Nabe Tzijobelil 12 - Quiché Bible

Ri junam qui wäch ruc' ri David

¹ Aretak c'ä animajinak bic ri David chuwäch ri Saul, u c'ojol ri Sis, jumulaj cowilaj tak ajch'ojab ri junam qui wäch che u banic ri ch'o'j xequimulij quib ruc' pa Siclag.

² We ajch'ojab ri' e cuc'am tak qui q'uiakbal ch'ab, quecuin c'ut quequiq'uiak abaj ruc' iquiak' xukuje' ch'ab ruc' ri qui wiquiak'ab xukuje' ruc' ri qui mox. E are' tak wa': E rachalaxic ri Saul, e aj ramak' ri Benjamin:

³ ri Ahiezer, ri c'amal qui be, xukuje' ri Joas, e u c'ojol ri Sema, aj tinimit Gabaa; Jeziel xukuje' ri Pelet, e u c'ojol ri Azmabet; Berac xukuje' ri Jehu, ri aj tinimit Anatot;

⁴ Ismaiy, aj gabaon, jun chque ri juwinak lajuj cowilaj tak achijab xukuje' c'amal qui be; Jeremiy, Jahaziel, Johanan, Jozabad aj Jeder,

⁵ Eluzay, Jerimot, Bealiy, Semariy; Sepatiy, ri aj arupit;

⁶ Elcan, Isiy, Azareel, Joezer xukuje' ri Jasobeam, aj coretib;

⁷ xukuje' ri Joela xukuje' ri Zebadiy, e u c'ojol tak ri Jeroham, aj Jedor.

⁸ Xukuje' ri e aj ramak' ri Gad xek'ax jujun ruc' ri David aretak c'u c'o chupam ri chaki'j uwo sak. E cowilaj tak ajch'ojab ri e ch'ojaninak chic e cuc'am tak qui quetecak ch'ich' xukuje' tak qui tz'imaj ch'ich'. E jacha' ta ne coj quexiq'uinilob pa tak ri juyub e jacha' ta ne masat aj lianic.

⁹ E are' tak wa': Ezer, ri nabe; Obadiy, ri ucab; Eliab, ri urox;

¹⁰ Misman, ri ucaj; Jeremiy ri uro';

¹¹ Atay, ri uwak; Eliel, ri uwuk;

¹² Johanan, ri uwajxak; Elzabad, ri ubelej;

¹³ Jeremiy, ri ulajuj, xukuje' ri Macbanay, ri ujulajuj.

¹⁴ Wa' we e rija'l tak aj Gad e c'amal tak qui be ri ajch'ojab jun chque ri man nim ta u k'ij cojom paquiwi' jun sient rajch'ojab are c'u ri nim na u k'ij cojom paquiwi' jun mil.

¹⁵ E are' tak wa' ri xeboc'ow chupam ri Jordan pa ri nabe ic' aretak sibalaj pulininak ri nima' c'ä chuchi', xquiban c'u chque ri e jekejoj pa tak ri beya' chi xebanimaj chquiwäch, pa ri elebal k'ij xukuje' pa ri u kajebal k'ij.

¹⁶ E c'o chi c'u jujun achijab ri e aj ramak' ri Benjamin xukuje' e aj Juda xebe qui mulij quib ruc' ri David chupam ri cowilaj to'bal ib.

¹⁷ Ri David xel ulok che qui c'ulaxic xubij c'u chque: “We ix petinak che nu to'ic pa jamaril, ruc' ronojel wanima' quixinc'amo rech cäkaban xa' jun iwuc'; we c'u ix petinak che nu subic xa' rech quinijach pa qui k'ab ri e nu c'ulel, man c'o ta c'u ne jun il nu banom, ¡are' ba' ri qui Dios ri e ka mam chilowak chuc'äjisaj c'u i wäch!”

¹⁸ Are c'u ri Amasay, c'amal qui be ri juwinak lajuj, majim rumal ri uxlabal, co xurak u chi' xubij: “¡Jamaril chawe, David, u c'ojol ri Isayi! ¡Chc'ol ba' ri jamaril awuc'! ¡Jamaril awuc', xukuje' chque ri catquito, at u to'm c'ut ri a Dios!” Ri David xebuc'amo xuya' c'u qui c'olbal chquixo'l ri e c'amal tak qui be ri ajch'ojab.

¹⁹ Xukuje' jujun chque ri e ramak' ri Manases xek'ax ruc' ri David aretak xec'ol quieb oxib k'ij cuc' ri aj pilisteyib che u tijic u chuk'ab ruc' ri Saul. Man je ta c'u xc'ulmatajic ri David man xya'taj ta che chi xebuto' taj ri aj pilisteyib, rumal rech chi ri e qui k'atal tak tzij aretak qui mulin chi quib, xquichomaj u k'ilic, xquibij c'ut: “¡Cumal tak ri ka jolom cäk'ax na ruc' ri Saul ri rajaw!”

²⁰ Ri achijab ri e aj ramak' ri Manases ri xek'ax ruc' ri David aretak xbe wa' pa Siclag e are' wa' Adnas, Jozabad, Jediael, Micael, Jozabad, Eliu xukuje' ri Ziletay, e qui nimal jujun tak mil e rajch'ojab ri Manases.

²¹ E are' tak wa' ri xeto'ban ruc' ri David ri xenabej chquiwäch ri rajch'ojab, conojel c'ut e cowilaj tak ajch'ojab xebux c'u qui nimal ajch'ojab.

²² K'ij chi k'ij xebopan chi niq'uiaj ajch'ojab ruc' ri David, c'ä xebux c'u juk'at rajch'o'j, ri kas c'o qui chuk'ab.

Ri e rajch'ojab ri David

²³ E are' cajilabal rajch'o'j wa' chi conojel ri xequijacha' quib pa u k'ab ri David pa Hebron ri e wiktal che u banic ch'o'j, che u k'axexic ri rajawibal ri Saul pa u k'ab, je jas ri u takanic ri Ajawaxel:

²⁴ Che ri ramak' ri Juda, wakib mil wajxakib sient (6,800) achijab ri e cuc'am tak quetecak ch'ich' xukuje' tak tz'imaj ch'ich', e wiktal che u banic ch'o'j.

²⁵ Che ri ramak' ri Simion, wukub mil jun sient (7,100) cowilaj tak ajch'ojab, e wiktal che u banic ch'o'j.

²⁶ Che ri ramak' ri Levi quiejeb mil wakib sient (4,600),

²⁷ e c'o chi c'u na oxib mil wukub sient (3,700) ri e rachalaxic ri Aaron, ri c'o ri Joiad, che c'amal qui be,

²⁸ xukuje' cachil ri Sadoc, c'ojol xukuje' cowilaj aj ch'o'j, e rachil juwinak quieb (22) c'amal tak qui be jujun ja winak.

²⁹ Che ri ramak' ri Benjamin, ri kas ramak' ri Saul, oxib mil (3,000) achijab, ri nabe canok xa' co'l man conojel e jic can ruc' ri Saul.

³⁰ Che ri ramak' ri Eprain, juwinak mil wajxakib sient (20,800) cowilaj tak ajch'ojab, nimak qui k'ij chquixo'l ri cachalaxic.

³¹ Che ri pa niq'uiaj che ri ramak' ri Manases, wajxaklajuj mil (18,000) achijab xetak bic che u cojic ri David che ajawinel.

³² Che ri ramak' ri Isacar, ri c'asal qui no'j che quetamaxic tak ri k'ijol che retamaxic ri rajawaxic u banic rumal ri Israel, quieb sient c'amal tak be e cachil conojel tak ri achijab ri e rech ri camak' ri e c'o chquixe' ri qui takanic.

³³ Che ri ramak' ri Zabulon, cawinak lajuj mil (50,000) rajch'ojab ri e suc'umatal che u banic ch'o'j cuc'am c'u ronojel qui wäch ch'ojibal, ri kas qui yo'm qui tzij quijachom quib che u to'ic ri David.

³⁴ Che ri ramak' ri Neptali, jun mil (1,000) c'amal tak be e cachil juwinak wuklajuj mil (37,000) achijab e cuc'am tak tz'imaj ch'ich' xukuje' tak quetecak ch'ich'.

³⁵ Che ri ramak' ri Dan, juwinak wajxakib mil wakib sient (28,600) ajch'ojab.

³⁶ Che ri ramak' ri Aser, cawinak mil (40,000) rajch'ojab ri xak e suc'umatal che u banic ch'o'j.

³⁷ E c'o chi c'u wi ri' ri xepe ch'käp che ri Jordan, jun sient juwinak mil (120,000) achijab chque ri ramak' Ruben xukuje' ri Gad xukuje' che ri pa niq'uiaj che ri ramak' ri Manases, e wiktal cuc' ronojel qui wäch tak ch'ojibal.

³⁸ Conojel we ajch'ojab ri', quisuc'umam tak quib che u banic ch'o'j, jic xebe pa Hebron che u cojic ri David che ajawinel re ronojel Israel; xukuje' conojel ri niq'uiaj aj israelib chic, chnimalaj conojel, junam je xquibano.

³⁹ Oxib k'ij xec'oji' ruc' ri David, xewa'ic xebuq'uianic, rumal rech chi ri e qui winakil xequisuc'umaj tak ri wa ri catijic.

⁴⁰ Xukuje' tak c'ut ri e qui c'ulja, xukuje' ne ri e aj Isacar, Zabulon xukuje' ri Neptali, xequic'am bic qui wa chquij tak bur, camey, mulayib xukuje' wacax. Xequic'am bic ronojel u wäch ri cätijic chque: c'äj, lej que tak higo, pasa, u wa'l uva, aseit, ama'ib tak wacax xukuje' tak chij; ruc' tz'ebenic, rumal rech chi c'o nimalaj quicotemal pa Israel.