Nabe Ajawinelab 9 - Quiché Bible

Ri Dios cuban jun c'ulwächinic ruc' ri Salomon

¹ Aretak ri Salomon xuq'uis u yaquic ri rachoch ri Ajawaxel, xukuje' ri rachoch ajawinel xukuje' ronojel ri xraj ri xubano,

² xuc'ut rib ri Ajawaxel chuwäch chucamul, jacha' ri u c'utic rib ri xuban chuwäch pa Gabaon,

³ xubij c'u che: “Nu c'amowam ri ch'awem ri a banom xukuje' ri bochi'nic ri a banom chwe nu tasom c'ut we ja ri' ri a yacom jacha' jun jekelibal che ri nu bi' amak'el. Amak'el c'ut quinchajij na man cäsach ta c'u pa nu jolom.

⁴ Are c'u ri camic, we ri at utz ruc'axic ri a c'aslemal caban chnuwäch jacha' ri xuban ri David, ri a tat, ruc' jun anima' ri man c'o ta jas cäriktaj chrij, ri suc', catoc c'u che u banic ronojel ri at nu takom wi, quebanimaj c'ut ri e nu pixab xukuje' tak ri e nu takanic,

⁵ in quinjekeba' na ri awajawinic amak'el pa Israel, jacha' ri xichi'j che ri David, ri a tat, aretak xinbij che chi mawi jumul ma ta c'o jun rija'lil ri ma ta cac'oji' na puwi' ri tem re ajawibal re Israel.

⁶ We c'u ri ix xukuje' ri e i c'ojol caquitas quib chwij, man quequitz'akatisaj ta tak ri e takomal xukuje' ri e pixab ri nu yo'm chque, xane' are que qui k'ijilaj jule' tak diosib chic,

⁷ in quinbok na ri Israel pa ri ulew ri nu yo'm chque, quinq'uiak na bic ri wachoch chnuwäch ri nu tasom xak xuwi chi c'u cayok' ri Israel chquixo'l conojel ri nimak tak tinimit.

⁸ Are c'u we wachoch ri', cux na jumulaj etzelatajic, ronojel ri coc'ow chuxcut cämayijin na, cäyok'on c'u na, cuc'ot c'u na chi'aj cubij na, jasche ri Ajawaxel je xuban wa' che we ulew ri' xukuje' che we rachoch ri'.

⁹ Cätzelex c'u na u wäch ri u tzij are xbanowic chi xquixutuj can ri Ajawaxel ri qui Dios, ri xebesan ulok ri e qui mam pa Ejipt, rumal c'u rech chi are xbe qui c'u'x che qui k'ijilaxic xukuje' che qui patanixic jule' tak diosib chic; rumal c'u ri' ri Ajawaxel xubano chi xpe we nimalaj etzelal ri' paquiwi'.”

Jule' tak chac chic ri xebuban ri Salomon

¹⁰ Juwinak (20) junab yactajinak chic ri quieb nimak tak ja rumal ri Salomon, ri rachoch ri Ajawaxel, xukuje' ri rachoch ajawinel,

¹¹ che c'u quiyaquic wa' ri Hiram, ajawinel re Tir, xebuya' c'u che ri Salomon che' re chacalte' re tz'inchäj, xukuje' ronojel ri k'an puak ri xraj. Are c'u ri ajawinel Salomon, xebujach juwinak (20) tinimit re galiley che ri Hiram.

¹² Aretak c'u ri Hiram xbe che quilic tak ri tinimit ri xebuya' ri Salomon che, man xekaj ta chuwäch,

¹³ xubij c'ut: “¿Jas qui banic wa' chi we tak tinimit ri yo'm la chwe, wachalal?” Rumal ri' ri ulew ri c'o wi we tak tinimit ri' xucoj Cabul che u bi', c'ä je c'u cabix che camic.

¹⁴ Ri k'an puak ri xuya' ri Hiram che ri ajawinel Salomon, e jumuch' wukub (87) quintal.

¹⁵ Ri ajawinel Salomon xebutak ri winak che u banic chac ri man tojom taj pune' man cäcaj che u yaquic ri rachoch ri Ajawaxel, ri rachoch ri ajawinel, ri u nojisaxic tak ri siwan, ri u yaquic nimak tak tapia chrij ri Jerusalen, xukuje' ri tak tinimit Hazor, Meguid xukuje' ri Jezer, rumal rech chi:

¹⁶ ri paraon, ajawinel re Ejipt, xopan can nabe che u ch'äquic ri tinimit Jezer; xuporoj c'ut xukuje' xebucämisaj conojel ri aj cananeyib ri e jekel chupam ri tinimit, xujach c'u che rechbal ri u mia'l, ri rixokil ri Salomon.

¹⁷ Ri Salomon xuban utzalaj u yaquic ri Jezer, ri Bet-horon ri c'o iquim,

¹⁸ ri Baalat xukuje' ri Tamar, chupam ri chaki'j uwo sak re Juda.

¹⁹ Xukuje' xuban qui yaquic ri tak tinimit ri quec'ol wi tak ri tzukbal ib, xukuje' tak ri cachoch ri ajch'ojab, ri e c'o wi tak ri carwaj re ch'o'j, ri cachoch ri ajch'ojab, ri e c'o wi ri ajquiejab, xukuje' ronojel ri xraj xuyac pa Jerusalen, pa ri Libano xukuje' pa ronojel ri ulew ri c'o chuxe' ri u takanic.

²⁰ E aretak c'u ri amoreyib, hititib, perezeyib, hebeyib xukuje' jebuseyib ri xecanajic, ri man aj israelib taj,

²¹ quel cubij chi, ri quija'lil ri c'äte xeq'uiy pa ri ulew ri man xecuin ta ri aj israelib che u sachisaxic qui wäch, ri Salomon xebucoj che qui banic tak chac ri man cätoj taj pune' man cäcaj, je c'u e takeninak c'ä camic.

²² Man c'o ta c'u jun aj israel ri xucoj ta che lok'om pataninel, xane' ajch'ojab, e quinimal tak ajch'ojab, takanelab, quinimal jujun sient (100) ajch'ojab xukuje' takanelab paquiwi' tak ri carwaj re ch'o'j xukuje' e qui nimal tak ajquiejab.

²³ E are' tak c'ut ri e qui nimal rajch'ojab ri Salomon ri e u cojom paquiwi' tak ri chac, e job sient ruc' cawinak lajuj (550), e are' wa' ri c'amal tak qui be ri winak ri quebanow tak ri chac.

²⁴ Ri u mia'l ri paraon xk'ax chupam ri u Tinimit ri David chupam ri rachoch ajawinel ri xuyac ri Salomon che. Xebunojisaj tak ri siwan ri c'o chrij ri tinimit.

²⁵ Ri Salomon oxmul pa jun junab quebuchi'j tak tabal tok'ob ri quechajirisaxic xukuje' tabal tak tok'ob re utzirisan tak ib puwi' ri porobal ri xuyac che ri Ajawaxel. Jewa' ri u q'uisic u yaquic ri rachoch Dios.

²⁶ Ri ajawinel Salomon xukuje' xebuban tak jucub pa Ezion-jeber ri c'o chunakaj ri Elat, chuchi' ri Quiäk Plo, pa ri rulew ri Edom.

²⁷ Ri Hiram xebutak bic tak ri e rajchaquib pa tak ri jucub, e u c'al tak jucub ri c'o quetamanic xukuje' ri queta'm u wäch ri plo, xecachilaj ri e rajchaquib ri Salomon,

²⁸ xebopan c'u pa Opir, jawije' ri xequimajij xacol man oxib sient wajxakib (308) quintal k'an puak xquic'am bic che ri ajawinel Salomon.