Nabe Samuel 27 - Quiché Bible

Ri David xk'ax pa ri culew ri pilisteyib

¹ Cuchomaj ri David: “We mata'm o chanim ri Saul quinucämisaj na. Rumal ri' ri utz na ri quinbano are ri wanimajic quinbe pa ri culew ri pilisteyib, rech man cuya' ta chi latz' ri Saul chwe, man quinutzucuj ta chi c'ut pa ronojel ri ulew re Israel. We je quinban wa' quinto'taj na man quinkaj ta na pu k'ab.”

² Ri David xukuje' ri wakib sient (600) rachijab ri e teren chrij xquitakej qui be che u jachic quib pu k'ab ri Aquix, u c'ojol ri Maoc ri ajawinel ri c'o pa Gat.

³ Ri David xukuje' ri achijab ri e c'o ruc' xejeki' pa Gat, ruc' ri Aquix, chquijujunal cuc' ri quixokil ri calc'ual. Ri David xebuc'am bic ri quieb rixokil: ri Ahinoam ri quel pa Jezreel, xukuje' ri Abigail, ri u malca'n ri Nabal, ri quel pa Carmel.

⁴ Aretak xretamaj ri Saul chi ri David xanimajic xbe pa Gat, xutanaba' u tzucuxic.

⁵ Xubij ri David che ri Aquix: “We ri lal wajaw, caj la catok'obisaj la nu wäch, ya' la c'olbal chwe quinjeki' pa jun chque ri tinimit re we ulew ri', man ya'tal ta c'ut chi we pataninel ech la ri' wajaw cajeki' uc' la pa ri tinimit ajawibal.”

⁶ Kas pa ri k'ij c'ut ri', ri Aquix xuya' ri tinimit Siclag che. Rumal ri' c'a camic, ri Siclag u tz'akatil ri ajawibal pa Juda.

⁷ Ri David xjeki' jun junab ruc' quiejeb ic' pa ri culew ri pilisteyib.

⁸ Quel c'u bic che qui ch'äquic ri winak ri e c'o pa Jesur, pa Jezer xukuje' pa Amalec, ri e c'o pa ri ulew ri', pa Telaim, che u suq'uil ri Xur, c'a pa Ejipt.

⁹ Quebuch'äc c'ut ri winak ri e c'o pa ri ulew ri' conojel quebucämisaj chi achijab chi ixokib. Quebuc'am c'u ne bic ri chij, ri wacax, ri bur, ri camey xukuje' c'u ne tak ri atz'iak. Copan c'u ruc' ri Aquix,

¹⁰ cäc'ot c'u u chi' rumal wa', cubij che': “¿Jachique tinimit a ch'äcom camic?” Ri David cutzelej u bixic che: “Pa ri u mox k'ab ri Juda, o pa ri u mox k'ab ri Jerameel, o pa ri u mox k'ab ri culew ri aj quenitab.”

¹¹ Ri David man quebuc'asba' ta can achijab mawi ixokib, rech ma ta c'o jun cabe pa Gat che u bixic chque ri e c'o chila' jas ri cuban ri David. Ronojel ri k'ijol ri xc'oji' pa ri culew ri pilisteyib je xuban wa'.

¹² Ri Aquix xujiquiba' u c'u'x chrij ri David, cuchomaj c'ut: “Ri David cätajin quetzelax u wäch rumal ri Israel, cacanaj c'u wa' che pataninel wech amak'el.”