Nabe Samuel 15 - Quiché Bible

Ri Ajawaxel cuxutuj ri Saul

¹ C'o jun k'ij xubij ri Samuel che ri Saul: “Ri Ajawaxel xinutako rech catincoj che ajawinel pa Israel, ri u tinimit. Rumal ri' chatatabej jachique ri craj ri Ajawaxel cubij chawe.

² Jewa' cubij ri Ajawaxel ri c'o ronojel u cuinem: ‘Quinc'äjisaj qui wäch ri aj amalesib u mac rech ri xquiban che ri Israel, xquik'atij pa ri u be aretak u petic pa Ejipt.

³ Rumal ri', jät chabana' c'ax chque; chasachisaj qui wäch junam cuc' conojel ri jastak quech, matok'obisaj qui wäch. Chebacämisaj achijab xukuje' ixokib, ac'alab pune' c'äte xil qui wäch, ama'ib tak wacax, chij tak, cameyib tak xukuje' ati'tab tak bur.’ ”

⁴ Ri Saul xebusiq'uij ri winak xerajilaj pa Telaim. E quieb sient mil (200,000) achijab ri quebin che cakan xukuje' lajuj mil (10,000) achijab aj Juda.

⁵ Xbe c'u ri Saul che u suq'uil ri u tinimit ri Amalec xuya' rib chunakaj ri nima',

⁶ xubij chque ri aj quenitab: “Chitasa' iwib. Chixel bic chquixo'l ri aj amalesib, rech man quinsachisaj ta i wäch junam cuc' we winak ri'; ri ix utz xiban chque ri aj israelib aretak qui petic pa Ejipt.” Ri aj quenitab xebel chquixo'l ri aj amalesib.

⁷ Ri Saul xuchaplej qui cämisaxic ri aj amalesib kas pa Habil c'ä pa Xur ri c'o pa ri u c'ulbatil ri Ejipt, xch'äcan c'u paquiwi';

⁸ xkaj ri Agag pu k'ab c'aslic xak xuyutu ri cajawinel ri aj amalesib, xebucämisaj c'u conojel ri rajch'ojab.

⁹ Are' c'u ri Saul xukuje' ri e rajch'ojab xquic'asba' can ri Agag, man c'u xequicämisaj taj ri chij ri sibalaj e je'l na, mawi ri ama'ib tak wacax, mawi ri alaj ama'ib tak wacax ri sibalaj e chak' na, mawi ri ama'ib tak chij, mawi xquisachisaj qui wäch ri jastak ri pakal cajil, pune' c'u ne xquisachisaj qui wäch conojel ri man e c'o ta qui patan ri man pakal ta cajil.

¹⁰ Ri Ajawaxel xuch'abej c'ut ri Samuel, xubij che:

¹¹ “Quinbisonic chi xincoj ri Saul che ajawinel, rumal rech chi u tasom rib chwij man e u tz'akatisam ta ri nu takanic.” Ri Samuel man curik ta chic jas cubano, man xwar ta ronojel ri jun ak'ab xubochi'j c'u ri Ajawaxel.

¹² Chucab k'ij sibalaj ak'ab xwalijic rech cäbe che u c'ulaxic ri Saul, xbix che chi xbe pa Carmel, u walijisam c'u jun tz'ak chila' che natabal, xucoj c'ut ri u be, xutakej bic pa Jilgal.

¹³ Xbe c'u ri Samuel jawije' c'o wi ri Saul, xubij c'u wa' che: “Ri Ajawaxel chtewichi'n la. Xtz'akat c'ut ri u takanic ri Ajawaxel wumal.”

¹⁴ “¿Jas c'u qui banic tak ri' ri qui benic tak ri chij ri quinto xukuje' tak ri qui quewu'nic tak ri wacax ri cätajin quinto?” xcha' ri Samuel.

¹⁵ “E c'amom ulok pa Amalec,” xcha' ri Saul, “rumal rech chi ri winak man xequicämisaj taj ri je'licalaj tak chij xukuje' ri je'licalaj tak ama'ib tak wacax che qui chi'xic che tabal tak tok'ob che ri Ajawaxel ri Dios la. Ka sachom c'u qui wäch conojel ri niq'uiaj chic.”

¹⁶ “Chatz'apij u pa a chi' quinya' c'u na u bixic chawe ri xubij ri Ajawaxel chwe chak'ab,” je u tz'apixic u pa u chi' wa' xban rumal ri Samuel. “Ch'aw la,” xcha' ri Saul.

¹⁷ Ri Samuel xubij che: “¿La ma ta aweta'm chi man nim ta a k'ij? At uxinak c'u ne c'amal qui be ri amak' aj israelib, at u tasom c'u ri Ajawaxel che cajawinel ri aj israelib.

¹⁸ Je c'u ri', we are' ri Ajawaxel xattakow bic xuya' bic takanic chawe chi casachisaj qui wäch ri ajmaquib tak aj amalesib, xukuje' che qui banic c'ax chque c'ä caq'uis na tzij paquiwi'.

¹⁹ ¿Jasche man xebanimaj taj ri e u takanic, xbe c'u awanima' ruc' ri xtokix che ri c'ulel, xaban c'u ri etzelal chuwäch ri Ajawaxel?”

²⁰ Ri Saul xutzelej u bixic: “Ri in xebennimaj ri e u takanic ri Ajawaxel, xintz'akatisaj ri xinutak che u banic: xinyut ulok ri Agag, ri cajawinel ri aj amalesib, nu sachisam c'u qui wäch ri aj amalesib.

²¹ E are' c'u ri ajch'ojab xquiban quech chque ri chij, ri ama'ib tak wacax, ri sibalaj e je'l na chquixo'l ri ya'tal u sachisaxic qui wäch, rech quequipil che u ya'ic u k'ij ri Ajawaxel ri Dios la pa Jilgal.”

²² Xubij c'u ri Samuel: “Are c'u sibalaj cäkaj na chuwäch ri Ajawaxel chi cänimaxic, che u q'uexwäch ri qui chi'xic tabal tak tok'ob xukuje' tak tabal tok'ob ri quechajirisaxic; are nim na u banic ri u nimaxic xukuje' ri u ya'ic xiquinaj che ri cubij che u q'uexwäch ri qui chi'xic tabal tak tok'ob xukuje' ri qui xepoyil tak ri chij.

²³ Sibalaj cämacun ri man cäniman ta che jacha' ri cuban ch'obonic; cäjunamataj ruc' ri quebuk'ijilaj tak diosib, are je u banic wa' ri man cäniman ta che. Rumal c'u rech chi e apakchi'm ri e u takanic are c'u ri are at u pakchi'm jacha' ajawinel.”

²⁴ Xubij c'u ri Saul che ri Samuel: “Je' in macuninak, man xinban taj ri u takanic ri Ajawaxel xukuje' tak ri u pixbenic ri xbij la chwe, xinxe'j wib chquiwäch ri winak, are xinnimaj ri xquibij chwe.

²⁵ Are c'u ri in quinbochi'n che la chi casach la nu mac chatzelej la wuc' che u k'ijilaxic ri Ajawaxel.”

²⁶ “Man quintzelej ta awuc',” xcha' ri Samuel che ri Saul, “rumal rech chi ri at apakchi'm ri u takanic ri Ajawaxel, ri are' xukuje' at catupakchi'j c'ut ri are jacha' rajawinel ri Israel.”

²⁷ Ri Samuel xusutij rib che relic bic, are c'u ri Saul xuchap che ri u chi' ri u k'u' xutanc'ayij c'ut.

²⁸ Xubij c'u ri Samuel che ri Saul: “Ri Ajawaxel je u banom wa', u tanq'uiyim camic ri ajawic pa a k'ab puwi' ri Israel. Resam chawe, cujach c'u pu k'ab jun awinakil, ri utz na chawäch at.

²⁹ Ri Dios ri are' ri u juluwem ri Israel, man cuban ta tzij mawi cutzelej ta rib chrij man c'u xak ta winak chi cutzelej ta rib chrij.”

³⁰ “Ri in, in macuninak,” xcha' ri Saul. “Quintz'onoj jun tok'ob che la chi chquiwäch ri nimak tak tatayib ri e c'o pa Israel xukuje' chuwäch ronojel ri tinimit takej la u ya'ic nu k'ij jacha' ajawinel. Chtzelej ba la wuc' che u k'ijilaxic ri Ajawaxel ri Dios la.”

³¹ Xtzelej c'u na ri Samuel ruc' ri Saul, xuk'ijilaj c'u wa' ri Ajawaxel.

³² Xuya' takanic ri Samuel xubij: “Chc'am ulok ri Agag chnuwäch, rajawinel ri Amalec.” Ri Agag man xuban ta quieb u c'u'x xetac'al chuwäch ri Samuel, are c'u pa u c'u'x chi man curik ta chic ri c'ayilaj cämical ri c'o puwi'.

³³ Xubij c'u ri Samuel che: “Man c'o ta cal ri q'uialaj ixokib xecanaj can rumal ri a ch'ich' re ch'o'j. Cäcanaj c'u na can ri a nan junam cuc' wa'.” Man c'o ta chi c'u xreyej ri Samuel, xuban ch'akatak che pa Jilgal, chuwäch ri Ajawaxel.

³⁴ Xuwi xban taj wa' xbe ri Samuel pa Rama, are c'u ri Saul xpaki' cho rachoch ri c'o pa Gabaa.

³⁵ Ri Samuel mawi jumul xril chic u wäch ri Saul, pune' c'u sibalaj xbisonic chi xutzelej rib ri Ajawaxel che u cojic ri Saul che rajawinel ri Israel.