Nabe Tzijobelil 11 - Quiché Bible

Ri David ajawinel pa Israel xukuje' pa Juda

¹ Conojel ri aj israelib xquimulij quib xebetzijon ruc' ri David pa Hebron. Chila' xquibij wi che chi: “Ri uj xa' junam ka quiq'uel uc' la,

² kas c'u tzij pune' ri Saul are' ajawinel, lal c'ut ri xc'amow la qui be ri aj Israel che qui banic tak ri ch'o'j. Che chi c'ut u tz'akat, ri Ajawaxel ri Dios la u chi'm che la chi lal cac'amow na la u be xukuje' cätakan na la puwi' ri u tinimit Israel.”

³ Je c'u wa' xbanic, conojel ri nimak tak tatayib re Israel xebetzijon ruc' ri ajawinel David pa Hebron, xuban c'u jun c'ulwächinic cuc', are xucoj ri Ajawaxel che k'alajisanel chquixo'l. Xquitas c'ut ri David jacha' ajawinel re Israel, je jas ri xuchi'j ri Dios rumal ri Samuel.

Ri David cuch'äc ri Sion ri sibalaj co c'olic

⁴ Ri David xukuje' conojel ri aj israelib xquitakej qui bic pa Jerusalen, ri cäbix Jebus che. Ri aj jebuseyib e c'o pa ri ulew ri',

⁵ xquibij c'u che ri David: “Ri at man catcuin taj catoc waral.” Xcuin c'ut ri David che u ch'äquic ri Sion ri sibalaj co c'olic, are wa' ri cäbix u tinimit ri David che.

⁶ U bim c'ut ri David: “Are' ri nabe ri cuchap u banic ch'o'j cuc' ri aj jebuseyib quincoj na che c'amal be ri nim u k'ij.” Ri nabe ri xuchaplej ch'ojinic are' ri Joab, ral ri Sarb, xcoj c'u che c'amal be.

⁷ Xujekeba' c'u na rib ri David chupam ri tinimit ri cowirisabalib; rumal ri' xbinax u Tinimit ri David che.

⁸ Xusutij c'ut u colomaxic ri David ri tinimit kas ruc' ri lianisam. Ri Joab are' xq'uisow u colomisaxic ri tinimit,

⁹ xuchaplej c'ut u q'uiyic ri u cuinem ri David, c'o c'ut ri Ajawaxel ruc' ri c'o ronojel u cuinem.

E are' tak rajch'ojab ri David wa' ri nimak qui k'ij

¹⁰ E are' tak rajch'ojab ri David wa' ri nimak na qui k'ij, ri xetoban ruc' pa ri rajawibal xecachilaj c'u conojel ri aj israelib xquiban ajawinel che je jas u yo'm u bixic ri Ajawaxel che ri Israel.

¹¹ E are cajilabal wa' ri e rajch'ojab ri David ri sibalaj nimak na qui k'ij: Jasobeam, u c'ojol ri Hacmon, c'amal qui be ri oxib ri sibalaj nimak na qui chuk'ab, ri c'o jun k'ijol xebucämisaj oxib sient achijab ruc' ri u tz'imaj ch'ich'.

¹² Ri xtaken chi c'u chrij ri are' ri Eleazar, u c'ojol ri Dod, aj ahohit, ri are' jun chque ri oxib ri c'o na qui chuk'ab.

¹³ Xc'oji' ruc' ri David pa Pas-damim, aretak ri aj pilisteyib xquimulij quib chila' che u banic ch'o'j. C'o jun ulew chila' ri ticom u wäch che sebad aretak c'u xebanimaj ri ajch'ojab aj israelib chquiwäch ri pilisteyib,

¹⁴ ri are' xutac'aba' rib pa u niq'uiajil ri ulew xuto' c'ut, xebuch'äc c'ut ri aj pilisteyib. Je c'u ri' ri Ajawaxel xuya' jun nimalaj ch'äcanic chque.

¹⁵ C'o jumul, oxib chque ri juwinak lajuj cowilaj tak achijab xebe che u rikic ri David jawije' c'o wi ri cowilaj nim abaj, chupam ri pec re Adulam. Ri aj pilisteyib qui mulin quib che u banic ch'o'j pa ri beya' aj Repaim.

¹⁶ Ri David c'o chupam ri pec, e c'o c'ut jumulaj ajch'ojab aj pilisteyib pa Belen.

¹⁷ Ri David xuk'alajisaj ri u rayinic: “¡C'o ta banom wi chi c'o ta jachin cäyo'w chwe chi quinwuq'uiaj ta wech ri ja' ri c'o chupam ri c'ua' ri c'o chuchi' ri oquibal pa Belen!”

¹⁸ Are c'u ri oxib cowilaj tak achijab xeboc chupam ri qui kajebal ri aj pilisteyib xquesaj c'ut ri ja' chupam ri c'ua' ri c'o chuchi' ri oquibal pa Belen, xquic'am c'u bic che ri David. Man xraj ta c'ut ri David xruq'uiaj, xane' xujamij jacha' sipanic chuwäch ri Ajawaxel,

¹⁹ je xubij wa': “¡Muya' ri Dios chwe chi quinwuq'uiaj! ¡Xak junam cubana' ri' chi quinwuq'uiaj ri qui quiq'uel we achijab ri', xquijach c'ut ri qui c'aslemal pa ri cämical xebe c'u che u c'amic ulok!” Man xraj ta c'ut xruq'uiaj. We mayibal ri' are' xebanow ri e oxib cowilaj tak achijab.

²⁰ Ri Abisay, rachalal ri Joab, are' c'amal qui be ri juwinak lajuj cowilaj tak achijab. C'o jutij xch'ojin cuc' oxib sient achijab ruc' ri u tz'imaj ch'ich', xebucämisaj c'ut. Xa' jeri' xnimar u k'ij chquixo'l ri juwinak lajuj,

²¹ xnimarisax c'u na u k'ij chquiwäch conojel wa', xux c'u c'amal qui be. Man c'u xjunamataj ta cuc' ri nabe e oxib.

²² Ri Benaiy, ri u c'ojol ri Joiad, ri quel chupam ri tinimit Cabseel, are' jun cowilaj achi ri xebuban mayibalalaj tak jastak. Are' ri xecämisan ri quieb u c'ojol ri Ariel aj Moab. C'o jun k'ij cätajin cäkaj pimalaj sak tew xoc chupam jun jul, xucämisaj c'u jun coj chupam.

²³ Xukuje' xucämisaj jun aj Ejipt ri jutac'aj rakan, ri xa' co'l man oxib bara' u taq'ui'c ri ruc'am bic jun u tz'imaj ch'ich' ri cäjunamataj ruc' jun tz'imaj ch'ich' re quemabal. Ri Benaiy xbe chrij ruc' jun che', xutokij c'ut ri tz'imaj ch'ich' pa u k'ab xucämisaj c'ut ruc' ri kas u tz'imaj ch'ich'.

²⁴ We cämisanic ri' ri xuban ri Benaiy, u c'ojol ri Joiad, are' xbanow che chi xnimar u k'ij chquixo'l ri juwinak lajuj cowilaj tak achijab,

²⁵ xnimar c'u na u k'ij chquiwäch wa', man c'u xjunamataj ta cuc' ri e nabe oxib. Xucoj c'u ri David che takanel paquiwi' ri e chajil rech.

²⁶ Ri e cowilaj tak achijab e are' wa': Asael, rachalal ri Joab; Elanan, u c'ojol ri Dod, aj Belen;

²⁷ Samot aj Harod, Heles aj paltit,

²⁸ Ira, u c'ojol ri Iques, aj Teco; Abiezer, aj Anatot;

²⁹ Sibecay, aj Hus; Ilay aj ahohit;

³⁰ Maharay, aj Netop; Heled, u c'ojol ri Baan, xukuje' aj Netop;

³¹ Itay, u c'ojol ri Ribay, aj Gabaa, ri jekel chupam ri ramak' ri Benjamin; Benaiy, aj Piraton;

³² Hiday, ri quel chuchi' ri alaj nima' re Gaas; Abiel, aj arbat;

³³ Azmabet, aj Bahurim; Eliaba, aj saalbonit;

³⁴ ri e u c'ojol ri Jasen, aj jizon; Jonatan, u c'ojol ri Saje aj arar;

³⁵ Ahiam, u c'ojol ri Sacar, xukuje' aj arar; Elipal, u c'ojol ri Ur;

³⁶ Heper, aj mequerat; Ahiy, aj pelon;

³⁷ Hezray, aj Carmel; Naaray, u c'ojol ri Esbay;

³⁸ Joel, rachalal ri Natan; Mibar, u c'ojol ri Hagray;

³⁹ Selec, aj amon; Naharay, aj Berot, u c'al tak u ch'ojibal ri Joab, ral ri Sarb;

⁴⁰ Ira, aj Jatir; Gareb, xukuje' aj Jatir;

⁴¹ Uriy, aj hitit; Zabad, u c'ojol ri Alay;

⁴² Adin, u c'ojol ri Siz, aj ruben, c'amal qui be ri aj ruben, xukuje' juwinak lajuj achijab ri xerachilaj;

⁴³ Hanan, u c'ojol ri Maac; Josapat, aj mitnit;

⁴⁴ Uziy, aj Astarot; Sam xukuje' ri Jehiel, e u c'ojol ri Hotam, aj Aroer;

⁴⁵ Jediael, u c'ojol ri Simri, xukuje' ri Joha ri rachalal, aj tizit;

⁴⁶ Eliel, aj Mahanaim, Jerebay xukuje' ri Josabiy, e u c'ojol ri Elnaam; Itma, aj moab;

⁴⁷ Eliel, Obed xukuje' ri Jaasiel, aj Soba.