Nabe Samuel 1 - Quiché Bible

Ri Dios cuya' jun ral ri Na'

¹ Pa jun c'olbal pa tak ri juyub re Eprain ri cäbix Rama che, chila' jekel wi jun achi ri rachalaxic ri Zup, Elcan u bi'. Ri u tat ri Elcan are' ri Jeroham, ri u mam are' ri Eliu, ri xiquin u mam are' ri Tohu (ri u tat ri Tohu are' ri Zup), ri aj ramak' ri Eprain.

² Ri Elcan e c'o quieb rixokil. Ri jun Na' u bi', ri jun chic Penin u bi'. Ri Penin e c'o ral, are c'u ri Na' man e c'o ta ral.

³ Ronojel junab quel bic ri Elcan pa ri u tinimit cäbe che k'ijilanic xukuje' che qui chi'xic tabal tak tok'ob pa Sil che ri Ajawaxel ri c'o ronojel u cuinem. E c'o c'ut ri quieb u c'ojol ri Eli chila' ri cojol tabal tok'ob, ri Opni xukuje' ri Pinees qui bi', ri xukuje' wa' e cojol tabal tok'ob chuwäch ri Ajawaxel.

⁴ Aretak ri Elcan cuchi'j ri tabal tok'ob, cuya' ri ya'tal u ya'ic che ri Penin xukuje' ri ya'tal u ya'ic chque ri ral alabom xukuje' chque ri ral alitomab,

⁵ are c'u ri cuya' che ri Na' cucha' na, rumal rech chi are ri sibalaj nim na ri u lok'al chuwäch, pune' man yo'm ta che rumal ri Ajawaxel chi quec'oji' ral.

⁶ Rumal c'u ri' ri Penin, ri ya'l u ca'y, cuq'uiak u xiquin cäretz'bej u wäch, man nim ta cäril wi rumal rech chi man yo'm ta che rumal ri Ajawaxel chi quec'oji' ral.

⁷ Chujunab aretak quebopan pa ri rachoch ri Ajawaxel, ri Penin je tak c'ax wa' cuban che amak'el; rumal ri' ri Na' cok'ic man cäwa' taj.

⁸ Are' c'ut ri Elcan ri rachajil ri Na' cubij che: “Na', ¿jasche catok'ic? ¿Jasche bis at c'olic man catwa' ta c'ut? ¿A ma ta are in utz na in chquiwäch lajuj awal?”

⁹ C'o c'u jumul, aretak c'o ri Na' pa Sil, xwalijic aretak xtijtaj ri u wa. Ri Eli ri cojol tabal tok'ob t'uyul puwi' jun tem chunakaj ri oquibal ri queboc wi ri winak pa ri rachoch ri Dios.

¹⁰ Ri Na' ruc' ronojel ranima' cätajin cok' ruc' c'ayil, xoc che u banic ch'awem chuwäch ri Ajawaxel

¹¹ xuban c'u we chi'nic ri' che: “Ajawaxel ri c'o ronojel u cuinem: we ta quel c'u'x la che ri c'axc'olil ri c'o wi we pataninel ech la ri', quinnataj ta c'u che la, cäya' ta c'u la jun wal ala, in quinjach na che patanixic la, che c'u ri retal we tastajic ri' man cäsocax ta ri u wi' conojel ri k'ij ri cac'asi'c.”

¹² Rumal c'u rech chi xbeytaj ri Na' che u banic ch'awem chuwäch ri Ajawaxel, ri Eli xca'y che ri u chi';

¹³ xak c'u pa ranima' cätajin cuban ch'awem ruc' Dios. Man cätataj ta ri u ch'abal; xuwi queslab ri u chi'. Are pa u c'u'x ri Eli chi xa k'abarel,

¹⁴ xubij c'u che: “¿C'ä jampa' coc'ow ri a k'abaric? ¡Chaya' can ri u wa'l uva jela'!

¹⁵ Man je ta ri' tat,” xcha' ri Na'. “Man rumal ta rech chi nu kumum ta u wa'l uva mawi jun uq'uia' ri k'obisam, xane' xa c'axc'obinak ri wanima' cätajin c'u quinjamij ri nu c'axc'ol chuwäch ri Ajawaxel.

¹⁶ Mächomaj la chi in jun itzel ixok, xane' in beytajinak che u banic ch'awem chuwäch ri Ajawaxel, rumal rech chi oquinak il ri wanima' xukuje' cäbisonic.”

¹⁷ “Jät pa jamaril,” xcha' ri Eli che, “are ba' ri u Dios ri Israel chyo'w chawe ri xatz'onoj che.”

¹⁸ “Sibalaj maltiox,” xcha' ri Na'. Xtzelej c'u ri Na' jawije' ri petinak wi, xbe c'u che wa'im, mawi jumul xbison chic.

¹⁹ Chucab k'ij ak'ab xewalijic, aretak quik'ijilam chic ri Ajawaxel, xetzelej cho cachoch pa Rama. Xurik chi c'u rib ri Elcan ruc' ri Na' ri rixokil, ri Ajawaxel xnataj ri Na' che.

²⁰ Rumal c'u ri' xcanaj can yawab winak, aretak c'ut xtz'akat ri k'ijol xralaj jun ral ala, xucoj c'u Samuel che u bi', rumal rech chi u tz'onon che ri Ajawaxel.

²¹ Xbe chi c'u ri Elcan xebuc'am bic conojel ri aj uwo rachoch pa Sil, che u tz'akatisaxic ri u chi'm u banic cuchi'j c'u ri tabal tok'ob chi junab;

²² man xbe ta c'u ri Na'. Xubij c'u che ri rachajil: “Man quinbe ta na c'ä quel na ri ne' puwi' ri tu', c'äte ri' quinc'am bic che u jachic pu k'ab ri Ajawaxel xa c'u jumul chcanaj can chila'.”

²³ Ri Elcan ri rachajil, xutzelej u bixic che: “Chabana' ba' jachique ri utz ri cawilo. Chatcanaj canok c'ä cawesaj na ri ac'al puwi' ri tu'. Chutz'akatisaj c'ut ri Ajawaxel ri a chi'm.” Rumal c'u ri' xcanaj can ri Na' xuq'uiyisaj ri ral c'ä xresaj na puwi' ri tu'.

²⁴ Aretak c'u estajinak chic puwi' ri tu', c'ä ch'utin c'ut xuc'am bic ruc' che u jachic pa ri rachoch Dios ri c'o pa Sil. Xukuje' xebuc'am bic oxib alaj tak ama'ib wacax, cawinak jun (41) libra trico xukuje' jun tz'um u wa'l uva.

²⁵ Xquipil jun alaj ama' wacax xquijach c'u ri ac'al pu k'ab ri Eli.

²⁶ Xubij c'u ri Na' che: “Sachala' nu mac, tat, sibalaj c'u kastzij jacha' ri lal c'aslic, in c'u ri' ri ixok ri naj xinbeytaj che u banic ch'awem ruc' Dios waral, chi nakaj la.

²⁷ Xintz'onoj che ri Ajawaxel chi chuya' we wal ala ri', u yo'm c'ut ri xintz'onoj che.

²⁸ Ri in pa wech wi nu jachom pu k'ab ri Ajawaxel joropa' c'u junab cac'asi'c e are junab ri' cacanaj ruc'.” Are c'u ri Eli xumej rib c'ä xuya' na ri u palaj cho ri ulew chuwäch ri Ajawaxel.