Nabe Samuel 9 - Quiché Bible

Ri Saul copan ruc' ri Samuel

¹ Chupam ri ramak' ri Benjamin c'o jun achi Sis u bi'. Ri u tat ri Sis are' ri Abiel. Ri u tat ri Abiel are' ri Zeror. Ri u tat ri Zeror are' ri Becorat. Ri u tat ri Becorat are' ri Api. Ri Sis are jun achi ri sibalaj nim quil wi,

² c'o c'u jun u c'ojol, c'ä c'ojol ri sibalaj utz cäpetic, Saul u bi'. Man c'o ta chi c'u jun aj israel ri sibalaj ta je'l cäpetic jacha' ri are', man c'o ta jun achi ri coc'ow ta puwi' ri u teleb.

³ C'o jun k'ij, xesach ri e ati'tab tak u bur ri Sis, xubij c'u che ri Saul ri u c'ojol: “Chasuc'umaj awib chac'ama' bic jun chque pataninelab jät che qui tzucuxic ri ati'tab tak bur.”

⁴ Ri Saul xbec, xoc'ow pa ri rulew ri Eprain ri c'ache'laj, xoc'ow c'u pa tak ri rulew ri Salis; man xeburik taj ri ati'tab tak bur. Xoc'ow xukuje' pa ri rulew ri Saalim xukuje' pa ri rech ri Benjamin, mawi c'u ne xeburiko.

⁵ Aretak xopan pa ri rulew ri Zup, xubij ri Saul che ri pataninel ri achilaninak: “Chujtzelejok, are chi oquinak il ri' ri nu tat chke che qui q'uexwäch tak ri ati'tab tak bur.”

⁶ Ri pataninel xubij che: “Chupam we tinimit ri' c'o jun k'axal tzij sibalaj nim u k'ij cumal conojel ri winak, ronojel ri cuya' u bixic kas je cäc'ulmatajic. Jo' chila', craj ne cubij ri be chke ri takal u takexic kumal.”

⁷ “Jo' ba',” xcha' ri Saul. “¿Jas ta ri cakac'am bic che we tata' ri'? Mawi ne c'o chic ka wa chupam ri ka c'olbal. Man c'o ta jas ri quekaya' ta che ri k'axal tzij.”

⁸ Ri pataninel xubij che: “C'o jun alaj sak puak wuc'. Kaya' wa' che ri k'axal tzij rech cubij ri be chke.”

⁹ (Sibalaj ojer, aretak c'o jun aj israel cäraj cäretamaj ri cubij ri Dios, je cubij wa: “Jo' che rilic ri cäca'y pa che' pa abaj”; are c'ut ri cäbinax “k'axal tzij” che camic, ojer ulok “caca'y pa che' pa abaj” cuchi'xic.)

¹⁰ “Utz quinta' ri cabij,” xcha' ri Saul. “Jo' ba' chila'.” Qui cabichal xquitakej ri be ri cäbe pa ri tinimit jawije' ri c'o wi ri k'axal tzij,

¹¹ aretak cätajin quepaki' cho ri pakapic, ri copan pa ri tinimit, xequic'ulaj jujun alitomab ri e petinak che u c'amic qui ja', xequic'ot c'u qui chi': “¿La cujcuinic cakarik ri cäca'y pa che' pa abaj waral?”

¹² Ri alitomab xquibij chque: “Je', quixbin chi c'u na apan jubik'. Jix aninak, ulinak c'u pa ri tinimit rumal rech chi camic coc'owisax ri u ya'ic ri tabal tok'ob pa ri k'ijilabal.

¹³ Xak c'u xuwi quixopanic chitzucuj chila', c'ä majok cabe pa ri k'ijilabal che ri wa'im. Man quewa' ta ri winak c'a copan na ri are', are c'u cätewichi'n na ri tabal tok'ob, c'äte ri' cuya' quewa' ri e ulam. Rumal ri' jix chanim, quirika' c'u na pa we jok'otaj ri'.”

¹⁴ Xquitakej c'u pakalem, che copanem pa ri tinimit. Kas c'u aretak xenakajin che, ri Samuel u takem chic jun be che u bic pa ri k'ijilabal.

¹⁵ Jun k'ij c'ut c'ä majok chopan ri Saul, ri Ajawaxel u bim chi apan che ri Samuel:

¹⁶ “Je jok'otaj wa' chwek, quintak na ulok jun achi aj Benjamin awuc', ri catas na che u k'atal tzij ri nu tinimit Israel. Are' quesan na pa qui k'ab ri aj pilisteyib, elinak nu c'u'x che ri nu tinimit aretak e opaninak tak ri qui ch'abal chnuwäch.”

¹⁷ Aretak ri Samuel xril ri Saul, ri Ajawaxel xubij che: “Are achi wa' ri xinbij chawe. Are wa' ri cäk'atow na tzij puwi' ri nu tinimit.”

¹⁸ Opaninak chi c'u chuchi' ri tinimit, ri Saul xkeb ruc' ri Samuel xubij c'u che: “Bana' la tok'ob, bij la chwe jawije' c'o wi ri rachoch ri achi ri cäca'y pa che' pa abaj.”

¹⁹ “In ri' ri cäca'y pa che' pa abaj,” xcha' ri Samuel. “Chatpakal chnuwäch pa ri k'ijilabal, chatwok c'u wuc' camic chila'. Chwek ak'ab quintzelej c'u na u bixic chawe ronojel ri cac'ot wi na nu chi', catintzokopij c'u na bic.

²⁰ E are' tak c'u ri ati'tab tak bur ri e oc'owinak chi oxib k'ij e sachinak, matoc il chque e riktajinak chic. Ronojel c'ut ri sibalaj rayibal u wäch pa Israel cawechbej na at xukuje' ri e awachalaxic.”

²¹ Ri Saul xutzelej u bixic: “¡Ri in, in aj ramak' ri Benjamin, ri ch'utin na chquixo'l ri aj israelib! Ri e wachalaxic are ri sibalaj man nimak ta qui k'ij chquixo'l ri aj ramak' ri Benjamin. ¿Jas c'u che cäbij la ronojel wa' chwe?”

²² Ri Samuel xuc'am c'u bic ri Saul xukuje' ri pataninel rech, xebucoj pa ri nimalaj ja, xuya' c'ut ri c'olbal chque ri sibalaj nim u k'ij chquixo'l ri e c'o pa ri nimalaj ja, craj ne e c'o juwinak lajuj (30).

²³ Ri Samuel xubij che ri banal wa: “Chac'ama' ulok ri jubik' ti'j ri xinjach pa k'ab ri xinbij chawe chi cataso.”

²⁴ Ri banal wa xresaj ulok jun tz'akatalaj ra' chij xucoj c'u chuwäch ri Saul. Xubij c'u ri Samuel che: “Are wa' ri tasom can chawe. Chachapa' chatwok, in c'u xintasow can wa' chawe che we k'ijol ri' ri xeben wula'j ri tinimit.” Ri Saul xwa' ruc' ri Samuel pa ri k'ij ri'.

²⁵ Aretak xekaj ulok pa ri tinimit qui petic pa ri k'ijilabal, xsuc'umax jun ch'at che ri Saul puwi' ri u cawik ja,

²⁶ xk'oyi' c'u ri Saul. Chucab k'ij ri Samuel xusiq'uij ri Saul puwi' ri u cawik ja xubij c'u che: “Chatwalijok, rech catinjach bic.” Xwalij ri Saul. Qui cabichal c'ut xebel bic pa ri be;

²⁷ aretak xebel bic chrij ri tinimit, ri Samuel xubij che ri Saul: “Chabij che ri pataninel awech chi chnabejok, are c'u ri at chaweyej na jubik', quinya' c'u na u bixic chawe ri u bim ri Dios chwe.”