Nabe Tzijobelil 15 - Quiché Bible

Ri David cuk'axej ri u caxa ri Dios pa Jerusalen

¹ Ri David xtakanic chi cheyac rachoch chupam ri u tinimit ri David, xusuc'umaj c'ut jun c'olbal ri cäya' wi ri u caxa ri Ajawaxel, chupam jun lic'om rachoch re be.

² Xuya' c'u takanic: “Mawi jun, we man aj Levi, catelen ta bic ri u caxa ri Ajawaxel, are c'ut ri Ajawaxel e chowinak rech e are' quetelen ri u caxa ri Ajawaxel xukuje' rech amak'el e c'o chuwäch che ri u patanixic.”

³ Xumulij c'ut ronojel Israel pa Jerusalen che u k'axexic ri u caxa ri Ajawaxel chupam ri c'olbal ri xusuc'umaj che.

⁴ Xukuje' xebumulij ri rija'lil ri Aaron xukuje' tak ri aj levi.

⁵ Chque ri rija'lil ri Coat jun sient ruc' juwinak xquimulij quib (120): Uriel, ri c'amal qui be ri e rachalaxic.

⁶ Chque ri e rija'lil ri Merar, quieb sient ruc' juwinak (220): Asaiy, ri c'amal qui be ri e rachalaxic.

⁷ Chque ri e rija'lil ri Jerson, jun sient ruc' juwinak lajuj (130): Joel, ri c'amal qui be ri e rachalaxic.

⁸ Chque ri e rija'lil ri Elizapan, quieb sient (200): Semaiy, ri c'amal qui be ri e rachalaxic.

⁹ Chque ri e rija'lil ri Hebron, jumuch' (80): Eliel, ri c'amal qui be ri e rachalaxic.

¹⁰ Chque ri e rija'lil ri Uziel, jun sient ruc' cablajuj (112): Aminadab, ri c'amal qui be ri e rachalaxic.

¹¹ Ri David xusiq'uij ri Sadoc xukuje' ri Abiatar, e cojol tabal tok'ob, xukuje' ri aj levi Uriel, Asaiy, Joel, Eliel xukuje' ri Aminadab,

¹² xubij c'u chque: “Ix, ri ix c'amal tak qui be ri jujun tak ja winak chque ri aj Levi, chi ch'ajch'ojirisaj iwib je jas rajawaxic u banic junam cuc' ri e iwachalaxic, rech quixcuinic quik'axej ri u caxa ri Ajawaxel, ri u Dios ri Israel, chupam ri c'olbal ri nu wocom che;

¹³ rumal c'u rech chi man ix ta xixbanow nabe mul, ri Ajawaxel xeresaj ri qui c'aslemal jujun chke, man xkatz'onoj ta c'u na jas ri rajawaxic u banic.”

¹⁴ Xquich'ajch'ojirisaj c'u quib tak ri e cojol tabal tok'ob xukuje' tak ri e aj levitib jas ri rajawaxic u banic rech cuya' caquik'axej ri u caxa ri Ajawaxel, ri u Dios ri Israel.

¹⁵ Je c'u xquiban wa' che u c'amic ulok xequicoj ba'lul che u telexic ulok, xquiya' paquiwi' tak ri qui teleb, je jas ri takanic ri xuya' ri Moises rumal ri u takanic ri Ajawaxel.

¹⁶ Ri David xukuje' xuya' takanic chque ri c'amal tak qui be ri e aj levitib chi, chquixo'l ri camak', che qui c'utu' tak ri bixonelab che qui c'ama' bic tak ri e qui chaconisan che u banic tak ri trompet, nimalaj arp, alaj arp xukuje' quetecak tak k'an ch'ich', chi co che ok'esaxok che u c'utic chi c'o quicotemal.

¹⁷ Ri e aj levitib xquic'ut ri Heman, u c'ojol ri Joel, xukuje' ri Asap, u c'ojol ri Berequiy, cachalaxic ri Heman; ri e rija'lil ri Merar xukuje' cachalaxic ri e nabe, ri Etan, u c'ojol ri Cusaiy;

¹⁸ xequic'ut chi c'ut niq'uiaj cachalaxic ri e nabe, ri e qui tz'akat ri e u cak'at pataninelab: Zacariy, Jaaziel, Semiramot, Jehiel, Uni, Eliab, Benaiy, Maasiy, Matatiy, Elipelehu, Micniy, xukuje' ri e chajil tak oquibal, ri e are' ri Obed-edom xukuje' ri Jeiel.

¹⁹ Ri e bixonelab Heman, Asap xukuje' ri Etan e are' e cojom che cok'esaxic ri quetecak tak re k'an ch'ich'.

²⁰ Zacariy, Aziel, Semiramot, Jehiel, Uni, Eliab, Maasiy xukuje' ri Benaiy e c'o tak ri qui nimalaj arp che qui k'ojomaxic jas ri caquiban ri e aj elamib.

²¹ Are' c'u ri Matatiy, Elipelehu, Micniy, Obed-edom, Jeiel xukuje' ri Azaziy e c'o tak qui arp che rok'isaxic jas cäquiban ri e aj siminitab.

²² Quenaniy, c'amal qui be ri aj levitib ri yo'm rekle'n che rilic chi quec'am bic ri jastak, are' c'u c'amal be, sibalaj c'u c'o u no'j.

²³ Ri Berequiy xukuje' ri Elcan e are' ri c'amal u be ri caxa.

²⁴ E are' tak c'ut ri e cojol tabal tok'ob Sebaniy, Josapat, Natanael, Amasay, Zacariy, Benaiy xukuje' ri Eliezer e are' tak ri quebok'esan tak ri trompet chuwäch ri u caxa ri Dios. Ri Ebed-edom xukuje' ri Jehiy xukuje' e c'amal u be ri caxa.

²⁵ Are c'u ri David, ri nimak tak tatayib re Israel xukuje' ri e qui nimal tak ri jujun tak mil ajch'ojab xebe ruc' quicotemal che u k'axexic ulok ri u caxa ri Ajawaxel re ri c'ulwächinic ri c'o chupam ri rachoch ri Obed-edom.

²⁶ Rumal c'u rech chi ri Dios e u to'm ri e aj levitib ri e teleninak ri caxa, xequipil wukub alaj tak ama'ib wacax xukuje' wukub ama'ib tak chij.

²⁷ Ri David u cojom jun u k'u' re ch'uch'ujalaj lino jacha', xukuje' conojel ri e aj levitib ri e teleninak ri caxa; ri e ajbixab xukuje' ri Quenaniy, ri c'amowinak u be ri k'axenic; ri David u cojom c'u ne bic jun ratz'iak nim u k'ij re lino.

²⁸ Ronojel Israel je u c'amic bic wa' ri caxa re ri u c'ulwächinic ri Ajawaxel xequibano cuc' rakoj chi'aj, re quicotemal xukuje' ruc' rok'ibal tak ruc'a' chij, trompet, quetecak tak k'an ch'ich', tak ri nimalaj arp xukuje' alaj tak arp.

²⁹ Aretak ri u caxa ri Ajawaxel xopan pa ri u Tinimit ri David, ri Mical, ri u mia'l ri Saul, xca'y c'u ulok pa ri wenta'n; aretak xril ri ajawinel David chi cätajin caxojow ruc' quicotemal, xtiow xuna' che.