Nabe Ajawinelab 21 - Quiché Bible

Ri Acab xbe ranima' che ri u ticbal uva ri Nabot

¹ Oc'owinak chi tak ri k'ijol, xc'ulmatajic chi jun achi aj Jezreel, Nabot u bi', c'o jun u ticbal uva chupam ri tinimit, u tikem rib ruc' ri rachoch ri Acab, ajawinel pa Samar.

² C'o jun k'ij aretak ri Acab xubij che ri Nabot: “Chaya' ri a ticbal uva chwe are quinwaj quintic cotz'i'j chupam, rumal chi c'o pa ri u xc'ut ri wachoch. Quinya' chic jun ticbal uva chawe ri sibalaj utz na; we are utz chawe chi quintoj chi puakil.”

³ Are' c'u ri Nabot xutzelej u bixic che ri Acab: “Muya' ri Dios chi ri in quinya' ta ri wechben can chque ri e nu mam.”

⁴ Ri Acab cabisonic xbe cho rachoch xukuje' royowal rumal rech ri xubij ri Nabot che, u bim c'u che chi man cuya' ta che ri rechbem ulok chque ri e u mam. Xopanic, xek'oyolok xuban u wäch cho ri tapia, man xraj ta c'ut xwa'ic.

⁵ Xpe c'u ri Jezabel, ri rixokil, xkeb ruc', xubij c'u che: “¿Jas c'u che sibalaj catbisonic man c'u cajwataj catwa'ic?”

⁶ Ri Acab xutzelej u bixic: “Xintzijobej ri Nabot, ri aj Jezreel, xinbij che chi chuc'ayij ri u ticbal uva chwe, o we are' cäraj chi quinya' chi jun ticbal uva che u q'uexel. Man xuya' ta c'u u tzij che u ya'ic chwe.”

⁷ Are' c'u ri Jezabel, ri rixokil, xutzelej u bixic che: “¡At ya' ri cattakan pa Israel! Chatwalijok, jatewok chatt'uyul c'u pa utzil. ¡In quinyo'w na ri u ticbal uva ri Nabot chawe!”

⁸ Xebutz'ibaj c'u tak wuj pa ri u bi' ri Acab, xebut'ic bic ruc' ri u mulk'ab ri ajawinel; xebutak c'u bic chque ri nimak tak tatayib xukuje' ri c'amal tak be ri e jekel pa ri u tinimit ri Nabot.

⁹ Ri wuj ri xetak bic je cubij wa': “Chiya' u bixic chi man quewa' taj, chi t'uyuba' c'ut ri Nabot chuwäch ri tinimit.

¹⁰ Chebit'uyuba' quieb subunelab tak k'alajisanelab chuwäch chibij c'u chque chi chiquiya' itzel k'alajisanic chrij, quijiquiba' u bixic chi qui tom xuc'okoj ri Dios xukuje' ri ajawinel. Chiwesaj c'u bic, chi cämisaj che abaj.”

¹¹ Ri achijab aj u tinimit ri Nabot, junam cuc' ri nimak tak tatayib xukuje' ri c'amal tak be, xquiban ri takanic ri xutz'ibaj ulok ri Jezabel chupam ri wuj ri xutak ulok chque:

¹² Xquiya' u bixic chi man quewa' taj, xquit'uyuba' c'ut ri Nabot chuwäch ri tinimit.

¹³ Xebopan c'u quieb ri xa e subunelab tak k'alajisanelab xquiya' c'u itzel k'alajisanic chrij ri Nabot chuwäch ronojel ri tinimit, xequiya' u bixic chi qui tom chi u c'okom ri Dios xukuje' ri ajawinel. Xquesaj c'u bic chrij ri tinimit xquicämisaj c'u che abaj.

¹⁴ Xquitak c'u u bixic che ri Jezabel chi xcämisataj ri Nabot che abaj.

¹⁵ Xuwi c'u xetamataj rumal ri Jezabel, xubij che ri Acab: “Jät, chac'ama' chabana' c'u awech che ri u ticbal uva ri Nabot, ri aj Jezreel, ri man xrajtaj xuc'ayij chawe. Man c'asal ta chic; cäminak chic.”

¹⁶ Aretak xretamaj ri Acab chi xcäm ri Nabot, xbec xubana' rech che ri u ticbal uva.

¹⁷ Ri Ajawaxel xuch'abej ri Eliy, ri aj Tisbe, xubij c'u che:

¹⁸ “Jät ba' che rilic ri Acab, ajawinel pa Israel, ri jekel pa Samar. Pa we jok'otaj ri' cäriktaj chupam ri u ticbal uva ri Nabot ri benak che u banic rech che.

¹⁹ Cabij che: ‘Jewa' cubij ri Ajawaxel: rumal rech chi xacämisaj ri Nabot xatokij c'ut ri rech, kas pa ri c'olbal jawije' ri xquirik' wi ri tz'i' ri u quiq'uel, chila' caquirik' wi na xukuje' ri awech at.’ ”

²⁰ Ri Acab xubij che ri Eliy: “¿La je ba' ri', at ri at nu c'ulel in a rikom?” “Je, xatinriko” xcha' ri Eliy. “Rech man quebatakej ta chic qui banic niq'uiaj itzel tak jastak chuwäch ri Ajawaxel.

²¹ Rumal c'u ri', u bim ri Ajawaxel: ‘Quinc'am na ulok ri c'axc'olil pawi', quenq'uisa' c'u tzij puwi' ronojel ri awija'lil; quebensachisaj na qui wäch conojel ri achijab ri e awija'lil ri e c'o pa Israel.

²² Je c'u quenbana' na che ri awija'lil junam jas ri xinban che ri rech ri Jeroboam, ri u c'ojol ri Nabat, ri xukuje' je xinban che ri rech ri Baas, u c'ojol ri Ahiy, rumal rech chi xuyac ri woyowal aretak xubano chi u mac rech xmacun ri Israel.’

²³ Are' c'u ri Jezabel, ri Ajawaxel u bim: ‘Chi tz'i' quetijow na ri Jezabel pa tak ri juyub re Jezreel.’

²⁴ Are' c'u ri awachalaxic ri cacäm pa ri tinimit, tz'i' quetijow na; are c'u ri cäcäm pa ri juyub tak ri chicop ri e c'o qui xic' quetijow na.”

²⁵ (Man c'o ta chi jun jacha' ri Acab, ri xtakchi'x rumal ri rixokil Jezabel, xuwi xebuban itzel tak banoj chuwäch ri Ajawaxel.

²⁶ Xuban jun nimalaj etzelal aretak xoc che qui k'ijilaxic tak ri diosib, jacha' ri xquiban ri aj amoreyib, ri xerokix bic rumal ri Ajawaxel chquiwäch ri aj israelib.)

²⁷ Aretak ri Acab xuta' ronojel ri xbixic, xujis ri ratz'iak chrij, xebucoj wakwoj tak atz'iak xukuje' man xwa' taj. Xwar chquipam tak we atz'iak ri' amak'el c'ut cäbisonic.

²⁸ Xubij c'ut ri Ajawaxel che ri Eliy:

²⁹ “¿La awilom jas ri u mach'ic rib ri Acab u banom chnuwäch? Rumal c'u rech chi u mach'om rib chnuwäch, man quinc'am ta ulok ri etzelal paquiwi' ri rachalal joropa' k'ij cac'asi'c, xane' pa ri u c'aslemal ri u c'ojol.”