Nabe Ajawinelab 4 - Quiché Bible

Ri rajawinic ri Salomon

¹ Ri Salomon xc'oji' che ajawinel puwi' ronojel ri Israel.

² Ri e rach k'atal tak tzij e are' tak wa': ri Azariy ri u c'ojol ri cojol tabal tok'ob Sadoc;

³ ri Elihorep xukuje' ri Ahiy, e u c'ojol ri Sisa, ri tz'ibanelab; ri Josapat, u c'ojol ri Ahilud, rajtz'ib ri ajawinel;

⁴ ri Benaiy, u c'ojol ri Joiad, qui nimal ri ajch'ojab; ri Sadoc xukuje' ri Abiatar, e cojol tabal tok'ob;

⁵ ri Azariy, u c'ojol ri Natan, are ri takanel; ri Zabud, u c'ojol ri Natan, ya'l u no'j ri ajawinel pa u tuquiel wi';

⁶ ri Ahisar, are ri cätakan pa ri rachoch ri ajawinel; xukuje' ri Adoniram, u c'ojol ri Abda, are ri cojom puwi' tak ri chac ri man tojom taj.

⁷ Ri Salomon xebucoj cablajuj takanelab puwi' ronojel Israel, ri qui chac wa' are ri u ya'ic ronojel ri cajwataj che ri ajawinel xukuje' conojel ri rachalaxic. Chquijujunal rajawaxic caquijach ri cajwataj che ri jun ic' pa ri jun junab.

⁸ We cablajuj takanelab ri' e are' wa': Ri Ben-Hur, pa tak ri juyub re Eprain;

⁹ ri Ben-Decar, pa Macaz, pa Saalbim, pa Bet-sems, pa Elon xukuje' pa Bet-hanan;

¹⁰ ri Ben-Hesed, pa Arubot, xukuje' pa ri Soc, pa ronojel ri ulew re Heper;

¹¹ ri Ben-Abinadab, pa ronojel ri rulew ri Dor; ri rixokil are' ri Tapat, u mia'l ri Salomon;

¹² ri Baan, u c'ojol ri Ahilud, pa Taanac, pa Meguid xukuje' pa ronojel ri Bet-sean, ri u tikem rib ruc' ri Saretan, kas c'ä iquim na che ri Jezreel, cächaptaj bic pa Bet-sean quetakal pa Abel-mehol c'ä jela' na che ri Jocmeam;

¹³ ri Ben-Jeber, pa Ramot re Galaad, xecanaj c'ut ri alaj tak tinimit re Galaad chuxe' ri u takanic, ri e rech can ri Jair u c'ojol ri Manases, xukuje' ri ulew re Argob, ri c'o pa Basan, ri xec'oji' wi oxc'al (60) tinimit ri e c'o nimak tak tapia chquij xukuje' e c'o tak qui oquibal re k'an ch'ich';

¹⁴ ri Ahinadab, u c'ojol ri Id, pa Mahanaim;

¹⁵ ri Ahimaas, ri xc'uli' ruc' ri Basemat, u mia'l ri Salomon, pa Neptali;

¹⁶ ri Baan, u c'ojol ri Husay, pa Aser xukuje' pa Alot;

¹⁷ ri Josapat, u c'ojol ri Paru, pa Isacar;

¹⁸ ri Simeiy, u c'ojol ri Ela, pa Benjamin;

¹⁹ ri Jeber, u c'ojol ri Uri, pa ri ulew re Gad, rulew ri Sehon, cajawinel ri amoreyib, xukuje' ri rulew ri Og rajawinel ri Basan. C'o chi c'u na jun takanel, puwi' ronojel ri ulew.

U no'j xukuje' ri u pok'colijic ri Salomon

²⁰ Ri Juda, xukuje' ri Israel man quebajilataj taj ri qui winakil, e jacha' ri sanyeb ri c'o chuchi' ri plo. Sibalaj c'o ri catijic xukuje' ri cuq'uiaxic, c'o nimalaj quicotemal.

²¹ Ri Salomon are' nim na u k'ij chquixo'l conojel ri ajawibal ri quechaptaj ulok chuchi' ri nima' Euprats quebetakal c'ä pa ri culew ri aj pilisteyib xukuje' c'ä pa ri u c'ulbatil ri Ejipt, ri xequitoj tak cuchuj ri xec'oji' c'u chuxe' ri u takanic ri Salomon joropa' k'ij ri xc'asi'c.

²² Ri tzukbal ri xajwataj che ri Salomon rech jujun k'ij: oxc'al (60) quintal coc'alaj c'äj, quieb sient cawinak wajxakib (248) quintal c'äj,

²³ lajuj (10) ama'ib tak wacax ri sibalaj e chomak, juwinak (20) ama'ib tak wacax ri xak k'ayes caquitijo, jun sient (100) chij, man quebajilax ta c'ut ronojel u wäch masat ri aj c'ache'laj, ri aj lianic, ri e cocoj masat xukuje' ronojel qui wäch ec' ri e k'obisam,

²⁴ xtakan c'u ri Salomon puwi' ronojel ri ulew ri c'o che ri u kajebal k'ij che ri Euprats, cachapletaj pa Tips quetakal c'ä pa Gaz, xukuje' paquiwi' conojel tak ri ajawinelab re we ulew ri', c'o jamaril pa ronojel ri ulew ri sutininak rij.

²⁵ Joropa' c'u k'ij xc'asi' ri Salomon, ri e u winakil ri Juda xukuje' ri e rech ri Israel, cachapletaj pa Dan c'o pa Beerseb, xejeki' pa utzil, chquijujunal xec'oji' chquixe' tak ri qui uva xukuje' chquixe' tak ri qui higo,

²⁶ ri Salomon xec'oji' quiejeb mil (4,000) c'olbal tak u quiej ri quejurun tak ri e u carwaj, e c'o c'u cablajuj mil (12,000) rajch'ojab ajquiejab.

²⁷ Ri takanelab ri yo'm chic qui bixic caquijach ronojel ri cajwatajic che ri jun ic', ri benak chquiwäch che u ya'ic, che ri ajawinel Salomon xukuje' chque ri quepatanin ruc', cäban c'u oquem il rech ma ta c'o q'ueq'uenic.

²⁸ Pa ri k'ijol ri ya'talic catak ulok ri sebad pa ri c'olbal ri quelyoka wi xukuje' ri pajo ri cajwataj chque ri quiej xukuje' chque ri awaj ri e jururunelab.

²⁹ Ri Dios xuya' nimalaj no'j che ri Salomon xukuje' etamabal, xukuje' jun ch'obonic ri sibalaj nim jacha' sanyeb ri c'o chuchi' ri plo,

³⁰ xoc'ow c'u na ri u no'j ri Salomon chquiwäch ri aj ejiptib xukuje' ri e aj elebal k'ij.

³¹ Xux na sibalaj aj no'j chuwäch apachique winak: c'o na u no'j chuwäch ri Etan, rija'lil ri Zer, c'o na u no'j chuwäch ri Heman, ri Calcol xukuje' Dard e u c'ojol ri Mahol. Xel u tzijol pa conojel tak ri nimak tak tinimit ri e c'o chunakaj.

³² Xebutzijoj oxib mil (3,000) yabal tak no'j, xebusuc'umaj jun mil job (1,005) bix.

³³ Xtzijon chquij ri juwi' tak che' xukuje' tak ri tico'n, xuchaplej ruc' ri chacalte' ri c'o pa ri Libano xuq'uisa' c'ä ruc' ri k'ayes ri queq'uiy paquiwi' tak ri tapia; xukuje' xtzijon chquij ri awaj ri e c'o qui xic' xukuje' ri man e c'o ta qui xic', ri cumätz tak xukuje' tak ri car.

³⁴ Pa conojel ri nimak tak tinimit xukuje' tak ri ajawibal rech ri uwächulew ri qui tom ri u bixic ri retamabal ri Salomon, quepe winak che u tatabexic.