Nabe Ajawinelab 16 - Quiché Bible

¹ Xuya' c'u takanic ri Ajawaxel che ri Jehu, u c'ojol ri Hanani, che u bixic che u c'ulelaxic ri Baas:

² “Ri in xatinwalijisaj chupam ri puc'uc' ulew xatincoj c'u che c'amal u be ri Israel, ri nu tinimit. Are c'u ri at, xak xatjunamataj ruc' ri Jeroboam, a banom chi macuninak ri Israel, ri nu tinimit. Awalijisam ri woyowal qui mac quech tak ri e a mac.

³ Rumal ri', Baas, quenq'uisa' tzij pawi' xukuje' ri e awachalaxic; xak junam quinban na' chque jacha' ri xinban che ri rech ri Jeroboam (ri u tat ri Jeroboam are' ri Nabat).

⁴ Apachin ta ne ri awija'lil ri cacäm pa ri tinimit, xa' tz'i' cätijow na; are' c'u ri cacäm na pa ri juyub chicop ri e c'o qui xic' cätijow na.”

⁵ Ri u q'uisbalil ri Baas, xukuje' ri xubano, xukuje' tak ri e u cuinem, e tz'ibatal chupam ri wuj re ri qui tzijobelil tak ri ajawinelab pa Israel.

⁶ Aretak xcäm ri Baas, xmuk pa Tirs. Are' chi c'u xajawin ri u c'ojol chupam ri u c'olbal, ri Ela u bi'.

⁷ Rumal c'ut ri Jehu ri k'axal tzij, ri u c'ojol ri Hanani, ri Ajawaxel xuya' u bixic ri u c'okoxic ri Baas xukuje' ri rachalaxic, qui mac quech ri itzel tak u banoj ri xebuban chuwäch. Ri Baas xuyac royowal ri Ajawaxel, rumal rech chi ri itzel tak u banoj xejunamataj cuc' ri xebuban ri Jeroboam xukuje' ri e rachalaxic, ri xusachisaj qui wäch.

Cajawinic ri Ela xukuje' ri Zimri pa Israel

⁸ Pa ri juwinak wakib (26) junab ri rajawinic ri As pa Juda, ri Ela, u c'ojol ri Baas, xuchaplej ajawinic puwi' ri Israel pa Tirs, quieb junab c'ut xajawinic;

⁹ are' c'u ri Zimri, jun rach k'atal tzij ri u cojom paquiwi' pa niq'uiaj chque ri carwaj ri e re ch'o'j, xuban jun walijisam ib chrij. C'o jun k'ij aretak c'o ri Ela pa Tirs, chupam ri rachoch ri Arsa, ri chajil jastak rech, xuq'uianic c'ä xk'abar na.

¹⁰ Xak c'u c'ätetal xopan ri Zimri che u cämisaxic, rech cajawin pa ri u c'olbal. Xc'ulmataj wa' pa ri junab juwinak wukub (27) re ri rajawinic ri As pa Juda.

¹¹ Xak xuwi xpaki' ri Zimri puwi' ri tem re ajawibal xuchaplej c'u ajawinic, xebucämisaj conojel ri rachalaxic ri Baas man c'o ta jun achi chque xuc'asba' ta canok, mawi ri rachalaxic, mawi ri junam u wäch ruc', rech man c'o ta jun cuwalijisaj rib chrij.

¹² Je c'u wa' xuban ri Zimri che u sachisaxic u wäch ri rachalaxic ri Baas, je jas ri c'okonic ri u yo'm u bixic ri Ajawaxel puwi' ri Baas rumal ri Jehu, ri k'axal tzij,

¹³ qui mac tak conojel ri e u mac ri Baas xukuje' ri u mac tak ri Ela ri u c'ojol, are c'u wa' ri xebanowic chi xemacun xukuje' ri aj israelib, xquiwalijisaj c'ut ri royowal ri Ajawaxel, ri u Dios ri Israel.

¹⁴ Ri u q'uisbalil ri u tzijobelil ri Ela xukuje' ronojel ri xubano, tz'ibatal chupam ri wuj rech ri qui tzijobelil tak ri ajawinelab re Israel.

¹⁵ Pa ri juwinak wukub (27) junab re ri rajawinic ri As pa Juda, cätajin c'u caquitij qui chuk'ab ri ajch'ojab aj israelib che u ch'äquic ri qui tinimit ri aj pilisteyib ri Jibeton, ri Zimri xuchaplej ajawinic pa Tirs. Xa' c'u wukub k'ij xajawinic,

¹⁶ kas c'u pa ri k'ij aretak ri ajch'ojab ri e c'o che u banic ch'o'j xquetamaj chi ri Zimri xuwalijisaj rib chrij ri ajawinel u cämisam c'ut, conojel c'u ri ajch'ojab ri e c'o pa ri ch'o'j co xquirak qui chi' xquibij chi ri Omri, ri quinimal ri ajch'ojab are' ajawinel pa Israel.

¹⁷ Ri Omri xukuje' conojel ri ajch'ojab aj israelib xquitanaba' u banic ch'o'j ruc' ri Jibeton, xebe che u ch'äquic ri Tirs.

¹⁸ Aretak xril ri Zimri chi xch'äc ri tinimit, xoc chupam ri to'bal ib ri c'o chupam ri rachoch ri ajawinel, xut'ik k'ak' che ri rachoch c'o ri are' chupam, je c'u u camic wa'.

¹⁹ Xc'ulmataj wa' qui mac quech tak ri macaj ri xebubano xukuje' qui mac tak quech ri itzel tak banoj ri xebuban chuwäch ri Ajawaxel, xebuban c'ut ri junam tak macaj ri xebuban ri Jeroboam, ri xebanowic chi xemacun tak ri aj israelib.

²⁰ Ri u tz'akatil ri u tzijobelil ri Zimri xukuje' ri u walijisaxic rib chrij ri ajawinel Ela, tz'ibatal chupam ri wuj rech ri qui tzijobelil tak ri ajawinelab pa Israel.

Rajawinic ri Omri pa Israel

²¹ Are' c'u ri tinimit re Israel xquiban quieb. Niq'uiaj are' ta xcaj chi ri Tibni, u c'ojol ri Jinat, are' ta ajawinel, jujun chi c'ut are ta xcaj chi are ta ri Omri.

²² Chuq'uisbalil, ri e teren chrij ri Omri are' xech'äcan paquiwi' ri e teren chrij ri Tibni (ri u tat ri Tibni are' ri Jinat). Ri Tibni xcämic, rumal c'u ri' ri Omri xcuinic xcanaj che ajawinel.

²³ Ri Omri xuchaplej ajawinic pa Israel pa ri junab juwinak julajuj (31) rech ri rajawinic ri As pa Juda, cablajuj (12) junab c'ut xajawinic, chque wa' xajawin wakib (6) junab pa Tirs.

²⁴ Xulok' pa u k'ab ri Semer ri juyub Samar chi jun sient cawinak job (145) libra ch'akatak tak sak puak, chila' c'u xuyac wi jun tinimit ri xucoj nim tapia chrij ri xucoj Samar che u bi', rumal rech chi ri nabe rajaw ri juyub Semer ri u bi'.

²⁵ Ri e u banoj tak ri Omri itzel xeril ri Ajawaxel, xeboc'ow chi c'u na ri retzelal chquiwäch ri xequiban tak ri ajawinelab ri xeboc'ow nabe chuwäch,

²⁶ xebuban c'ut ri junam tak macaj ri xebuban ri Jeroboam, u c'ojol ri Nabat, ri cumal c'u wa' xubano chi xemacun ri aj israelib, u mac c'ut ri qui k'ijalaxic ri e diosib cumal, xuyac royowal ri Ajawaxel, ri u Dios ri Israel.

²⁷ Ri u tz'akatil ri u tzijobelil ri Omri xukuje' ronojel ri xubano, xukuje' tak ri e u cuinem, e tz'ibatal chupam ri wuj ri e c'o wi ri qui tzijobelil tak ri e cajawinelab ri aj Israel.

²⁸ Aretak xcämic, xmuk pa Samar. Are' chi c'u xajawin ri u c'ojol pa ri u c'olbal, ri Acab u bi'.

Rajawinic ri Acab pa Israel

²⁹ Pa ri juwinak wajxaklajuj (38) junab ri rajawinic ri As pa Juda, ri Acab, u c'ojol ri Omri, xuchaplej ajawinic pa Israel. Juwinak quieb (22) junab c'ut xajawin puwi' ri Israel chupam ri tinimit Samar.

³⁰ Man utz ta c'u xril ri Ajawaxel ri u c'aslemal, nim c'u na ri etzelal ri xebuban chquiwäch ri ajawinelab ri xebajawin nabe chuwäch,

³¹ man xuk'il ta rib che qui banic ri junam tak macaj ri xebuban ri Jeroboam, u c'ojol ri Nabat. Xak c'u xutz'akatisabej chic, xc'uli' ruc' ri Jezabel, u mia'l ri Et-baal, ajawinel pa Sidon, xuya' chi c'u jubik' u wi' rumal ri u k'ijilaxic ri Baal,

³² xuyac c'u jun porobal xukuje' jun rachoch ri Baal pa Samar.

³³ Xukuje' xuban jun u wächbal ri Asera, nim na ri yacbal royowal ri Ajawaxel, ri u Dios ri Israel, chquiwäch ri xquiban conojel tak ri ajawinelab pa Israel ri xebajawin can nabe chuwäch.

³⁴ Pa tak ri u k'ijol ri Acab, ri Hiel, ri aj Betel, xuchap u yaquic ri tinimit Jerico. Aretak xucoj ri u tac'alibal xcäm ri Abiram, ri nabeal u c'ojol, aretak c'u xebucoj tak ri porta, xcäm chic ri Segub, ri u ch'i'p, je xelic jacha' ri xubij ri Ajawaxel rumal ri Josue (ri u tat ri Josue are' ri Nun).