Nabe Ajawinelab 19 - Quiché Bible

Xanimaj ri Eliy xbe pa Horeb

¹ Ri Acab xutzijoj che ri Jezabel ronojel ri xuban ri Eliy. Xukuje' ri xuban che u k'atic qui kul conojel tak ri e k'axal u tzij ri Baal.

² Ri Jezabel xutak jun tako'n che u bixic che ri Eliy: “¡We ri at at Eliy, ri in in Jezabel! Chiquiya' c'u c'axalaj c'äjisabal wächaj ri diosib chwe, we je tak wa' chwek, ma ta je nu banom chawe je jas ri xaban chque we e k'axal tzij ri'.”

³ Ri Eliy aretak xuta' chi xak quieb tzij puwi', che c'u u to'ic ri u c'aslemal, xbe pa Beerseb ri c'o pa Juda chila' c'u xuya' wi can ri pataninel re.

⁴ Xbe c'ut chupam ri chaki'j uwo sak, jun k'ij c'ut xbinic, c'ä chuq'uisbalil xet'uyul chuxe' jun alaj che' ri nimak u xak. Sibalaj xurayij ri u cämical, xubij: “¡Chubana' wa', Ajawaxel! ¡Chesaj la ri nu c'aslemal, ri in man are ta in utz na chquiwäch ri e nu mam!”

⁵ Xk'oyi' c'u chila', chuxe' ri alaj che' ri nimak u xak, xc'amataj che waram. Xopan c'u jun tako'n aj caj xuchapo xubij che: “Chatwalijok chatwok c'ut.”

⁶ Xca'y ri Eliy pa tak u xcut, xtaki' c'u u wäch che jun lej ri c'o chuxcut ri u jolom ri chak'ajisam puwi' rachak k'ak' xukuje' jun xaru' joron. Xwalij c'ut. Xwa'ic xukuje' xuq'uianic; xk'oyi' chi c'u jumul.

⁷ Xpe chi c'ut ri aj cajalaj u tako'n ri Ajawaxel chucamul, xuchapo, xubij che: “Chatwalijok, chatwok c'ut, sibalaj c'u naj c'o wi chawe ri catbe wi na.”

⁸ Xwalij ri Eliy, xwa'ic xukuje' xuq'uianic. Ri wa ja' ri xutijo are' xyo'w u chuk'ab che u banic ri cawinak k'ij xukuje' cawinak ak'ab binem ri xubano c'ä xopan na pa Horeb, ri u juyub ri Dios.

⁹ Aretak xopanic, xoc chupam jun pec, chila' xroc'owisaj wi ri chak'ab. Xch'abex c'u rumal ri Ajawaxel, xubij c'u che: “¿Jas caban waral Eliy?”

¹⁰ Ri are' xutzelej u bixic: “Nu no'm nimalaj achixomanic che la, Ajawaxel, Dios ri c'o ronojel u cuinem, rumal rech chi ri aj israelib qui xutum canok ri c'ulwächinic la xukuje' e qui wulim tak ri porobal ri e ech la, ch'ich' c'ut xequicoj che qui cämisaxic tak ri e k'axal tzij la. Xuwi ri in in canajinak canok, cätajin c'u quintzucuxic che resaxic ri nu c'aslemal.”

¹¹ Ri Ajawaxel xubij c'u che: “Chatel ulok chisak, chatac'aba' c'u awib chnuwäch, puwi' ri juyub.” Coc'ow ri Ajawaxel, jun cowilaj quiakik' c'ut ri sibalaj c'o u chuk'ab xujak'ij ri c'ache'laj, xebupaxij ri nimak tak abaj chuwäch ri Ajawaxel; ri Ajawaxel man c'o ta chupam ri quiakik'. Chrij c'ut ri quiakik' xpe chi jun nimalaj cabrakan; ri Ajawaxel mawi c'o chupam ri nimalaj cabrakan.

¹² Chrij ri nimalaj cabrakan xpe jun k'ak'; mawi c'u c'o ri Ajawaxel chupam ri k'ak'. Chrij ri c'u ri k'ak' xtataj jun ch'uch'ujalaj uxlabic ri xak nojimal cätatajic.

¹³ Aretak xuta' ri Eliy, xuch'uk ri u palaj ruc' ri u k'u', xel ulok xcanaj chuchi' ri pec. Xopan c'u jun ch'abal ruc' ri je xubij wa' che: “¿Jas caban chi' Eliy?”

¹⁴ Ri are' xutzelej u bixic: “Nu no'm jun nimalaj achixomanic che la, Ajawaxel, Dios ri c'o ronojel u cuinem, rumal rech chi ri aj israelib qui xutum canok ri c'ulwächinic la, e qui wulim tak ri porobal ri e ech la, ch'ich' c'ut xequicoj che qui cämisaxic tak ri e k'axal tzij la. Xuwi ri in in canajinak canok, cätajin c'u quintzucuxic che resaxic ri nu c'aslemal.”

¹⁵ Xubij c'ut ri Ajawaxel che: “Jät, chattzelej pa ri be ri xatpe wi chatoc'ow chupam ri chaki'j uwo sak re Damasc. Chatasa' c'ut ri Hazael jacha' che ajawinel pa Siriy,

¹⁶ are' c'u ri Jehu, ri' u mam ri Nimsi, jacha' che ajawinel pa Israel; ri Elisey, u c'ojol ri Sapat, aj tinimit re Abel-mehol, chatasa' che a q'uexwäch.

¹⁷ Je c'u ri', ri man cakaj ta pa ri u pa u chi' ri u ch'ich' re ch'o'j ri Hazael, cacämisax na rumal ri Jehu, jachin c'ut ri man cakaj ta pa ri u chi' ri u ch'ich' re ch'o'j ri Jehu, cacämisax na rumal ri Elisey.

¹⁸ Quebenya' c'u na can, pa Israel wukub mil (7,000) winak ri man e xuculinak ta chuwäch ri Baal mawi qui tz'uman.”

U siq'uixic ri Elisey

¹⁹ Ri Eliy xel bic chila' xurik c'ut ri Elisey ri cätajin cuban c'upuj, e benak cablajuj c'ulaj wacax chuwäch, kas are' c'u u c'aninak bic ri q'uisbal c'ulaj. Ri Eliy xkeb chuxcut, xuq'uiak c'ut ri u k'u' chrij.

²⁰ Ri Elisey chanim c'ut xebutzokopij can ri wacax, xxiq'uin chrij ri Eliy, xubij c'u che: “Chinaweyej na quentz'umaj na can ri nu tat xukuje' ri nu nan, che qui ya'ic canok, catin terenej c'u na.” “Cuya' catbec” xcha' ri Eliy, “masach c'u pa jolom ri nu banom chawe.”

²¹ Ri Elisey xutas rib chrij ri Eliy, xbe c'ut xebuc'am quieb ama'ib tak wacax xebupilo, xuban si' che ri queka'bal ri wacax xubol ri ti'j, xebutzuk c'u can ri winak. C'äte c'u ri' xteri' bic chrij ri Eliy xcanaj c'u che u patanixic.