Nabe Ajawinelab 7 - Quiché Bible

Niq'uiaj tak ja chic ri xebuyac ri Salomon

¹ Ri Salomon xuyac ri kas rachoch, c'äte xuq'uis u banic chu oxlajuj junab.

² Xukuje' xuyac ri rachoch ajawinel ri cäbix “C'ache'laj re Libano che”, ri quetan cawinak olajuj (55) bara' u rabic, juwinak wukub (27) ruc' quieb (2) k'abaj u wäch, waklajuj (16) bara' ruc' quieb (2) k'abaj xel chicaj, xtok'ex c'u cumal cajcholaj rakan ja re chacalte', xecoj tak tem re chacalte' paquiwi'.

³ We tem tak ri' e cawinak job (45), xejach c'ut pa ox cholaj otaklajuj (15) chquijujunal, xecoj paquiwi' ri rakan tak ja. Paquiwi' tak ri tem xecoj che' re chacalte'.

⁴ E c'o ox cholaj wenta'n ri e banom pa tak ox ox cholaj, ri qui calawichim tak quib.

⁵ Conojel tak ri oquibal xukuje' tak ri wenta'n e cajtakxcut e qui calawichim c'u tak quib, pa ox ox tak cholaj.

⁶ Xukuje' xuban ri Nimalaj Ja ri e c'o tak Tok'ebal chupam, ri quetan juwinak wukub bara' (27) ruc' quieb (2) k'abaj u rabic, waklajuj bara' (16) ruc' quieb (2) k'abaj u wäch. Chuwäch wa', c'o chi jun ja cuc' tok'ebal ri xukuje' c'o u wi'.

⁷ Xuban c'u xukuje' ri Nimalaj Ja re K'atbal Tzij, o ri Nimalaj Ja ri caban wi ri Suq'uil, ronojel c'ut xuch'uk che chacalte' kas puwi' c'a chuxe'.

⁸ Ri nimalaj ja ri c'o wi ri Salomon, c'o uwo ja chrij, xukuje' jun nim ja ri junam u yaquic banom. Are c'u ri rachoch ajawinel ri xuyac che ri u mia'l ri paraon ri xuc'am che rixokil, c'o jun u nim ja ri xak junam u banic.

⁹ Conojel tak we ja ri', cachaptaj c'ä ruc' ri qui tiq'uilibal queq'uis c'ä ruc' ri quetz'balil ri c'o paquiwi' xukuje' ruc' ri qui wäch quetakal c'ä chuwäch ri nim uwo ja, e re abaj ri pakal tak cajil, e tzoc'om e ramom ruc' ramibal ruc' etabal, jas ri qui banic chquij xukuje' qui banic chquipam.

¹⁰ Ri e qui tiq'uilibal xukuje' e re tak abaj ri pakal tak cajil, xukuje' e nimak, c'o jujun ri quebetan job (5) bara' ruc' quieb (2) k'abaj, jujun chic ri quebetan quiejeb (4) bara' ruc' jun k'abaj ruc' quiejeb u wi' k'abaj.

¹¹ Ri e abaj ri xecoj paquiwi' xukuje' abaj ri pakal tak cajil, e tzoc'om c'o quetabalil, xukuje' e che' re chacalte' xecoj chque.

¹² Chuchi' c'ut ri u quetic ri nim uwo ja e c'o ox cholaj abaj, jocholaj tem re chacalte', xukuje' jas ri u banom ri ucab uwo ja, xukuje' pa ri rakan ja rech ri rachoch ri Ajawaxel.

Ri Salomon cuya' u chac ri Hiram

¹³ Ri ajawinel Salomon xutak u c'amic ri Hiram pa Tir,

¹⁴ ral c'ut jun malca'n aj ramak' ri Neptali ruc' jun aj Tir ri cacuin che u chacuxic k'an ch'ich'. Ri Hiram sibalaj cacuinic xukuje' reta'm c'ut ri kas u chacuxic apachique chac re k'an ch'ich', xopan c'u ruc' ri ajawinel Salomon xebuban c'u conojel tak ri u chac.

¹⁵ Xebuban quieb rakan ja re k'an ch'ich', ri quebetan belejeb (9) bara' ruc' oxib k'abaj qui taq'ui'c wakib bara' ruc' oxib k'abaj qui setic.

¹⁶ Xebuban quieb retz'balil re k'an ch'ich' rech queya' paquiwi' ri rakan tak ja. Ri qui taq'ui'c tak ri retz'balil e cacab bara' ruc' oxib k'abaj.

¹⁷ Xukuje' xebuban quieb c'at ri e pach'um ri banom wikbal chque, ri quecoj chque ri retz'balil chquijujunal.

¹⁸ Xebuban xukuje' quieb c'am crabaj ri quecoj chquij ri c'at, che qui ch'ukic quij ri retz'balil ri e c'o paquiwi' ri' rakan tak ja. Junam xuban chque ri quieb retz'balil.

¹⁹ Ri quieb etz'balil ri e c'o paquiwi' ri rakan ja ri e c'o pa ri oquibal xacol man quebetan cacab bara' ruc' jun k'abaj, junam qui banic ruc' jun xuxa'n.

²⁰ Chrij xukuje' pa ri qui chicajil ri quetz'balil chquijujunal, pa ri c'olbal ri nim na u wäch, ri u banom jun wuk'uwic, chrij ri c'at, c'o quieb sient (200) crabaj ri e qui banom cacholaj.

²¹ Ri Hiram xebucoj we rakan tak ja ri' pa ri oquibal chupam ri rachoch Dios. Aretak xecojtaj rumal pa ri qui c'olbal, ri rakan ja ri xcanaj pa ri u wiquiak'ab xucoj Jaquin che u bi', are c'u ri xcanaj pa ri mox k'ab xucoj Boaz che u bi'.

²² Ri kas e qui wi' tak ri rakan ja quejunamataj ruc' ri xuxa'n. Jewa' ri u tz'akatisaxic ri chac ri xban chque ri rakan ja.

Ri jastak ri quebajwataj chupam ri rachoch Dios

²³ Ri Hiram are chi xuban jun nimalaj c'olbal ja' re k'an ch'ich'. Quetequic c'ut, job (5) bara' ruc' quieb (2) k'abaj quetan che ri jun u chi' che ri jun chic. Ri rak'anibem quieb (2) bara' ruc' oxib (3) k'abaj, ri u setic, re waklajuj (16) bara' ruc' quieb (2) k'abaj.

²⁴ Chuxe' ri u chi' ri c'olbal ja', xuban quieb putzcuy ri e c'o qui wäch tak che' chque, pa lajujitak pa quieb (2) k'abaj, ronojel c'ut ruc'am rib ruc' ri c'olbal ja'.

²⁵ We c'olbal ja' ri' tiq'uil paquiwi' cablajuj (12) ama'ib tak wacax re k'an ch'ich', oxib queca'y pa ri u wiquiak'ab elebal k'ij, oxib (3) chic pa ri u mox elebal k'ij, oxib (3) pa ri elebal k'ij, oxib (3) pa ri u kajebal k'ij. Ri cakan ri e re chquij c'o chuxe' ri c'olbal ja', ri c'olbal ja' tiq'uil paquiwi'.

²⁶ Ri u pimal ri c'olbal ja' quiejeb u wi' k'abaj; ri u chi' je ta ne ri u banic jun lak re xuxa'n, quieb mil wukub sient k'ebal (2,700) ja' cuk'i' ri c'olbal ja'.

²⁷ Xukuje' xebuban lajuj tac'alibal e re k'an ch'ich', chquijujunal quebetan quieb bara' ruc' jun k'abaj qui rabic xukuje' xak junam ri qui wäch jun bara' c'ut ruc' quieb k'abaj ruc' quiejeb u wi' k'abaj qui taq'ui'c.

²⁸ Ri e tac'alibal je qui banic wa' xebanic e c'o k'atibal tak chquipam ri e chaptalic,

²⁹ paquiwi' ri k'atibal tak qui pam ri e chaptalic e c'o qui wächbal tak coj, qui wächbal ama'ib tak wacax xukuje' qui wächbal aj cajalaj tak to'banelab ri e c'o qui xic'. Paquiwi' xukuje' chquixe' ri ama'ib tak wacax xukuje' chquixe' tak ri coj e c'o tak wikbal re corona re k'an ch'ich' cotz'i'j u banic chque.

³⁰ Chquijujunal ri jujun tak tac'alibal e c'o cajcaj qui quetet re k'an ch'ich' ri e jutum tak balul chquipam ri xukuje' re k'an ch'ich'. Pa ri quiejeb u ch'u'c ri tac'alibal, chuxe' ri c'olbal ja', e c'o tak tok'ebal re k'an ch'ich' e c'o c'u corona pa tak u xcut.

³¹ Ri u chi' ri c'olbal ja' c'o chupam jun k'atibal ri quebel quieb k'abaj chicaj. Ri u chi' quetequic, ri cätok'enic c'o oxib k'abaj rak'anibal. Xukuje' chuchi' e c'o tak wikbal che, ri chapbal tak rech man e setesak taj xane' e cajtzalaj.

³² Ri quiejeb quetet e c'o chquixe' ri k'atibal qui pam, ri qui balul ri quetet e nac'al chque ri tac'alibal. Ri quetet e oxib k'abaj cak'anibem,

³³ xak c'u junam qui banic cuc' tak ri u quetet ri carwaj. Ri e balul, ri quetetibal tak ri e k'ekk'oj tak chquipam ri qui jolom tak ri quetet conojel e re k'an ch'ich'.

³⁴ Ri e quiejeb tok'ebal ri e c'o pa tak ri u ch'u'c ri jujun tac'alibal, conojel xa' jun cuc'am quib ruc' ri tac'alibal.

³⁵ Ri u wi' ajsic, caq'uis ruc' jun u chi' bolobic ri cusutij ri u chi' re jun k'abaj rak'anibal; ri e k'atibal u pam xukuje' ri e chapbal tak rech ri quebel puwi' ri tac'alibal, xa' e jun cuc'am wi quib ruc' wa'.

³⁶ Ri Hiram xebuban ri aj cajalaj tak to'banelab ri e c'o qui xic', coj xukuje' juwi' tak tut paquiwi' tak ri k'atibal tak qui pam xukuje' tak ri e chapowinak, ri cuya' queban wi chque chquijujunal, xukuje' tak corona chuchi'.

³⁷ Jewa' xuban che qui banic tak ri lajuj tac'alibal conojel xebuban pa k'ak' xak junam qui banic xukuje' quetabalil.

³⁸ Xukuje' xebuban lajuj c'olbal ja' re k'an ch'ich'. Chquijujunal quebetan cacab bara' ruc' jun k'abaj, caquich'ij c'u cawinak olajuj (55) k'ebal ja', chquijujunal c'ut xeya' paquiwi' ri lajuj tak tac'alibal,

³⁹ job tac'alibal xeya' pa ri u wiquiak'ab ri rachoch Dios ri job chic pa ri u mox k'ab. Ri nimalaj c'olbal ja' xya' pa ri u wiquiak'ab ri ja, pa ri u mox elebal k'ij.

⁴⁰ Ri Hiram xebuban tak t'uy, palet tak xukuje' nimak tak lak. Je u q'uisic wa' ri chac ri xuban che ri Salomon chupam ri rachoch ri Ajawaxel:

⁴¹ Ri xebuban tak quieb rakan tak ja, ri quieb retz'balil quetecak ri c'o paquiwi' ri quieb rakan tak ja, ri quieb c'at ri xech'ukuw ri retz'balil,

⁴² ri quiejeb sient (400) crabaj ri c'o chque ri quieb c'at, pa cacholaj chque tak ri jujun c'at, ri xch'ukubex quech ri quieb retz'balil ri e quetecak ri e c'o paquiwi' ri quieb tac'alibal;

⁴³ ri lajuj tac'alibal, ri lajuj c'olbal ja' ri quebe paquiwi',

⁴⁴ ri nimalaj c'olbal ja' yabal ja', rachil ri cablajuj ama'ib tak wacax ri e c'o chuxe',

⁴⁵ e c'o chi c'u wi ri' ri t'uy tak, ri palet tak xukuje' ri nimak tak lak. Conojel tak we chaconisan ri' ri xebuban ri Hiram che ri Salomon che ri rachoch ri Ajawaxel, re k'an ch'ich' ri quejuluwic.

⁴⁶ Ri ajawinel xebuban wa' pa k'ak' pa tak molte re sanyeb, pa ri ulew ri c'o chunakaj ri Jordan, chuxo'l ri Sucot ruc' ri Saretan.

⁴⁷ Sibalaj c'u q'ui tak ri chaconisan re k'an ch'ich' chi man xoc ta chi il ri Salomon chi xubantaj chi xepajtaj.

⁴⁸ Ri Salomon xukuje' xutak qui banic tak ri chaconisan ri e c'o can nabe chupam ri rachoch ri Ajawaxel: ri porobal re k'an puak, ri mexa re k'an puak ri queya' wi tak ri caxlanwa ri quecoj chuwäch ri Ajawaxel,

⁴⁹ ri e tzuc'ulibal re utzalaj k'an puak ri e c'o chuwäch ri Sibalaj Tastalicalaj C'olbal, job pa ri u wiquiak'ab, job pa ri u mox k'ab, cuc' tak ri quetz'balil que cotz'i'j, ri ch'utik tak tzuc'ulibal xukuje' ri chapbal re k'an puak,

⁵⁰ ri e kumubal tak, ri kopibal tak qui wi' ri mecha', ri nimak tak lak, ri nimak tak paq'uebal ri e bukibal, conojel e re utzalaj k'an puak. Xukuje' e re k'an puak ri e qui wiki'b tak ri e roquibal ri Sibalaj Tastalicalaj C'olbal, ri c'o chupam ri rachoch Dios, xukuje' ri rech tak ri e roquibal ri rachoch Dios.

⁵¹ Aretak c'u xtz'akat qui banic conojel tak ri chac ri xtakan che qui banic chupam ri rachoch ri Ajawaxel, ri Salomon xebuc'am bic tak ri chaconisan re k'an puak xukuje' re sak puak ri u tasom ri David, ri u tat, che ri Ajawaxel, xebuya' cuc' ri e u k'inomal ri rachoch ri Ajawaxel.