Nabe Samuel 2 - Quiché Bible

Ri u bix ri Na'

¹ Ri Na' je u banic ch'awem wa' xuban ruc' ri Dios: “Ajawaxel ruc' ronojel wanima' quinquicot umal la e yo'm c'u la c'ac' tak nu chuk'ab. Quincuinic quink'atij qui wäch ri quinquic'ulelaj in c'u to'm la. ¡Quinjajat c'ut!

² ¡Man c'o ta jun ri tastal taj ri man cuban ta etzelal jacha' ri lal, Ajawaxel! ¡Man c'o ta jun cuya' ta to'banic jacha' ri lal, ka Dios! ¡Man c'o ta chi jun we ta ma ta xuwi ri lal!

³ Mach'aw jachin jun ruc' nimarisan ib, sibalaj muban nimal jachin jun, rumal rech chi ri Ajawaxel are ri Dios ri reta'm ronojel, ri are' cupajo xukuje' cuk'at tzij puwi' ri cuban ri winak.

⁴ Ri are' quebuk'ajisaj tak ri qui q'uiakbal ch'ab ri e c'o nimak tak qui chuk'ab, che' c'u nimalaj qui chuk'ab ri tukarib;

⁵ Ri sibalaj oc'owinak ulok u wi' ri cäquitijo, camic cäquiya' quib pa moquic xa rumal u rikic juba' wa; e are' c'ut ri c'o quinumic, man quenum ta chic. Ri ixok ri man cäcuin taj quec'oji' ral, wukub mul alc'ualinak chic; are c'u ri sibalaj calc'ualanic, camic xa jumul xyututiric.

⁶ Ri Ajawaxel caresaj ri c'aslemal xukuje' cuya'o; cujukasaj pa ri mukubal cuban c'ut chi cujpaki ulok.

⁷ Ri Ajawaxel cuban meba' chke o k'inom; cuban chke chi cujtzakic cujuwalijisaj c'ut,

⁸ ri Dios cuwalijisaj ri meba' pa ri ulew cäresaj c'ut ri molonel chupam ri tixbal mes, che u t'uyubaxic chquixo'l ri nimak tak achijab cuya' c'u che chi cäya' pa jun c'olbal ri nim u k'ij; rumal rech chi ri Ajawaxel are ajchak'e ri e u tiq'uilibal ri uwächulew, paquiwi' c'u xuya' wi ri uwächulew.

⁹ Ri Are' cuchajij ri qui be ri e jic, are c'u ri itzel tak winak quecäm pa ri k'ekumalil, man c'o ta c'u jun cäch'äcan rumal ri u chuk'ab.

¹⁰ Ri Ajawaxel cuban na ch'akatak chque ri quec'ulelan che, pa ri caj quebutak wi ulok cakulja paquiwi'. Ri Ajawaxel cuk'at na tzij puwi' ronojel ri uwächulew; cuya' na cuinem pu k'ab ri ajawinel ri u cha'om, cuban c'u na chi cäq'uiy ri u cuinem.”

¹¹ Xtzelej ri Elcan xbe cho rachoch pa Rama, are c'u ri ac'al xcanaj can che u patanixic ri Ajawaxel chuxe' ri u takanic ri Eli, ri cojol tabal tok'ob.

Ri quetzelal ri e u c'ojol ri Eli

¹² Ri e u c'ojol ri Eli e itzel tak achijab, man nim ta c'u cäquil wi ri Ajawaxel

¹³ mawi ri qui patanijic che ri u cojic ri tabal tok'ob ri caquiya' ri winak; aretak c'u c'o jachin cuchi'j tabal tok'ob, copan ri pataninel rech ri cojol tabal tok'ob ruc'am jun tz'imaj ch'ich' pu k'ab, kas aretak cätajin cächak'aj ri ti'j,

¹⁴ cunim ri tz'imaj ch'ich' chupam ri tzacbal ti'j, chupam ri t'uy, chupam ri t'uy re ch'ich' o chupam ri casue'l, ronojel c'u ri cäresaj ulok ruc' ri tz'imaj ch'ich' are wa' ri rech ri cojol tabal tok'ob. Je cäquiban wa' chque conojel ri aj israelib ri quebopan pa Sil.

¹⁵ C'ä majok c'u ne chporox ri xepo puwi' ri porobal, copan ri pataninel rech ri cojol tabal tok'ob cubij che ri cuchi'j ri tabal tok'ob: “Chaya' bic ti'j chwe rech quinsa' che ri cojol tabal tok'ob; man cuc'am ta c'ut ri tzacom ti'j chawe, xane' räx.”

¹⁶ We c'u ri winak cubij che rajawaxic nabe cuporoj na ri xepo, c'äte c'u ri' cuya' cuc'amo jachique ri craj, ri tako'n cutzelej u bixic: “¡Jayi', kas caya' wi na chwe chanim, we man caya' quintokij bic chawe!”

¹⁷ Je c'u ri', sibalaj c'axalaj mac ri cäquiban we alabom ri' chuwäch ri Ajawaxel, man nim ta c'u quequil wi ri tabal tak tok'ob ri queya' che ri Ajawaxel.

¹⁸ Are c'u ri ala Samuel, u cojom jun atz'iak nim u k'ij re lino, u takem pataninic chuwäch ri Ajawaxel.

¹⁹ Chujunab aretak copan ri u nan pa ri rachoch Dios, rachil ri Elcan, che u chi'xic ri tabal tok'ob, cuc'am bic jun alaj atz'iak ri u banom che ri Samuel.

²⁰ Cäpe c'u ri Eli cutewichi'j ri Elcan xukuje' ri rixokil, jewa' cubij chque: “Ri Ajawaxel chuya' rajil u q'uexelal chiwe chebuya' c'u a c'ojol we ixok ri', che u q'uexwäch ri u jachom che u patanixic ri Ajawaxel.” Aretak c'u cätz'akat u banic ronojel quetzelej cho cachoch,

²¹ ri Ajawaxel cutewichi'j ri Na', cacanaj yawab winak. Je c'u ri' ri Na' xeralaj oxib ral alabom xukuje' quieb alitomab, are c'u ri ala Samuel u takem q'uiyem chuwäch ri Ajawaxel.

²² Are c'u ri Eli sibalaj nim winak chic, reta'm c'u ronojel ri cäquiban ri u c'ojol chque ri aj israelib, quek'oyi c'u ne cuc' tak ri ixokib ri quepatanij chuchi' ri Lic'om Rachoch ri Dios re rikoj ib.

²³ Rumal c'u ri' xubij chque: “Conojel ri winak cäquibij chwe conojel ri itzel tak banoj ri quibano. ¿Jasche je quiban wa'?

²⁴ Jayi', nu c'ojol tak, mawi jubik' man utz taj ri nu tom u tzijol, ri cutzijoj ri u tinimit ri Ajawaxel chiwij.

²⁵ We jun winak cämacun chrij jun winak chic, ri Ajawaxel cuya' cuto' we winak ri'; we jun winak cuc'ulelaj ri Ajawaxel, ¿jachin ta ri cato'w u wi'?” Man xquinimaj ta c'ut ri xubij ri qui tat chque, u chomam chi c'u ri Ajawaxel resaxic ri qui c'aslemal.

²⁶ Are' c'u ri ala Samuel ri u takem q'uiyem, ri u c'aslemal cäkaj chuwäch ri Ajawaxel xukuje' chquiwäch tak ri achijab.

²⁷ Pa we k'ijol ri' xopan jun k'axal tzij che u solixic ri Eli, xubij c'u che: “Ri Ajawaxel u k'alajisam ri quintakej u bixic: ‘Aretak ri e a mam e c'o pa Ejipt che u patanixic ri ajawinel, chisakil xinc'ut wib chquiwäch.

²⁸ Xebencha' c'u chquixo'l conojel ri camak' ri aj Israel rech quebux na e nu cojol tabal tok'ob, rech quequichi'j tabal tak tok'ob ri quechajirisaxic puwi' ri nu porobal, xukuje' quequiporoj c'u na c'oc' k'ol, caquicoj ri catz'iak ri nim u k'ij chnuwäch. Xinya' c'u xukuje' chque ri e i mam conojel tak ri sipanic ri quequiporoj tak ri aj israelib che u ya'ic u k'ij ri Ajawaxel.

²⁹ ¿Jas che man nim ta quebiwil wi ri tabal tak tok'ob xukuje' tak ri sipanic ri nu yo'm takanic chi quebanic? ¿Jasche are nim quebawil ri a c'ojol chnuwäch in, cätajin quebak'obisaj ruc' ri quitijic conojel ri qui sipanic ri e utz na ri quequiya' ri aj israelib ri nu tinimit?

³⁰ Rumal c'u ri' ri Ajawaxel, ri u Dios ri Israel, ri u bim ulok chi ri at xukuje' conojel ri e awachalaxic quepatanin na chuwäch amak'el, camic cuk'alajisaj: Mawi jubik' xak quinwilo chi je caban wa', xane' quinya' qui k'ij ri queyo'w nu k'ij, are c'u ri cäquetzelaj nu wäch queq'uis na pa yok'ic. In, ri Ajawaxel quinjiquiba' u bixic.

³¹ Cäketet ri jok'otaj ri quinsachisaj u wäch ri a cuinem xukuje' ri quech ri e a mam, mawi c'u jun chque ri awachalaxic copan na cho ri u ri'jal.

³² Cawil na ruc' elemch'u'j xukuje' quiäk rayinic ronojel ri utzil ri quinban na pa Israel, mawi c'u ne c'o jun chque ri awachalaxic copan na cho ri u ri'jal.

³³ Quinya' c'u na jachin jun chque ri e awachalaxic chunakaj ri porobal, rech quecäm che quiäk rayinic xukuje' k'oxomal pa ri qui c'aslibal, conojel chi c'ut ri niq'uiaj awachalaxic xa quecämisax na.

³⁴ Cajwataj c'u wa' che c'utbal chawe ri caquic'ulmaj na ri quieb a c'ojol, ri Opni xukuje' ri Pinees: xa pa jun k'ij qui cabichal quecäm na.

³⁵ Quincoj c'u na jun cojol tabal tok'ob ri ya'tal u jiquibaxic c'uxaj chrij cuban na jas ri nu rayinic xukuje' ri nu chomanic, ri quinya' jun rija'lil ri cataken na quinban c'u na che chi cac'oji' che u patanixic ri ajawinel ri quincha' na.

³⁶ Apachin ta c'u ne ri cäc'asi can chque ri awachalaxic cäpe na culumeja' na rib chuwäch che u tz'onoxic jun u puak re sak puak o juba' u caxlanwa, cutz'onoj tok'ob che chi chuya' jun u chac chquixo'l ri e cojol tabal tok'ob che u ch'äquic ri cutijo.’ ”