Nabe Ajawinelab 12 - Quiché Bible

Cuban quieb ri ajawibal

¹ Xbe c'u ri Roboam pa Siquem xukuje' conojel ri aj Israel che u k'alajisaxic chi are' ajawinel.

² Xretamaj c'u ri Jeroboam, u c'ojol ri Nabat, ri c'ä c'o pa Ejipt, ri animajininak wi bic chuwäch ri ajawinel Salomon ri xukuje' xjeki' wi canok.

³ Aretak c'u takom chic u siq'uixic, ri Jeroboam xukuje' ronojel ri tinimit Israel xebe che u tzijobexic ri Roboam, xquibij c'u che:

⁴ “Ri a tat sibalaj c'ax ri xuban chke; are c'u ri camic chawesaj jubik' ri c'axalaj patanijic xukuje' ri c'axalaj eka'n ri u yo'm chkij, catkapatanij c'u na.”

⁵ Ri Roboam xutzelej u bixic chque: “Jix, chixtzelej c'u ulok che wilic pa oxib k'ij.” Ri winak xebec,

⁶ are' c'u ri ajawinel Roboam xuta' u no'j chque ri nimak tak tatayib ri xepatanij che ri Salomon, ri u tat, aretak c'asal wa'. Xuc'ot qui chi': “¿Jas ri no'j cäya' alak chwe ri quintzelej na u bixic chque ri winak?”

⁷ Ri e are' xquitzelej u bixic che: “We cacoj awib che u patanixic we tinimit camic utzalaj tak tzij c'ut ri catzelej u bixic chque, we winak ri' catquipanij na amak'el.”

⁸ Are' c'u ri Roboam man xuya' ta u xiquin che ri no'j ri xquiya' ri nimak tak tatayib, xane' xuta' chi na u no'j chque ri alabom ri junam u q'uiyic cuc' ri cätajin quetoban ruc',

⁹ xuc'ot qui chi': “¿Jas ri no'j quiya' ix chwe ri quintzelej u bixic chque we winak ri' ri qui tz'onon chwe chi quinwesaj jubik' ri eka'n ri xuya' ri nu tat paquiwi'?”

¹⁰ Ri alabom ri' ri junam qui q'uiyic ruc', xquitzelej u bixic che: “We winak ri' ri qui tz'onon chawe chi chawesaj jubik' ri eka'n ri xucoj ri a tat paquiwi', are jewa' chabij chque: ‘We ri nu tat co xixuchapo, ri in c'o chi na jubik' quixinchapo.

¹¹ We ri nu tat xuya' al eka'n chiwij, ri in quinwalobisaj chi na jubik'; we c'u ri are', tz'um xebucoj che i rapuxic, ri in quixinrapuj na cuc' tak rapubal ri c'o ch'ich' chi qui tza'm.’ ”

¹² Churox k'ij xopan chic ri Jeroboam rachil ronojel ri tinimit chuwäch ri Roboam, jacha' ri u bim ri ajawinel chque.

¹³ Are' c'u ri ajawinel sibalaj c'ax ri xutzelej u bixic chque, man xuya' ta u xiquin che ri no'j ri quibim ri nimak tak tatayib che,

¹⁴ are' xuya' u bixic chque ri no'j ri xquibij ri alabom che: chi we ri u tat xuya' jun alalaj eka'n chquij, ri are' cuya' chi na jun chquij ri sibalaj al na, we ri u tat tz'um xebucoj che qui rapuxic, ri are queburapuj na cuc' tak rapubal ri e c'o ch'ich' chi qui tza'm.

¹⁵ Ri ajawinel man xuya' ta u xiquin che ri xubij ri tinimit, rumal rech chi u chomam ri Ajawaxel chi je cac'ulmataj wa' rech cätz'akat ri xubij ri Ajawaxel che ri Jeroboam, ri u c'ojol ri Nabat, rumal ri Ahiy, ri aj Sil.

¹⁶ Aretak ronojel ri tinimit Israel xrilo chi ri ajawinel man xuya' ta u xiquin chque, je u tzelexic u wäch u tzij wa' xequibano: “¡Man c'o ta kech uj ruc' ri David! ¡Man c'o ta jun echbal ri ka c'amom ta kech ruc' ri u c'ojol ri Isayi! ¡Jix cho tak iwachoch aj israelib! ¡Ri David chebuchajij ri rachalaxic!” Chanim xebe ri aj israelib cho tak cachoch.

¹⁷ Are' tak c'ut ri aj israelib ri e jekel chquipam tak ri tinimit ri e c'o pa Juda, ri Roboam xutakej ajawinic paquiwi'.

¹⁸ Aretak c'u ri Roboam xutak bic ri Adoram, ri cojom paquiwi' ri winak ri quebanow ri chac ri man tojom taj, ronojel Israel xoc che u cämisaxic chi abaj. Aninak c'ut xpaki'xtax ri ajawinel Roboam chupam ri u carwaj, xanimajic xbe pa Jerusalen.

¹⁹ Ri Israel je xuban wa' che resaxic rib chuxe' ri cajawinic ri e rija'lil ri David c'ä camic.

²⁰ Aretak xquetamaj ri aj israelib chi tzelejinak ulok ri Jeroboam, xquitak u siq'uixic rech catac'abax chuwäch ri tinimit, xquirak c'u qui chi' che u bixic chi are' ajawinel puwi' ronojel Israel, man c'o ta jun aj israel xcanaj ta can jic che u ternexic ri rajawinic ri rija'l ri David, xuwi c'u xcanaj ri ramak' ri Juda.

²¹ Aretak xopan ri Roboam pa Jerusalen, xebumulij jun sient jumuch' mil (180,000) ajch'ojab ri e cha'tal chquixo'l conojel ri quija'lil ri aj Juda xukuje' chquixo'l ri ramak' ri Benjamin, che u tijic u chuk'ab ruc' ri Israel rech cätz'akat ri rajawinic.

²² Are c'u ri Dios xutzijobej ri Semaiy, achi ri pataninel rech ri Dios, xuya' c'u takanic che:

²³ “Chabij che ri Roboam (ri u tat ri Roboam are' ri Salomon ri are' ajawinel pa Juda), chabij chque conojel ri aj Juda xukuje' chque ri aj Benjamin, xukuje' che ri u tz'akatil ri tinimit,

²⁴ chi quinya' takanic chque chi maquitij qui chuk'ab cuc' ri cachalal aj israelib. Che tzelej conojel cho tak cachoch, rumal rech chi jewa' ri nu chomam u banic.” Aretak we winak ri' xquita' ri cubij ri Ajawaxel chque, xetzelejic, jacha' ri takanic ri u yo'm ri Ajawaxel chque.

Ri Jeroboam cujekeba' ri qui k'ijilaxic tak ri diosib

²⁵ Ri Jeroboam cuban u yaquic ri tinimit Siquem, ri c'o pa tak ri juyub re Eprain, xjeki' c'u chupam. Xuban chi xukuje' u yaquic ri Penuel.

²⁶ Xuchomaj c'ut: “Ri u c'ojol ri David cacuin che u k'axexic ronojel ri ajawibal pa u k'ab,

²⁷ we quebe we winak pa Jerusalen che qui chi'xic tabal tak tok'ob chupam ri rachoch ri Ajawaxel. Cäbe chi c'u na canima' ruc' ri Roboam, ajawinel re Juda quinquicämisaj c'u na ri' quetzelej c'u na ri' ruc' ri Roboam, rajawinel re Juda.”

²⁸ Chomatajinak chi c'ut, ri ajawinel xtakan che qui banic quieb alaj tak ama'ib wacax re k'an puak, xubij c'u che ri tinimit: “Ix, israelib, sibalaj q'ui mul chic ix petinak pa Jerusalen. E c'o tak we e i diosib ri' ri xixesan ulok pa Ejipt.”

²⁹ Xucoj c'u jun pa Betel, jun chi c'ut xucoj pa Dan.

³⁰ Are' c'u xbanow wa' chi xmacun ri Israel, quebe c'u ri winak pa Betel xukuje' pa Dan che qui k'ijilaxic.

³¹ Xebuyac c'u tak k'ijilabal ri quek'ijilax wi diosib. Xebucoj c'u cojol tak tabal tok'ob ri quepe pa tak ri e tinimit, ri man e rech ri tinimit aj levitib taj.

³² Xujekeba' c'u roc'owisaxic jun nimak'ij pa ri olajuj (15) rajilabal ri uwajxak ic', jacha' ri nimak'ij ri cäban pa Juda, kas jewa' xuban pa Betel, xebuchi'j tabal tak tok'ob chquiwäch ri alaj tak ama'ib tak wacax ri e u chacabam chila', xebucoj cojol tabal tok'ob ri quec'oji' chupam ri c'olbal ri quek'ijilax wi diosib ri e u walijisam.

³³ Jeri', pa ri olajuj (15) rajilabal ri uwajxak ic', ri Jeroboam xebuchi'j tabal tok'ob puwi' ri porobal ri xuyac pa Betel. Are k'ij wa' re ri nimak'ij ri xutiq'uiba' u banic xak pa re wi, xuya' c'u u bixic chi are' wa' ri qui nimak'ij ri aj israelib aj k'ijinelab, kas pa ri k'ij ri' xpaki'c jawije' c'o wi ri porobal che u poroxic c'oc' k'ol.