Nabe Tzijobelil 17 - Quiché Bible

U c'ulwächinic ri Dios ruc' ri David

¹ Aretak ri David jekel chic chupam ri rachoch, xubij che ri Natan, ri k'axal tzij: “Ampe', ri in in c'o chupam jun ja re chacalte', are c'u ri u caxa ri Ajawaxel xa' chuxe' jun lic'om rachoch c'o wi.”

² Ri Natan xutzelej u bixic che: “Bana' ba' la ronojel ri chomam la u banic, c'o c'ut ri Dios uc' la che to'ic la.”

³ Kas c'u pa ri ak'ab ri', ri Dios xuch'abej ri Natan xubij c'u che:

⁴ “Jät jatech'aw ruc' ri David, ri pataninel wech, jaya' u bixic che chi ri in, ri Ajawaxel, nu bim: ‘Man at taj ri catyacow ta na jun ja chwe rech quinjeki' chupam.

⁵ Kas pa ri k'ij aretak xinwesaj ulok ri Israel, c'ä camic, man in c'olinak ta pa nimak tak ja, xane' xak in c'olinak chupam jun lic'om ja re binem chupam jun c'olbal xukuje' pa jun chic.

⁶ Pa ronojel ri k'ijol ri xinbin cuc', mawi jumul xintz'onoj ta che jun chque ri c'amal qui be, ri xebencojo rech quetakan puwi' ri nu tinimit, chi chuyaca' ta jun ja re chacalte' chwe.’

⁷ Rumal c'u ri' chabij che ri David ri pataninel wech chi ri in ri Ajawaxel ri c'o ronojel u cuinem, quincha': che: ‘In xatinwesaj chrij ri qui warabal ri chij, xatinwesaj rech man catbin ta chic chquij ri chij, rech catux c'amal u be ri nu tinimit Israel;

⁸ at wachilam apawije' ta ne ri at benak wi, nu q'uisom tzij paquiwi' conojel tak ri e a c'ulel ri xquiwalijisaj quib chawij, nu yo'm c'u nimarisan k'ij chawe jas ri c'o cuc' ri achijab ri nimak qui k'ij re we uwächulew ri'.

⁹ Nu suc'umam c'ut jun c'olbal che ri nu tinimit Israel, chi c'u e nu jekebam wi rech quejeki' chupam jun qui c'olbal ri quech, ri man c'o ta jachin cäyo'w ta latz' chque mawi ta ne caquiban ta c'ax ri banal tak etzelal chque jacha' pa ri chaplebal,

¹⁰ je c'u quec'ulmatajok aretak xebencoj k'atal tak tzij puwi' ri nu tinimit Israel. Quebencoj na ri qui banom qui c'ulel chawe chuxe' ri a takanic. Quinya' u bixic chawe chi quebenya' na e awija'lil,

¹¹ aretak c'ut che q'uis ri a c'aslemal catcäm c'ut, in quinjekeba' na jun chque ri awija'lil quintiquiba' c'u chupam ri ajawibal.

¹² Are' cäyacow na jun wachoch, are c'u ri in co quintiquiba' na ri u tem re ajawibal chbe k'ij sak.

¹³ In quinux na u tat, are c'u ri are' cux na jun nu c'ojol. Man quink'il ta na ri wutzil che jas ri xinban ruc' ri xajalo,

¹⁴ xane' c'o quintiquiba' na amak'el chupam ri wachoch xukuje' chupam ri wajawibal. Cajeki' c'u can ri u tem re ajawibal amak'el.’”

¹⁵ Ri Natan xutzijoj ronojel wa' che ri David, sibalaj tz'akat jacha' ri xrilo xukuje' ri xuto.

¹⁶ Are c'u ri ajawinel David xoc chuwäch ri Ajawaxel che u tzijobexic, xubij c'ut: “Ajawaxel xukuje' Dios, ¿in jachinok in xukuje' jas qui banic ri wachalaxic chi banom la chwe chi in opaninak c'ä pa we c'olbal ri'?

¹⁷ ¡Man nim ta c'u ne wa' chwäch la, Ajawaxel xukuje' Dios, yo'm c'u la u bixic chi quebajawin na ri e rija'lil ri pataninel ech la yo'm c'u la wäch la chwe chi in je ta ne jun achi ri nim u banic!

¹⁸ ¿Jas ta chic ri quincuin ta chic che u bixic che ri nimarisabal k'ij ri banom la che ri pataninel ech la, xa' c'u ne ri lal eta'm la u wäch we pataninel ech la ri'?

¹⁹ Ajawaxel e banom la conojel tak we mayibal ri' che u tok'obisax u wäch ri pataninel ech la jas ri chomam la u banic, che qui c'utic conojel ri jastak ri cäcuin la che qui banic.

²⁰ Ajawaxel, man c'o ta chi jachin jun jacha' ta ri lal, mawi c'o ta chic jun Dios we ta ma ta xak xuwi ri lal, jacha' ronojel ri kas uj ka tom u bixic.

²¹ Are c'u ri Israel, ri winakil la ¡Man c'o ta chi jun jacha' ta ri are', man c'o ta chi jun nim tinimit ri cajunamataj ta ruc' cho ri uwächulew! Lal, Dios, xto'tajisaj la rech cux tinimit la, xnimarisax c'u k'ij la cumal ri qui banic nimak tak jastak xukuje' e mayibal. Lal xerokij la bic chuwäch ri tinimit la ri xto'tajisaj la ulok pa Ejipt, ri jule' ri nimak tak tinimit chic,

²² rumal rech chi majim la ri Israel jacha' ri tinimit la re chbe k'ij sak, are c'u ri lal, Ajawaxel, cux na la u Dios.

²³ Je ba' ri', Ajawaxel, co tiquiba' la chbe k'ij sak ri chi'nic ri banom la che ri pataninel ech la xukuje' che ri rija'lil ri ajawinel, ¡tz'akatisaj c'u la ri bim la!

²⁴ ¡Kas jic chtz'akatisaj la ri xchi'j la chyok c'ut u k'ij ri bi' la amak'el, chbix c'ut chi ri Ajawaxel ri c'o ronojel u cuinem are' ri u Dios ri Israel, chi ri are' are' ri kas u Dios ri Israel! ¡Chi ri rija'lil ri pataninel ech la ri David chutakej ajawinic co chtiquilok rumal ri to'banic la!

²⁵ Lal, nu Dios, yo'm la retamaxic chwe chi cajekeba' la ri wija'lil; rumal ri' in, pune' in pataninel ech la quintz'onoj jun tok'ob che la.

²⁶ Lal, Ajawaxel, lal Dios chi'm c'u la q'ui utzil che ri pataninel ech la;

²⁷ are c'u ri camic petinak pa anima' la ri u tewichi'xic ri rija'lil ri pataninel ech la rech cajeki' chbe k'ij sak chuxe' ri to'banic la. Lal Ajawaxel, tewichi'm la, tewichital c'ut chbe k'ij sak.”