Nabe Samuel 28 - Quiché Bible

¹ Pa tak ri k'ij ri', ri aj pilisteyib xequimulij ri cajch'ojab che u banic ch'o'j ruc' ri Israel, xubij c'u ri Aquix che ri David: “Kas ba' chawetamaj chi ri at xukuje' ri awachijab quebe na wuc' pa ri ch'o'j.”

² Ri David xutzelej u bixic che: “Utz ri'. Camic quil na la ri cacuin we pataninel ech la ri' che u banic.” “We jeri',” xcha' ri Aquix che ri David, “catincoj che qui nimal ri e chajil wech joropa' k'ij quinc'asi'c.”

Ri Saul cabe ruc' ri ch'obonel pa Endor

³ Pa tak ri k'ij ri' cäminak chic ri Samuel conojel c'ut ri pa Israel cok'em ri u cämical, aretak c'u xbantaj wa' qui mukum chic pa Rama, are c'u kas u tinimit wa'. Ri Saul, e resam chi bic pa ri ulew ri ch'obonelab xukuje' ri quetzijon cuc' cäminakib.

⁴ Ri aj pilisteyib xquimulij quib xequiya' c'u quib pa Sunem che u banic ch'o'j, ri Saul xumulij ronojel ri Israel xequiya' quib pa Jilbo.

⁵ Aretak c'u xril ri qui kajbem ri aj pilisteyib, xuxe'j rib xoc ri xe'n ib pa ranima'.

⁶ Xutz'onoj c'u u no'j che ri Ajawaxel, ri Ajawaxel man c'o ta xutzelej u bixic che mawi pa u waram mawi rumal Urim, mawi cumal e k'axal tzij.

⁷ Rumal ri' xuya' takanic chque ri e rach k'atal tak tzij, xubij chque: “Chitzucuj jun ixok ri cätzijon cuc' cäminakib rech quenbana' jun ch'obonic ruc'.” Ri e rach k'atal tak tzij xquitzelej u bixic che: “C'o jun pa Endor ri cätzijon cuc' cäminakib.”

⁸ Ri Saul xujalwächij rib, xebucoj jule' tak atz'iak chic, xachilax bic cumal quieb achijab xbe chak'ab cho rachoch we ixok ri'. Xubij c'u che: “Quintz'onoj jun tok'ob chawe chi chach'obo' ri quintaklebej na, chabana' c'ut chi chpet ri uxlabal ri quinbij chawe.”

⁹ Ri ixok xutzelej u bixic: “At aweta'm ri u banom ri Saul, chi e resam bic pa ri ulew ri ch'obonelab xukuje' ri quetzijon cuc' cäminakib. ¿Jasche quinanim pa jun jasach ri quincämisax u mac rech?”

¹⁰ Ri Saul xuban ri chi'nic ri kas cäban na pa ri u bi' ri Ajawaxel, xubij che: “Quinban ri chi'nic ri kas cäban na pa ri u bi' ri Ajawaxel chi man c'o ta jun c'ax cac'ulmaj na rumal wa'.”

¹¹ “¿Jachin ri cawaj quinbano chi capetic?” xcha' ri ixok. “Chasiq'uij ri Samuel chwe,” xcha' ri Saul.

¹² Ri ixok xak c'ätetal xril ri Samuel, xuya' c'u jun rakoj chi'aj; ri ixok xubij c'u che ri Saul: “¿Jasche in subum la? ¡Lal ri' ri lal Saul!”

¹³ Xubij c'u ri ajawinel che: “Maxe'j awib. ¿Jas ri awilom?” “Quinwil jun dios ri cätajin quel ulok chupam ri ulew,” xcha' ri ixok.

¹⁴ Ri Saul xuc'ot u chi' ri ixok xubij che: “¿Jas ri u bantajic?” “Jun tata' nim winak, u bak'atim rib pa jun u k'u',” xcha' ri ixok. Ri Saul xuch'ob c'ut chi are' ri Samuel, xumej rib c'a xukasaj ri u palaj cho ri ulew.

¹⁵ Xubij c'u ri Samuel che: “¿Jasche a yo'm latz' chwe, xaban c'u chwe chi xinpetic?” Ri Saul xutzelej u bixic: “Xa' sibalaj in ch'ibatajinak, quech'ojin ri aj pilisteyib wuc', in u wonobam c'u can ri Dios. Man c'o ta chi cutzelej u bixic chwe mawi cumal ri k'axal tak tzij mawi cumal ichic'. Rumal ri' lal nu siq'uim, rech cäbij la chwe ri rajawaxic quinbano.”

¹⁶ Ri Samuel xutzelej u bixic che: “¿Jasche caban c'otoj chi'aj chwe, we at u wonobam chi can ri Ajawaxel, uxinak chi a c'ulel?

¹⁷ Ri Ajawaxel u banom chawe ri xuya' u bixic chawe wumal in. U tokim ri ajawinic pa a k'ab u jachom c'u che ri awachil ri David.

¹⁸ Man xatz'akatisaj taj u banic ri xatutak wi che u sachisaxic qui wäch ri aj amalesib. Rumal ri' je u banom ri Ajawaxel wa' chawe camic.

¹⁹ Ri Ajawaxel, quebujach c'u na ri aj israelib xukuje' ri at pa qui k'ab ri pilisteyib, chwek c'ut ri at xukuje' ri e a c'ojol quixelc'ol na wuc'. Xukuje' cuban na ri Ajawaxel chi ri ajch'ojab aj israelib quekaj na pa qui k'ab ri aj pilisteyib.”

²⁰ Xak c'u c'ätetal xtzak ri Saul cho ri ulew sibalaj c'u jutelaj. Sibalaj c'u xuxe'j rib chque tak ri u tzij ri Samuel, rumal c'u ri' xtuktubic. Xak c'u xurik chi rib chrij, man c'o ta u tijom che ri jun k'ij mawi che ri jun ak'ab.

²¹ Aretak xril ri ixok chi ri Saul man cuya' ta chi sak che, xkeb ruc' xubij c'u che: “We pataninel ech la ri' oquinak il che ri tz'onon la che. Xinya' c'u ri nu c'aslemal pa cämical, nu nimam u banic ri xbij la chwe.

²² Quinbochi'n c'u che la camic chi chbana' la ri quinbij che la: quincoj jubik' wa chwäch la, rech cäc'oji' chuk'ab la che u takexic ri be la.”

²³ Ri Saul man craj taj cäwa'ic, ri e rach k'atal tak tzij xukuje' ri ixok sibalaj xquicoj na qui chuk'ab che rumal c'u ri' xunimaj na. Xwalij c'u cho ri ulew xt'uyi c'u puwi' jun ch'at.

²⁴ Ri ixok xupilaxtaj c'u jun alaj chom ama' wacax ri c'o cho rachoch, xuyok' c'u c'äj rech quebuchak'ajisaj lej, ri man yo'm ta ch'am cuc'.

²⁵ Xebucoj c'u chuwäch ri Saul xukuje' ri e rach k'atal tak tzij aretak c'u xtij taj wa' cumal, xewalijic, xquitakej ri qui be pa ri chak'ab ri'.