Nabe Ajawinelab 14 - Quiché Bible

Ri Ahiy cuya' ri u bixic ri u kajic ri Jeroboam

¹ Pa ri k'ijol ri', ri Abiy, ri u c'ojol ri Jeroboam, xkaj che yabilal.

² Xubij c'ut ri Jeroboam che ri rixokil: “Jät, chaq'uexa' bic awib rech man cäch'obotaj taj chi at ri wixokil, jät c'u pa Sil. Chila' c'o wi ri Ahiy, ri k'axal tzij ri xbin chwe chi in quinux na ajawinel puwi' we nim tinimit ri'.

³ Chac'ama' bic lajuj caxlanwa, lej xukuje' jun xaru' u juyubal räx cab, jät c'u che rilic rech cubij na chawe jas ri cuc'ulmaj na we alaj ala ri'.”

⁴ Je c'u xuban ri rixokil ri Jeroboam, Xusuc'umaj rib xbe c'u pa Sil, xopan c'u cho rachoch ri Ahiy. Ri Ahiy man cäca'y ta chic, nojimal c'ut cätajin cämoyir rumal ri u rija'l,

⁵ yo'm c'u retamaxic che rumal ri Ajawaxel chi ri rixokil ri Jeroboam copan ruc' che u ch'obic jas cuc'ulmaj na ri ral, ri kajinak che yabilal. Xukuje' xya' retamaxic che ri cutzelej na u bixic che, xya' c'u u bixic che chi u q'uexom rib copanic.

⁶ Aretak ri Ahiy xuta' ri u pa rakan ri ixok ri xoc chuchi' ri oquibal, xubij che: “Chatocok, rixokil ri Jeroboam, ¿Jasche caban awib chi at jun chi wi? Ri in bim chwe chi co catinch'abej na,

⁷ chattzelej ba' chabij che ri Jeroboam chi ri Ajawaxel, ri u Dios ri Israel, u bim: ‘In xatinwesaj chquixo'l ri winak, xinban c'u chawe chi catux c'amal u be ri nu tinimit Israel.

⁸ In xinwesaj ri ajawinic chque ri e rija'lil ri David, che u ya'ic chawe. Are c'u ri at man at junamatajinak ta ruc' ri David ri pataninel wech, ri xebutz'akatisaj tak ri e nu takomal, xinuterenej ruc' ronojel ri ranima', ri xebuban utzalaj tak banoj chnuwäch;

⁹ ri at sibalaj at itzel na chquiwäch ri xec'oji' can nabe chawäch; at, che u yaquic woyowal, e a banom jule' tak diosib chic wächbal tak re räx ch'ich' ri e tzacom pa k'ak', awetzelam c'u nu wäch.

¹⁰ Rumal ri' quinc'am ulok ri c'axc'olil paquiwi' ri awija'lil: quinban na chi quecäm conojel ri awija'l achijab pa Israel; mawi jun cac'asi' ta canok. Quebenmes na bic ri e awija'lil, jacha' ta ne ri quinmes qui mes awaj.

¹¹ Ri e awija'lil ri quecäm chupam ri tinimit quetijow na cumal tz'i'; e are' ri quecäm pa ri juyub quetijow na cumal awaj ri e c'o qui xic', in c'ut, ri Ajawaxel, je nu chomam u banic.’

¹² Are' c'u ri at, ixok, chatwalijok jät cho awachoch. Xak xuwi c'u caya' jun awakan chupam ri tinimit, ri alaj ala cacäm na.

¹³ Ronojel c'ut ri Israel carok'ej na, cämuk c'u na; xuwi c'u rija'lil ri Jeroboam wa' ri cämukic. Chquixo'l c'u conojel ri rija'lil ri Jeroboam, xuwi c'u ri are' u rikom wi ri Ajawaxel, ri u Dios ri Israel, jubik' ri cäkaj chuwäch.

¹⁴ C'äte c'u cucoj na pa Israel jun ajawinel ri cuq'uis na tzij paquiwi' ri e rija'lil ri Jeroboam ri quebajawin ta na, pa ri qui k'ijol. Kas camic cachaptaj bic

¹⁵ ri Ajawaxel cutota' na ri Israel jacha' cuban ri nima' quebutota' tak ri aj. Cubok c'u na chupam we utzalaj ulew ri' ri xuya' chque ri e qui mam, cuq'uiaka' c'u c'ä jela' che ri nima' Euprats, rumal rech chi xebuban qui wächbal tak ri Astarte, are c'u xbanow wa' chi xyactaj royowal ri Ajawaxel.

¹⁶ Ri Ajawaxel cujach na ri Israel qui mac quech ri macaj ri xebuban ri Jeroboam xuban c'ut chi xmacun ri Israel.”

¹⁷ Xwalij c'ut ri rixokil ri Jeroboam xbe c'ut, xopan pa Tirs; xuwi c'u xuxalk'atij ri apal re ri ja, xcäm ri alaj ala.

¹⁸ Ronojel Israel xbe che u mukic xrok'ej c'ut, je xbantajic jas u yo'm u bixic ri Ajawaxel rumal ri k'axal tzij ri Ahiy ri u pataninel.

¹⁹ Ri q'uisbal u tzijobelil ri Jeroboam, ri ch'o'j ri xebuban tak xukuje' ri niq'uiaj u tzijoxic chic ri rajawinic, e tz'ibatal chupam ri wuj ri quech ri qui tzijobelil tak ri ajawinelab re Israel.

²⁰ Ri Jeroboam juwinak quieb (22) junab xajawinic, chwi' ri u cämical xajawin ri Nadab ri u c'ojol.

Ri rajawinic ri Roboam pa Juda

²¹ Pa Juda cätajin cajawin wi ri Roboam, u c'ojol ri Salomon. C'o chi cawinak jun (41) u junab aretak xuchaplej ajawinic, wuklajuj (17) junab xajawin pa Jerusalen, ri tinimit ri xucha' ri Ajawaxel chquixo'l tak ri tinimit chquixo'l tak ri ramak' ri Israel che u jekelibal ri u bi'. Ri u nan ri Roboam, Naama u bi', aj amon c'ut.

²² Ri e u banoj tak ri Roboam e itzel chuwäch ri Ajawaxel, are c'u c'o na ri oyowal ri xquiya' che chquiwäch conojel ri macaj ri xequiban ri e u mam,

²³ xukuje' c'u ri e are' xequiyac k'ijilabal ri quek'ijilax wi tak diosib xequitac'aba' tak abaj xukuje' tastalicalaj tak cuta'm paquiwi' tak ronojel tac'atak tak juyub xukuje' chquixe' conojel jewejak tak che'.

²⁴ Xukuje' tak ri achijab re ri ulew cäquiban ri qui mac ri nim ch'utin jacha' ta ne che jun k'ijilanic, caquiban c'u conojel ri nimak tak etzelal ri e nak'atisam qui banic cumal ri nimak tak tinimit ri e k'ijilal tak diosib ri e resam bic ri Ajawaxel chquiwäch ri aj israelib.

²⁵ Pa ri uro' junab rech ri rajawinic ri Roboam, ri Sisac, ajawinel pa Ejipt, xwalij ulok che ch'ojinic ruc' ri Jerusalen,

²⁶ xutokij bic ri k'inomal ri c'o chupam ri rachoch ri Ajawaxel xukuje' ri c'o chupam ri rachoch ri ajawinel. Ronojel xujoc bic, xukuje' xebuc'am bic ri quetecak tak ch'ich' re k'an puak ri xebuban ri Salomon.

²⁷ Ri ajawinel Roboam xebuban quetecak tak ch'ich' re k'an ch'ich' che qui q'uexwäch, xebujach c'u pa qui k'ab ri e quinimal tak ri ajch'ojab ri quechajin ri oquibal chupam ri rachoch ri ajawinel.

²⁸ Amak'el c'ut aretak ri ajawinel cäbe pa ri rachoch ri Ajawaxel, quecuc'aj bic ri chajinelab. Quequitzelej chi c'u can chupam ri ja ri e chajital wi.

²⁹ Ri u tz'akatil ri u tzijobelil ri Roboam xukuje' ronojel ri xubano, e tz'ibatal chupam ri u wuj ri qui tzijobelil tak ri ajawinelab re Juda.

³⁰ Amak'el xc'oji' ch'o'j chquixo'l ri Roboam ruc' ri Jeroboam,

³¹ aretak c'u xcäm ri Roboam, xmuk cuc' ri e u mam chupam ri u Tinimit ri David. Ri u nan Naama u bi', aj Amon c'ut. Are c'u xajawin na ri Abiam ri u c'ojol che u q'uexwäch.