Nabe Samuel 16 - Quiché Bible

Xtas ri David che ajawinel

¹ Ri Ajawaxel xubij che ri Samuel: “¿C'ä jampa' lo catanaba' u bisoxic ri Saul? Man quinwaj ta chic cutakej ajawinic pa Israel. Jät, chanojisaj ri u c'a' che aseit, are c'u quinwaj chi catbe cho rachoch ri Isayi, ri aj Belen, xcha'taj jun u c'ojol wumal rech cäcanaj che ajawinel.”

² “¿Jas lo quinban che nu bic?” xcha' ri Samuel. “We cäretamaj ri Saul, quinucämisaj na ri'.” Ri Ajawaxel xutzelej u bixic che: “Chac'ama' bic jun alaj ati't wacax chabij chi caya' che tabal tok'ob chnuwäch,

³ chawula'j c'u ri Isayi rech cac'oji' awuc' aretak cachi'j ri tabal tok'ob, quinbij c'u na chawe ri rajawaxic u banic awumal. Chatasa' che ajawinel jachin ri quinbij chawe.”

⁴ Ri Samuel xuban ri xtak wi rumal ri Ajawaxel. Aretak xopan pa Belen, ri nimak tak tatayib re ri tinimit xebel ulok che u c'ulaxic ruc' jubik' xe'n ib, xquic'ot c'u u chi', xquibij che: “¿La lal petinak pa jamaril?”

⁵ “Je wa',” xcha' ri Samuel. “Xinpe che u chi'xic jun tabal tok'ob che ri Ajawaxel, chich'ajch'ojirisaj iwib chiniwachilaj che u chi'xic ri tabal tok'ob.” Ri Samuel xuch'ajch'ojisaj ri Isayi xukuje' ri e u c'ojol, xerula'j c'u che u tijic ri tabal tok'ob.

⁶ Aretak xebopanic, ri Samuel xtake u wäch che ri Eliab xuchomaj c'ut: “Are ba kas achi wa' ri xucha' ri Ajawaxel rech cacanaj che ajawinel.”

⁷ Xubij ri Ajawaxel che: “Are maya' a wäch che ri u wächbal mawi che ri u nim rakan, wetzelam u wäch wa'. Man are ta cäya' u k'ij ri cäril ri winak; ri winak are cuya' u wäch chque tak ri wächbal, are c'u ri in are quinya' nu wäch che ri anima'.”

⁸ Xpe c'u ri Isayi xusiq'uij ri Abinadab, xutac'aba' chuwäch ri Samuel; xubij c'u ri Samuel: “Mawi are ta wa' ri cha'tajinak rumal ri Ajawaxel.”

⁹ Ri Isayi xutac'ab chic ri Sam; xubij c'u ri Samuel: “Mawi ne are' wa' ri chatajinak rumal ri Ajawaxel.”

¹⁰ Ri Isayi xebutac'aba' ri wukub u c'ojol chuwäch ri Samuel, xubij c'u na ri Samuel che chi mawi jun chque cha'tajinak rumal ri Ajawaxel.

¹¹ Xuc'ot u chi' chuq'uisbalil, xubij c'u ri Samuel che: “¿A ma ta e c'o chic niq'uiaj a c'ojol?” “Are craj na ri ch'utin na, are cachajin ri tzobaj,” xcha' ri Isayi. “Chataka' u tzucuxic,” xcha' ri Samuel, “man cäkachaplej ta c'u na ri k'ijilanic c'ä cul na ri are'.”

¹² Xtak c'u u siq'uixic rumal ri Isayi. Ri ala sibalaj quiäk u k'o'tz, c'amel xukuje' sibalaj utz ri u ca'yebal. Xubij c'u ri Ajawaxel che ri Samuel: “Are wa'. Chatwalij ba' chatasa' che ajawinel.”

¹³ Xuc'am c'ut ri Samuel ri u c'a' ri c'o aseit chupam, xutas ri c'ojol ala chquiwäch conojel ri e rachalal jacha' che ajawinel, ri cabinax David. Pa we jok'otaj ri', ri ruxlabal ri Ajawaxel xk'ijin puwi' ri David. Xwalij c'u ri Samuel xtzelej pa Rama.

Ri David xoc che u patanixic ri Saul

¹⁴ Are c'u ri Ruxlabal ri Ajawaxel u tasom chi rib che ri Saul, jun itzel uxlabal c'ut takom rumal ri Ajawaxel, cäbanow c'ax che.

¹⁵ Rumal ri' ri e c'o che u patanixic xquibij che: “¿Jacha' ri quil la, kajaw, jun itzel uxlabal ri takom rumal ri Dios cätajin cuban c'ax che la?

¹⁶ Rumal ri', ya' la takanic chque we pataninel tak ech la ri' chi chquitzucuj jachin jun ri reta'm rok'isaxic arp, rech aretak cuban c'ax ri itzel uxlabal che la, chrok'isaj ri arp cäto'taj c'u na la jubik'.”

¹⁷ “Chitzucuj ba jachin jun ri kas utz cäk'ojomanic, chic'ama' ulok wuc',” xcha' ri Saul.

¹⁸ Jun c'ut chque xubij: “In wilom chi jun chque ri u c'ojol ri Isayi, ri aj Belen, sibalaj reta'm cäk'ojomanic; xak c'u u tz'akat chic, chi jun cowilaj ajch'o'j, sibalaj cuchomaj na ri cubij; sibalaj je'lic ri u ca'yebal c'o c'ut ri u to'banic ri Ajawaxel ruc'.”

¹⁹ Xebutak c'u bic tako'n ri Saul ruc' ri Isayi, rech quebix che: “Chataka' ulok ri a c'ojol David chwe, ri quechajin ri chij,”

²⁰ ri Isayi xutak bic ri David ri u c'ojol rech cabe cho rachoch ri Saul. Ri Isayi xutak bic che ri Saul jun bur rekam caxlanwa, jun tz'um u wa'l uva xukuje' jun alaj q'uisic'.

²¹ Jewa' ri ropanem ri David ruc' ri Saul, xcanaj che pataninel rech, sibalaj c'u xlok'ok'ex rumal ri Saul xucoj c'u che to'l rech.

²² Ri Saul xutak u bixic che ri Isayi, xubochi'j chi chuya' can ri David ruc', rumal rech chi sibalaj xkaj chuwäch.

²³ Aretak cäpe ri itzel uxlabal ri cuban c'ax che ri Saul, ri David cuc'am ri arp cuchap u k'ojomaxic. Ruc' wa' catzelej ri ranima' ri Saul pa u c'olbal, coc'ow ri c'ax che, cutas c'u rib ri itzel uxlabal che.