Nabe Samuel 13 - Quiché Bible

Ch'o'j cuc' ri aj pilisteyib

¹ Ri Saul e c'o chic ri e u junab aretak xuchaplej ajawinic pa Israel; aretak c'u ajawininak chic quieb oxib junab,

² xebucha' oxib mil (3,000) ajch'ojab chquixo'l ri aj israelib. Quieb mil (2,000) xecanaj can ruc' pa Micmas xukuje' pa tak ri juyub ri e c'o pa Betel, ri jun mil (1,000) chic xecanaj ruc' ri Jonatan pa Gabaa aj Benjamin. E are' c'u ri niq'uiaj winak chic, ri Saul xuya' takanic chi chetzelej cho cachoch.

³ Ri Jonatan xuq'uis tzij paquiwi' ri chajinelab aj pilisteyib ri e c'o pa Gabaa, xoc c'u pa qui jolom ri aj pilisteyib. Are c'u ri Saul xutak rok'isaxic ri trompet pa ronojel ri ulew che u bixic chque ri aj hebreyib chi chquila' quib.

⁴ Conojel ri aj israelib xquetamaj chi ri Saul xusachisaj qui wäch ri e qui chajinelab ri aj pilisteyib rumal c'u rech wa' ri aj pilisteyib cäquetzelaj qui wäch ri aj israelib. Je c'u ri' ri ajch'ojab xquimulij quib ruc' ri Saul pa Jilgal.

⁵ Xukuje' c'u ri aj pilisteyib, xquimulij quib che u banic ch'o'j cuc' ri aj israelib. E c'o c'u juwinak lajuj mil (30,000) qui carwaj re ch'o'j, wakib mil (6,000) cajch'ojab ri e quiejeninak chquij quiej xukuje' q'uialaj cajch'ojab e jacha' ri u sanyebil ri plo. Xebe c'u chusuq'uil ri Micmas chila' c'u xequijekeba' wi ri qui kajebal, pa ri u wiquiak'ab ri Bet-aben.

⁶ Xekaj c'u ri aj israelib pa jun nimalaj c'ax sibalaj c'u nim ri c'ax ri xquiban ri aj pilisteyib chque, rumal ri' xequic'olo quib pa tak pec xukuje' pa tak jul, xukuje' xo'l tak ri nimak tak abaj pa tak u be ja' xukuje' pa tak c'ua'.

⁷ E q'ui chque xek'ax ch'akap che ri Jordan, xebe pa Gad xukuje' pa Galaad; are c'u ri Saul xcanaj na can pa Jilgal, conojel c'u ri rajch'ojab ruc' xe'n ib e teren chrij.

⁸ Wukub k'ij xeyem ri Saul chila', are k'ij wa' ri xebuk'at ri Samuel; man c'u copan ta ri Samuel pa Jilgal cätajin c'u cäquichap qui bic ri winak.

⁹ Xtakan ri Saul xubij: “Chebic'ama' ulok awaj chwe che qui chi'xic che tabal tok'ob ri cächajirisaxic xukuje' tabal tak tok'ob che utzirisan ib.” Kas are' c'ut xchi'n ri tabal tok'ob ri cächajirisaxic.

¹⁰ Pa ri jok'otaj ri xto'taj ri Saul che u chi'xic ri tabal tok'ob ri cächajirisaxic, xopan ri Samuel. Xel c'u ulok ri Saul che u c'ulaxic xukuje' che u ya'ic rutzil u wäch;

¹¹ xubij c'u ri Samuel che: “¿Jasche je xaban wa'?” Xutzelej u bixic ri Saul: “Aretak xinwilo chi xquichaplej qui bic ri winak, man xul ta c'u la pa ri k'ij ri ch'icom la, qui mulin c'u quib ri aj pilisteyib pa Micmas,

¹² xinchomaj chi quekaj ulok che u banic c'ax chwe pa Jilgal, maja' ta c'u quinjach wib pu k'ab ri Ajawaxel; rumal ri' xinchajij anima' che u chi'xic ri tabal tok'ob ri cächajirisaxic.”

¹³ Ri Samuel xutzelej u bixic che: “¡Ri a banom are jun ch'ujilal! We ta xanimaj ri takanic ri xuya' ri Ajawaxel chawe, ri are' xujiquiba' taj chi ma ta c'o u q'uisic ri awajawinic pa Israel.

¹⁴ Are c'u ri camic, ri awajawinic man cäbeytaj taj. Ri Ajawaxel cutzucuj na jun achi ri cakaj chuwäch cucoj na che c'amal u be ri u tinimit, rumal rech chi man xanimaj taj ri takanic ri xuya' chawe.”

¹⁵ Ri Samuel xel bic pa Jilgal che u takexic ri u be. Ri ajch'ojab ri e canajinak xquiterenej ri Saul che u banic ch'o'j, quelic pa Jilgal xebopan pa Gabaa aj Benjamin. Ri Saul chila' c'u xerajilaj wi ri ajch'ojab ri e achilaninak, e wakib sient (600) achijab c'ut.

¹⁶ Ri Saul rachilam ri Jonatan ri u c'ojol, xukuje' c'u ri ajch'ojab ri e achilaninak, xecanaj can pa Gabaa aj Benjamin, are c'u ri aj pilisteyib quimulin quib pa Micmas,

¹⁷ e c'o c'u ne ox k'at ajch'ojab aj pilisteyib xebel ulok chupam ri qui kajebal ri juk'at xbe chusuq'uil ri Opra rulew ri Sual,

¹⁸ ri juk'at chic xebe pa Bet-horon, ri urox xbe tza'm ri juyub ri c'o pa u niq'uiajil ri beya' aj Zeboim, ri cäca'y pa ri chaki'j uwo sak.

¹⁹ Pa ronojel ri ulew pa Israel mawi jun ch'ayal ch'ich' c'olic, cäquichomaj c'ut ri aj pilisteyib chi man c'o ta jun aj hebrey cacuinic quebuban ch'ich' re ch'o'j mawi tz'imaj ch'ich'.

²⁰ Conojel ri aj israelib quebe na cuc' ri aj pilisteyib che u banic ri u pa u chi' ri ch'ich' re ri qui tajibal, ri casaron, ri quicäj xukuje' ri qui tzoc'obal.

²¹ Cäquitok'ij c'u niq'uiaj onz sak puak che u banic u pa u chi' jun ch'ich' banbal tajin xukuje' asaron, niq'uiaj onz sak puak che u banic u pa qui chi' ri icäj xukuje' che qui colomaxic tak ri qui ch'ich' ri quecotocobic.

²² Rumal c'u ri' man c'o ta jun chque ri ajch'ojab ri e achilaninak ri Saul xukuje' ri Jonatan e c'o ta qui ch'ich' re ch'o'j o qui tz'imaj ch'ich' pa ri k'ij aretak xban ri ch'o'j. Xak xuwi ri e are' e quieb e c'o we jastak ri' cuc'.

²³ C'o chi c'ut juk'at aj pilisteyib ri xbe pa ri be re Micmas.