaj xukuje' xucämisaj ri Sipay, quija'lil ri achijab ri tac'atak cakan.

⁵ Pa jun ch'o'j chi c'ut ri xban cuc' ri pilisteyib, ri Elanan, u c'ojol ri Jair, xucämisaj ri Lami, rachalal ri Goliat ri aj Gat, ri c'o jun u tz'imaj ch'ich' ri c'o jun u wi' sibalaj nim ri junam ruc' jun tz'imaj re quemabal.

⁶ Pa Gat xban chi jun ch'o'j. C'o jun achi chi' ri sibalaj jutac'aj rakan, ri e c'o wakitak u wi' tak u k'ab xukuje' wakitak u wi' tak rakan. Xukuje' wa' quija'lil tak ri e tac'atak tak achijab,

⁷ xutzur c'u ri Israel xcämisax c'u rumal ri Jonatan, u c'ojol ri Simey, rätz ri David.

⁸ We tac'atak cakan tak achijab ri' e rija'lil ri Rep, ri aj Gat, xekaj c'u pa u k'ab ri David xukuje' pa qui k'ab ri e qui nimal tak ri rajch'ojab ri David.