Nabe Ajawinelab 20 - Quiché Bible

Ri Acab xebuch'äc ri aj Siriy

¹ Ri Ben-adad, ajawinel re Siriy, xebumulij conojel ri e rajch'ojab, xukuje' juwinak cablajuj (32) tak ajawinel ri qui yo'm qui tzij ruc', e cuc'am tak ri qui quiej xukuje' tak ri qui carwaj que ch'o'j, xpe chunakaj ri Samar xusutij rij, xch'ojin c'u ruc'.

² Xebutak c'u ulok tako'n che we tinimit ri' rech quelquibij che ri Acab, ajawinel re Israel:

³ “Ri Ben-adad cubij: ‘Ri e a k'inomal e wech in, xukuje' tak ri awixokilab xukuje' ri je'licalaj tak a c'ojol.’ ”

⁴ Ri ajawinel re Israel xutzelej u bixic: “Je' jacha' ri bim la, ajawinel, in xukuje' ronojel ri c'o wuc' ech la.”

⁵ Ri e tako'n xebe chi jumul che rilic ri Acab, xquibij c'u che: “Ri Ben-adad cubij: ‘Nu takom chi bic u bixic chawe chi quebaya' na ri e a k'inomal chwe, ri e awixokilab, ri a c'ojol tak.

⁶ Je tak c'u wa' chwek quebentak chi na bic ri e qui nimal tak ri wajch'ojab che rilic ri awachoch xukuje' tak ri cachoch ri e a wach k'atal tak tzij, ronojel c'ut ri cäkaj chquiwäch caquiban na quech che.’ ”

⁷ Ri ajawinel re Israel xutak qui siq'uixic ri nimak tak tatayib ri e c'o pa ri ulew, xubij c'u chque: “Ri ix qui ch'obo, chi we achi ri' cätajin cutzucuj u banic c'ax chwe, man nu k'ilom ta c'u wib che qui jachic tak ri wixokilab pa u k'ab, ri e nu c'ojol xukuje' tak ri e nu k'inomal.

⁸ Mätatabej la mawi moc la il che ri cubij” xecha' ri nimak tak tatayib xukuje' conojel ri winak.

⁹ Xubij c'ut ri Acab chque ri e u tako'n ri Ben-adad: “Chibij che ri ajawinel ri wajaw chi quinban na ri xutak u bixic chwe nabe, man cuya' ta c'ut quinban ri cutok'ij chi chwe camic.” Ri e tako'n xquic'am bic ri xtzelex u bixic chque che ri Ben-adad,

¹⁰ ri Ben-adad xutak u bixic che ri Acab: “¡C'axalaj u c'äjisaxic nu wäch chquibana' ri diosib, chi ri puc'uc' ulew ri c'o pa Samar man cubana' taj chi ri e c'o wuc' caquic'am ta jutak muk' quech!”

¹¹ Ri xutak chi c'u u bixic, ri ajawinel re Israel che: “Man cänabejisax ta c'u apan u bixoxic ri ch'äcanic nabe.”

¹² Aretak xeyok ri tzelebal wächaj che ri Ben-adad, cätajin cak'abar cuc' niq'uiaj tak ajawinelab chic chquipam tak ri cäbal ri xak aninak qui yaquic banom. Xubij chque ri e qui nimakil tak ri rajch'ojab: “¡Jix che ch'o'j!” Conojel c'ut xquisuc'umaj quib che u banic ch'o'j ruc' ri tinimit.

¹³ Xopan c'u jun k'axal tzij ruc' ri Acab, rajawinel ri Israel, xubij che: “Ri Ajawaxel u bim: ‘Pune quebawil we tinimit c'ulel ri', in quebenjach na pa a k'ab camic, rech cawetamaj chi in ri' ri Ajawaxel.’ ”

¹⁴ “¿Jachin c'u ri quejachow pa nu k'ab?” xcha' ri Acab. “Ri Ajawaxel u bim chi e are' ri c'ojolab ri quetoban cuc' ri k'atal tak tzij ri quetakan pa tak ri tinimit,” xcha' ri k'axal tzij. “¿Jachin c'u lo ri cäticow ri ch'o'j nabe?” xcha' chi na ri Acab. “Lal,” xcha' ri k'axal tzij.

¹⁵ Xpe ri Acab xebusolij ri alabom ri quetoban cuc' ri k'atal tak tzij ri quetakan pa tak ri tinimit, ri e quieb sient ruc' juwinak cablajuj (232), xukuje' conojel ri cajch'ojab ri aj israelib, ri e wukub mil (7,000) achijab.

¹⁶ Xebel bic pa tiq'uil k'ij, are' c'u ri Ben-adad xukuje' ri juwinak cablajuj (32) ajawinelab ri qui junam qui wäch ruc' quitakem k'abaric pa tak ri qui cäbal ri xak aninak qui yaquic banom,

¹⁷ are' c'u xenabej ri e to'l tak quech ri k'atal tak tzij, ri quetakan pa tak ri tinimit. Aretak xya'taj u bixic che ri Ben-adad chi e c'o jujun achijab xebel ulok pa Samar,

¹⁸ xuya' takanic: “¡We e elinak ulok che jamaril o che u banic ch'o'j, e c'aslic, quinwaj chebic'ama' ulok chnuwäch!”

¹⁹ Xebel bic ri to'l tak quech ri e k'atal tak tzij ri quetakan pa tak ri tinimit chupam ri tinimit, e terenetal cumal ri ajch'ojab.

²⁰ Chquijujunal c'ut xucämisaj jun c'ulel, xebanimaj c'ut ri aj siriyab. Xebokatax c'ut cumal ri aj israelib, are' c'u ri Ben-adad ri cajawinel ri aj Siriy, xuquiejej ri u quiej xanimajic jun xerachilaj niq'uiaj ajch'ojab ri e c'o qui quiej.

²¹ Ri ajawinel c'ut re Israel xucoj u chuk'ab xebumajij tak ri quiej xukuje' tak ri carwaj re ch'o'j, nim c'ut ri ch'äcanic ri xuban chque ri aj siriyab.

²² Xopan chi c'ut ri k'axal tzij ruc' ri ajawinel re Israel, xubij c'u che: “Choj la, chemulij chi la niq'uiaj ajch'ojab la, chbana' la utz u chomaxic ri rajawaxic u banic umal la; rumal rech chi aretak cätz'akat jun junab ri ajawinel re Siriy cäpe chi jumul che u banic ch'o'j uc' la.”

²³ Ri e qui nimakil tak ri e rajch'ojab ri ajawinel re Siriy xquibij wa' che: “Ri e qui diosib ri aj israelib e diosib quech tak ri c'ache'laj; rumal ri' uj qui ch'äcom. We ta c'u cujch'ojin cuc' pa ri lianic, chila' kas quekach'äc wi na.

²⁴ Ri rajawaxic cäban la are' ri quesaxic tak ri ajawinelab chupam tak ri qui c'olbal, are' c'u checojo' la qui nimal tak ajch'ojab chupam tak ri qui c'olbal,

²⁵ chesuc'umax chi niq'uiaj ajch'ojab jacha' ri xech'äctajic jun quiej che u q'uexwäch jun quiej jun carwaj che u q'uexwäch jun carwaj. Cäkatij c'u na ka chuk'ab cuc' chupam ri lianic, man c'o ta c'u queblan c'uxaj quekach'äc na.” Ri Ben-adad utz xuta' ri xbixic xutakej c'u u banic.

²⁶ Oc'owinak chi c'u jun junab ri Ben-adad xebusolij ri aj Siriy xek'ax c'u pa Apec che u tijic qui chuk'ab cuc' ri Israel.

²⁷ Xukuje' ri aj israelib xequisolij ri e cajch'ojab xequiya' c'ut ri cajwataj chque, xebe c'u che u rikic quib cuc' ri aj siriyab. Aretak qui mulin chi quib chquiwäch ri aj siriyab, xak e alicha' je ta ne ri quepe catzobaj q'uisic', are c'u ri aj siriyab qui latz'obem ronojel ri ulew.

²⁸ Xopan c'ut jun k'axal tzij ruc' ri ajawinel re Israel, xubij c'u che: “Jewa' cubij ri Ajawaxel: ‘Rumal rech chi qui bim ri aj siriyab chi ri in in jun dios quech ri c'ache'laj, chi ri in man in jun dios taj c'ut quech ri beya', quebenjach we q'uialaj winak ri' pa a k'ab. Jeri' cawetamaj na chi in ri' ri Ajawaxel.’ ”

²⁹ Wukub k'ij, ri aj siriyab xukuje' ri aj israelib xak xec'oji' chupam ri qui kajebal, xuc'ulaj rib qui wäch, chuwuk k'ij c'ut xchaptaj ri ch'o'j. Pa ri k'ij ri' ri aj israelib xequicämisaj jun sient mil (100,000) ajch'ojab aj siriyab ri xak quebin chcakan.

³⁰ Ri niq'uiaj ajch'ojab chic ri e qui tza'akat ri xecämic xebanimajic xeboc chupam ri tinimit Apec, are' c'u ri nim tapia ri c'o chrij ri tinimit xwulij paquiwi' ri juwinak wukub mil (27,000) achijab ri xa e animajinak ulok. Ri Ben-adad are' jun xanimajic, xopan pa ri tinimit xuc'u'la' rib chi' tak ja.

³¹ Ri e qui nimal tak ri rajch'ojab xquibij che: “Ka tom u tzijol chi ri e cajawinelab tak ri aj israelib e tok'obisal tak wächaj; je chkabana' wa' chekacojo' bic wakawoj tak atz'iak xukuje' jun colob re jitz'abal chkakul, je katac'aba' c'u kib chuwäch ri ajawinel re Israel, che rilic we cusach ka mac ma ta c'u cujucämisaj.”

³² Xequicoj c'ut wakawoj catz'iak xukuje' jun colob re jitz'abal chiquikul, xequitac'aba' c'u quib chuwäch ri ajawinel pa Israel, xquibij c'u che: “Ri Ben-adad cäbochi'x la rumal chi sacha' la ri u mac, macämisaj la.” Ri Acab xutzelej u bixic: “¿La c'ä c'aslic? ¡Chwe in je ta ne ri wachalal!”

³³ Ri achijab sibalaj utz xquita' wa' jachin jun c'utbal, xquichap c'ut ri tzij ri xubij xquitzelextaj c'ut u bixic che: “¡Ri Ben-adad achalal la!” “¡Jix ba' che u c'amic ulok!” xcha' ri Acab chque. Ri Ben-adad xutac'aba' rib chuwäch ri Acab, ri Acab xupakaba' pa ri u carwaj.

³⁴ Xubij c'ut ri Ben-adad che: “Quebentzelej na ri tinimit tak ri xebutokij ri nu tat che ri awech at; ri at cuya' caban a ch'äcoj pa Damasc, jacha' ri xuban ri nu tat pa Samar.” “In, quinya' nu tzij, catintzokopij bic,” xcha' ri Acab. Jewa' ri xbanic, ri Acab xuban jun c'ulwächinic ruc' ri Ben-adad, xutzokopij c'u bic.

³⁵ C'o c'u jun achi ri are' jun cuc' ri jumulaj k'axal tzij xubij che jun rachil, rumal u takanic ri Ajawaxel: “¡Chabana' jun tok'ob chinasoco'!” Man xraj ta c'ut ri rachil.

³⁶ Xubij c'ut ri k'axal tzij che: “Rumal c'u rech chi man xanimaj ta ri u takanic ri Ajawaxel, cäpe na jun coj chawij xuwi catas awib chwij.” Kas c'u tzij, xuwi xel bic wa' chuwäch ri k'axal tzij, xel ulok jun coj che u c'ulaxic, xcämisax c'u rumal.

³⁷ Xurik chi c'u jun achi ri k'axal tzij, xukuje' xubij chi che chi chusoco', ri achi ri' xuch'ayo xukuje' xusoco.

³⁸ Xbe c'ut ri k'axal tzij che reyexic ri ajawinel pa ri be, u q'uexom rib, u ximom jun atz'iak chque ri u bak'wäch.

³⁹ Aretak c'u cätajin coc'ow ri ajawinel, co xurak u chi' xubij che: “We pataninel ech la ri' are' jun xnabej chuwäch ri ch'o'j, xel ulok jun ajch'o'j chquixo'l ri niq'uiaj chic, xujach jun c'ulel pa nu k'ab. Xubij chwe chi quinchajij, xuya' c'u u bixic chwe chi we quintzokopij bic, quintoj na ruc' ri nu c'aslemal o quintoj na oxib mil (3,000) ch'akatak sak puak che.

⁴⁰ Are' c'u we pataninel ech la xbe u c'u'x che qui banic jule' jastak chic, xutzokopij c'u bic ri ajpache'.” Ri ajawinel re Israel xutzelej u bixic che: “Kas at a k'alajisam awib chi at ajchak'mac a yo'm c'u u bixic ri cakajbej.”

⁴¹ Are' c'u ri k'axal tzij, aninak xuresaxtaj ri atz'iak ri e c'o che ri u bak'wäch, xuch'ob c'u ri ajawinel chi are' jun chque ri e k'axal tak tzij.

⁴² Xubij c'ut ri k'axal tzij che: “Are' jewa' ri cubij ri Ajawaxel: ‘Rumal c'u rech chi xatzopij bic ri achi ri c'okom u cämisaxic rumal, ruc' ri a c'aslemal catoj na ri rech, xukuje' ruc' ri a tinimit catoj na ri u c'aslemal ri u tinimit.’ ”

⁴³ Xbe c'ut ri ajawinel re Israel pa Samar, cabisonic royowal, xunim c'u rib chupam ri rachoch.