Nabe Ajawinelab 13 - Quiché Bible

Jun k'axal tzij re Juda cuyaj ri Jeroboam

¹ Aretak ri Jeroboam cätajin cuporoj ri c'oc' k'ol puwi' ri porobal, xopan jun k'axal tzij re Juda pa Betel takom bic rumal ri Ajawaxel.

² Rumal c'ut ri u takanic ri Ajawaxel co xurak u chi' che u c'ulelaxic ri porobal, je xubij wa': “Porobal, porobal: Ri Ajawaxel u bim: ‘Pa ri cajawinic ri e rija'lil ri David calax na jun ac'al, ri cäcoj na Josiy che u bi', ri quebuporoj na pawi' ri e cojol tabal tok'ob paquiwi' ri k'ijilabal ri quek'ijilax wi diosib ri quequiporoj c'oc' tak k'ol pawi'; pawi' c'ut queporox wi na qui bakil winak.’ ”

³ Kas pa ri k'ij ri', ri k'axal tzij xuya' u bixic jun mayibalalaj etal. Xubij: “Are' mayibalalaj etal wa' ri u yo'm u bixic ri Ajawaxel: Ri porobal cuban na ch'akatak ri chaj ri c'o puwi' cujabuj na rib.”

⁴ Aretak ri ajawinel Jeroboam xuta' ri xubij ri k'axal tzij ri cutaklebej na ri porobal ri c'o pa Betel, xulic' ri u k'ab ruc' ri porobal xubij c'ut: “¡Chichapa'!” Are c'u ri u k'ab ri xulic' che u c'utic xche'ar canok man xcuin ta chic xukasaj.

⁵ Pa ri jok'otaj ri', ri porobal xebuban ch'akatak, are c'u ri chaj ri c'o puwi' xejabunic, je jas ri etal ri yo'm rumal ri u takanic ri Ajawaxel.

⁶ Xbe c'u u wäch ri ajawinel ruc' ri k'axal tzij xubij che: “Catinbochi'j chi chatch'aw panuwi' ruc' ri Ajawaxel, rech cacunataj ri nu k'ab.” Ri k'axal tzij xubochi'j ri Ajawaxel, xcunataj c'ut ri u k'ab ri ajawinel, xcanaj jacha' ri nabe.

⁷ Xubij c'ut ri ajawinel che ri k'axal tzij: “Tasaj wuc', jo' cho wachoch, rech catija' juba' a wa, quinya' c'u na jun sipanic chawe.”

⁸ Xutzelej c'u u bix ri k'axal tzij che ri ajawinel: “Pune ta ne cäya' la pa niq'uiaj che ri achoch la chwe, man quinbe ta na uc' la, mawi quinwa' na mawi' quinuq'uian na chupam we c'olbal ri';

⁹ je c'u takanic wa' u yo'm ri Ajawaxel chwe. Xubij chwe: ‘Mat wa'ic, mawi mat uq'uianic, mawi mat tzelej chic pa ri be ri at petinak wi.’ ”

¹⁰ Ri k'axal tzij pa jun be chi xbe wi, rech man catzelej ta chic pa ri be ri xpe wi che ropanem pa Betel.

¹¹ Pa ri k'ijol ri' jekel jun k'axal tzij pa Betel ri nim winak chic, ri xetzijox che cumal ri u c'ojol ronojel ri xuban ri k'axal tzij aj Juda pa ri k'ij ri' pa Betel; xukuje' xquibij che ri qui tat ri xubij ri ajawinel.

¹² Xc'ot c'u qui chi' rumal ri qui tat: “¿Jachique be xutakej?” Ri e u c'ojol xquibij ri be che ri xtzelej wi ri k'axal tzij aj Juda.

¹³ Xubij chque ri e u c'ojol: “Chitasa' rij jun bur chwe.” Je c'u xquibano,

¹⁴ xquiejen c'ut ri k'axal tzij xuterenej bic ri k'axal tzij re Juda. Xurika' t'uyul chuxe' jun bakit, xuc'ot c'u u chi': “¿La at ri' ri k'axal tzij ri petinak pa Juda?” “In ri',” xcha' che.

¹⁵ “Tasaj cho wachoch, chalatija' a caxlanwa awuq'uia' wuc'” xcha' ri k'axal tzij ri nim winak chic.

¹⁶ Ri k'axal tzij aj Juda xutzelej u bixic che: “Man cuya' taj quinwachilaj la bic, mawi quinoc ta chupam ri achoch la, mawi quinwa'ic, mawi quinuq'uian ta uc' la chupam we c'olbal ri';

¹⁷ rumal rech chi ri Ajawaxel u yo'm jun q'uiakalicalaj takanic chwe: ‘Mat wa'ic, mawi mat uq'uian waral, mawi mat tzelej chic chupam ri junam be ri xabinibej ulok.’ ”

¹⁸ Xucoj c'u u chuk'ab ri nim winak: “In xukuje' in k'axal tzij, xak junam jacha' ri at, jun tako'n rech ri Ajawaxel yowinak takanic chwe chi catinc'am bic cho wachoch che u ya'ic a wa awuq'uia'.” Xa c'u ne banoj tzij ri xuban ri nim winak,

¹⁹ ri k'axal tzij re Juda xbe ruc', xwa'ic xukuje' xuq'uian chupam ri rachoch.

²⁰ Aretak c'u e t'uyut'uj pa ri mexa, ri Ajawaxel xuch'abej ri k'axal tzij ri nim winak ri xbanowic chi xtzelej ri k'axal tzij re Juda,

²¹ ruc' c'u rakoj chi'aj xubij we nim winak ri' che we k'axal tzij ri': “Ri Ajawaxel u bim chi rumal rech chi man xanimaj taj ri takanic ri xuya' chawe,

²² xattzelej c'u che u tijic a wa awuq'uia' jawije' ri xuya' wi takanic chawe chi man cabantaj, man cuxlan ta na ri a cuerp chupam ri qui mukbal tak ri e a mam.”

²³ Aretak ri k'axal tzij aj Juda xuq'uis u tijic ri u wa ruq'uia', ri k'axal tzij ri nim winak xutas rij ri bur,

²⁴ xbe c'ut ri k'axal tzij re Juda. Xel c'u ulok jun coj chrij pa ri be xcämisax c'u rumal, ri u cuerp xjile' can pa ri be. Ri bur xukuje' ri coj qui cabichal xecanaj can chuxcut ri cäminak.

²⁵ Xeboc'ow c'u jujun achijab xquil c'ut ri cäminak ri jilin pa ri be, c'ä c'o c'ut ri coj chuxcut. Aretak c'u xebopan pa ri tinimit jawije' ri jekel wi ri k'axal tzij ri nim winak, xquitzijoj ri quilom.

²⁶ Xretamaj, ri k'axal tzij ri nim winak ri xubano chi xtzelej ri jun chic, xurak u chi': “Are' k'axal tzij wa' ri man xunimaj taj ri u takanic ri Ajawaxel. Rumal ri' ri Ajawaxel xujach pa u k'ab jun coj, ri u ch'akatim xucämisaj c'ut, je xelic jas ri xubij ri Ajawaxel che.”

²⁷ Xubij c'u chque ri u c'ojol chi chquitasa' rij jun bur, we alabom ri' je xquibano.

²⁸ Xbe c'ut ri k'axal tzij ri nim winak xurika' ri cäminak jilin pa ri be, c'o ri bur chuxcut xukuje' ri coj man u tijom ta ri cäminak mawi xumuch ta ri bur,

²⁹ ri k'axal tzij ri nim winak xuwalijisaj ri u cuerp ri k'axal tzij re Juda, xuya' chrij ri bur, xtzelejic xuc'am bic chupam ri tinimit che rok'exic u wäch xukuje' che u mukic.

³⁰ Xumuk chupam ri u mukubal, xrok'ej c'ut je xubij wa': “¡Xinban chawe, wachalal!”

³¹ Aretak c'u muktajinak chic, xubij chque ri e u c'ojol: “Aretak quincämic, chinimuku' chupam ri kas junam mukbal ri xinmuk wi we achi ri' rech ri Dios. Chebiya' ri nu bakil cuc' tak ri rech,

³² cätz'akat c'u na ri' ri xuya' u bixic rumal ri u takanic ri Ajawaxel ri cuc'ulmaj na ri porobal ri c'o pa Betel xukuje' ri qui c'okoxic tak ri k'ijilabal ri quek'ijilax wi diosib ri c'o chquipam tak ri tinimit re Samar.”

³³ Pune' je xc'ulmataj wa', ri Jeroboam man xuk'il ta rib che u banic ri etzelal ri cubano, xebucoj e cojol tabal tok'ob chquixo'l ri winak chque tak k'ijilabal ri quek'ijilax wi tak ri diosib. Jachin ri je cäraj cubano, ri Jeroboam quebutas wa' che e cojol tabal tok'ob paquiwi' tak we k'ijilabal ri'.

³⁴ Rumal rech chi je cäban wa' are' xbanowic chi xemacun ri rija'l ri Jeroboam, xukuje' rumal c'u rech wa', xsach qui wäch chi nimalaj conojel.