Nabe Tzijobelil 16 - Quiché Bible

¹ Ri u caxa ri Dios xc'am bic xeyok chupam ri lic'om rachoch re be ri are' u patan wa' xuwoc ri David. Xechi'x c'u tak tabal tok'ob ri quechajirisaxic xukuje' tak tabal tok'ob re utzirisan ib chuwäch ri Dios,

² aretak c'u xto'taj ri David che qui chi'xic xebutewichi'j ri tinimit pa ri u bi' ri Ajawaxel,

³ chque c'u conojel ri aj israelib xuya' jun wa, jun lej re u wäch tut xukuje' jun chic re pasa.

⁴ Ri David xebuc'ut chquixo'l ri aj levi jachin tak ri quepatanij chuwäch ri u caxa ri Ajawaxel, rech cacanaj pa qui k'ab ri u nimak'isaxic u ya'ic ri maltioxinic xukuje' ri u ya'ic u ri k'ij ri Ajawaxel, ri u Dios ri Israel.

⁵ Ri c'amal be are' ri Asap, are chi c'u cätaken ri Zacariy; benak chi c'ut ri Jeiel, Semiramot, Jehiel, Matatiy, Eliab, Benaiy, Obed-edom xukuje' ri Jeiel, ri e c'o tak ri qui chaconisan che u banic ri k'ojom, tak qui nimalaj arp xukuje' tak ri qui alaj arp. Ri Asap are cok'isan ri quetecak tak k'an ch'ich',

⁶ e are' c'u ri e cojol tabal tok'ob Benaiy xukuje' ri Jahaziel e are' quecok'esaj tak ri trompet chuwäch ri caxa rech ri u c'ulwächinic ri Dios.

Salm re maltioxinic rumal ri David

⁷ Kas c'u pa ri k'ij ri' ri David xuya' takanic nabe mul chi ri Asap xukuje' tak ri e rachil chiquichaplej u ya'ic we k'ijilanic ri' re maltioxinic che ri Ajawaxel:

⁸ “¡Chiya' maltioxinic che ri Ajawaxel! ¡Chnataj ri u bi'! Chebitzijoj chque tak ri tinimit ri e u banoj.

⁹ Chebibixoj tak bix che u ya'ic u k'ij. ¡Chebitzijoj ri nimak tak jastak ri e u banom!

¹⁰ China' iwib chi nimak i banic rumal ri tastalicalaj u bi'. ¡Chquicot ri canima' ri caquitzucuj ri Ajawaxel!

¹¹ Chichapa' iwib che ri Ajawaxel, chichapa' iwib che ri u cuinem; chichapa' wib che ri Ajawaxel ronojel k'ij.

¹² Chenataj tak ri nimak tak u chac chiwe ri xukuje' e mayibal, xukuje' tak ri u colomibal ri e u yo'm tak u bixic:

¹³ Ix ri ix, rija'lil ri Israel ri pataninel rech, ix, u c'ojol ri Jacob, ri ix chatajinak rumal,

¹⁴ are' ri Ajawaxel, ri ka Dios; ¡are' ri catakan puwi' ronojel ri uwächulew!

¹⁵ Pune' ta c'u ne queboc'ow jun mil ija'lil, man quesach ta pa u jolom ri e chi'nic re ri c'ulwächinic.

¹⁶ Che ri c'ulwächinic ri xuban ruc' ri Abraham, che ri chi'nic ri kas cäban na xcha' che ri Isaac

¹⁷ xujiquiba' c'ut jacha' pixab che ri Jacob, jacha' jun junalic c'ulwächinic che ri Israel,

¹⁸ aretak xubij: ‘Quenya' ri ulew re Canaan chawe jacha' ri echbal ri cayataj chawe.’

¹⁹ Pune' ri e are' man e q'ui taj, xa' e quieb oxib man e aj chila' taj e c'o pa ri ulew.

²⁰ Ri quebe pa jun nim tinimit, quebe chi c'u pa jun nim tinimit; quebel pa jun ajawibal, quebe chi c'u pa jun ajawibal,

²¹ man xuya' ta ri Dios chi c'o ta jachin xbanow c'ax chque; xebupixbej c'u ne tak ri e ajawinelab:

²² ‘Mebinak tak ri e chatajinak wumal, mawi mebic'äxc'obisaj tak ri e nu k'axal tzij.’

²³ Chixbixon che ri Ajawaxel, iwonojel ri ix jekel chuwäch ronojel ri uwächulew; chiwesaj u tzijol ri u colonic k'ij chi k'ij.

²⁴ Chitzijoj ri u juluwem xukuje' tak ri mayibal ri e u banom chquiwäch conojel tak ri winak xukuje' ri nimak tak tinimit,

²⁵ rumal rech chi ri Ajawaxel nim u k'ij xukuje' ya'tal u k'ijilaxic, xukuje' xibibal na chquiwäch conojel tak ri diosib.

²⁶ Ri e qui diosib ri e jule' tak tinimit chic man c'o ta qui banic, are c'u ri Ajawaxel are' xebanow tak ri caj.

²⁷ ¡C'o nimalaj nimak'ijanic chuwäch! ¡C'o cuinem xukuje' quicotemal chupam ri u k'ijilabal!

²⁸ Chixyan che ri Ajawaxel, jujun tak ja winak quech tak ri tinimit, chiya' che ri Ajawaxel ri cuinem xukuje' ri juluwem;

²⁹ chiya' ri nim ilic che ri Ajawaxel ri takal che, cuc' tak sipanic chixopan ruc'; chik'ijilaj ri Ajawaxel chupam ri k'ijilabal ri je'lic.

³⁰ ¡Chi ronojel ri uwächulew chebirbob chuwäch! Are' c'u xtiq'uiban ri ulew rech man casalab taj.

³¹ ¡Chejajat tak ri caj xukuje' ri uwächulew! Chbix pa nimak tak tinimit: ‘¡Ri Ajawaxel are ajawinel!’

³² ¡Chjinin ri plo xukuje' ronojel ri c'o chupam! ¡Chejajat tak ri ulew xukuje' ronojel ri c'o chupam!

³³ ¡Ri che' ri e c'o pa tak ri c'ache'laj qui raka' tak qui chi' rumal quicotemal chuwäch ri Ajawaxel, ri cäpe che ajawinic cho ri uwächulew!

³⁴ Chiya' maltioxinic che ri Ajawaxel, rumal rech chi utz ri are', rumal rech chi junalic ri u lok'ok'ebal c'u'x.

³⁵ Chibij che: ‘¡Chujcolo' la, ka Dios ka Colonel! ¡Chujmolo' la chujto'tajisaj la rech man cujkaj ta pa qui k'ab ri nimak tak tinimit, rech cujk'ijilan che ri suc'alaj bi' la, rech cujjajatic cujk'ijilan che la!’

³⁶ ¡Tewichital ba' ri Ajawaxel, ri u Dios ri Israel, pa ronojel ri junaliquil!” Ronojel c'u ri tinimit xutzelej u bixic: “¡je' chbanok!,” xuk'ijilaj c'ut ri Ajawaxel.

³⁷ Je c'u ri' ri David xebuya' can chuwäch ri caxa re ri u c'ulwächinic ri Ajawaxel ri Asap xukuje' tak ri e rachil rech quepatanij amak'el jas ri quebajwataj wi k'ij chi k'ij.

³⁸ Xukuje' xebuya' can ri Obed-edom xukuje' tak ri e rachil, e oxc'al wajxakib (68) winak, cachil ri Obed-edom, u c'ojol ri Jedutun, xukuje' ri Hos, che chajil oquibal.

³⁹ Ri Sadoc xukuje' ri e cojol tabal tok'ob ri e rachil xebuya' can chuwäch ri u Lic'om Rachoch ri Ajawaxel, ri c'o chupam ri k'ijilabal ri c'o pa Gabaon,

⁴⁰ rech amak'el quequichi'j tak tabal tok'ob ri quechajirisaxic chuwäch ri Ajawaxel puwi' ri porobal ri quechajirisax wi, ak'abibal xukuje' benak k'ij, kas ruc' tz'akatil jacha' ri tz'ibatal chupam ri u pixab ri Ajawaxel, ri xuya' canok jacha' jun takanic che ri Israel.

⁴¹ Xukuje' xebuya' can cuc' ri Heman, ri Jedutun xukuje' ri qui tz'akatil ri xecha'ic ri xek'alajisax rumal tak ri qui bi' che u banic ri bixonic: “Chiya' maltioxinic che ri Ajawaxel, rumal ri u lok'ok'ebal c'uxaj junalic.”

⁴² Wa' quecok'esaj trompet, ri quetecak tak k'an ch'ich' xukuje' niq'uiaj chaconisan chic che u banic ri k'ojom, ri que cachilaj tak ri bix ri quebixox che ri Dios. Ri e u c'ojol ri Jedutun are quekle'n ri quilixic ri e oquibal.

⁴³ Aretak c'u xq'uis u banic ronojel, conojel ri winak xebe cho tak cachoch, xukuje' c'u ri David xbe cho rachoch che qui tewichi'xic ri e aj uwo rachoch.