Nabe Samuel 21 - Quiché Bible

Ri David canimaj u bic chuwäch ri Saul

¹ Ri David xbe pa Nob, che rilic ri cojol tabal tok'ob Ahimelec, ri sibalaj xmayinic xel ulok che u c'ulaxic, xubij c'u che: “¿Jas u banic wa' chi at petinak a tuquiel, ri mawi jun at achilaninak?”

² Ri David xutzelej u bixic che: “Ri ajawinel in u takom che rilic jun jasach, u bim chwe chi ma ta c'o jun quetamanic jas ri in u takom wi, mawi quetamaxic jachique tak ri takanic ri e wuc'am ulok. Are c'u ri achijab ri e c'o chuxe' ri nu takanic, e nu takom pa jun c'olbal chic.

³ Are c'u ri quinbij che la, ¿jas ri c'o uc' la ri takal u ya'ic chwe? Chya' la job rakan caxlanwa chwe o ri e c'o uc' la.”

⁴ Ri cojol tabal tok'ob xutzelej u bixic che: “Ri caxlanwa ri c'o wuc' man xak ta apachique caxlanwa, xane' tasom. Quinya' c'u chawe, we ri awachijab man e qui nakom ta ixokib.”

⁵ Ri David xubij che ruc' jicomal: “Jas ri cakaban amak'el aretak cujel bic che u banic ch'o'j, man e ka nakom ta ixokib. Pune' c'u jalan chi wa' ri ka be re camic, ri wachijab e ch'ajch'oj chic aretak xujel ulok, sibalaj c'u e ch'ajch'oj na camic.”

⁶ Are' c'u ri cojol tabal tok'ob xujach ri caxlanwa che, ri tasom. Man c'o ta chi jun jasach chila', xuwi ri caxlanwa ri tasom che ri Ajawaxel, ri e esam pa ri k'ij ri' puwi' ri porobal, rech cacoj ri mak'in caxlanwa, pa ri u c'olbal.

⁷ Pa ri k'ij ri' c'o jun chque ri rajchaquib ri Saul, ri rajawaxic cacanaj na can pa ri k'ijilabal. Jun aj Edom ri Doeg u bi', c'amal qui be ri rajyuk'ab ri Saul.

⁸ Ri David xubij che ri Ahimelec: “¿La man c'o apan jun tz'imaj ch'ich' uc' la o jun ch'ich' re ch'o'j? Sibalaj aninakil ri u takanic ri ajawinel chi man xc'amtaj ta chi ulok ri nu ch'ich' re ch'o'j mawi ri jule' tak nu ch'ojibal chic.”

⁹ Ri cojol tabal tok'ob xutzelej u bixic che: “Je'. C'o ri u ch'ich' re ch'o'j ri Goliat, ri aj pilistey ri xacämisaj pa ri beya' ri c'o pa Ela. C'o chila' chrij ri atz'iak nim u k'ij, pistal pa jun atz'iak. Cuya' cac'am bic, we cawaj; niq'uiaj ch'ojibal chic man c'o ta wuc'.” Ri David xutzelej u bixic: “Man c'o ta chi jun ri utz ta na. Ya' la chwe.”

¹⁰ Kas pa ri k'ij ri' ri David xuchaplej animajic chuwäch ri Saul, xujacha' rib pu k'ab ri Aquix, ajawinel pa Gat.

¹¹ E are c'u ri rach k'atal tak tzij ri Aquix, xquibij che: “¡Are ya' David wa' ri pataninel rech ri Saul, ri ajawinel pa we ulew ri'! ¡Are wa' ri cabixox pa tak ri bix: ‘Jun mil (1,000) achijab xebucämisaj ri Saul, lajuj mil (10,000) c'ut xebucämisaj ri David!’ ”

¹² Ri David sibalaj xoc il chque ri xebixic, xuxe'j c'u rib chuwäch ri Aquix, ri ajawinel re Gat.

¹³ Rumal c'u ri', xuq'uex ri utzalaj u banic chquiwäch, xuban rib chi ch'u'j quebutz'ibaj tak ch'ococh'ak tak jastak chuwäch tak ri uchi'ja xuya' c'u c'olbal chi cabejej ri u c'axaj chrij ri rismachi'.

¹⁴ Xubij c'u ri Aquix chque ri rach k'atal tak tzij: “We quiwilo chi ch'u'j we achi ri', ¿jasche xic'am ulok chnuwäch?

¹⁵ ¿La xa c'o qui patan ch'ujab chwe, chi xic'am ulok wa' waral rech cuban ri u ch'ujilal pa ri wachoch?”