Nabe Ajawinelab 10 - Quiché Bible

Ri ajawinel ixok re Saba cusolij ri Salomon

^1-2 Ri ixok ri cajawin pa Saba xuta' u tzijol ri nimalaj u banic ri Salomon ri u rikom che u ya'ic u k'ij ri Ajawaxel, xbe c'u pa Jerusalen, che rilic we kastzij ri cabixic e ruc'am c'u bic c'axalaj tak c'otoj chi'aj che. Sibalaj c'u wiktalic xopanic, e ruc'am cameyib ri quekam c'oc'al, jumulaj k'an puak, xukuje' je'licalaj tak abaj ri sibalaj pakal cajil. Aretak xoc chuwäch ri Salomon, xebuban ri c'otoj tak chi'aj che ri u chomam u banic,

³ ri Salomon xutzelej qui wäch conojel ri c'otoj tak chi'aj ri xuban che. Man c'o ta jun chque ri c'otoj tak chi'aj ri ma ta xcuin che u tzelexic u wäch.

⁴ Aretak ri ajawinel ixok re Saba xril ri u no'j ri Salomon, xukuje' ri rachoch ri u yacom,

⁵ ri q'uialaj tak jastak ri quecoj chuwäch pa ri mexa, ri qui c'olbal tak ri e rach k'atal tak tzij, ri nimak tak qui banic ri catz'iak ri rajchaquib, ri e ya'l tak u kumubal, xukuje' tak ri tabal tok'ob ri quechajirisaxic ri quebuchi'j pa ri rachoch Dios, sibalaj xmayinic,

⁶ xubij che ri ajawinel: “Ri e banoj la ri xtzijox chwe xukuje' ri e no'j la, kastzij;

⁷ xuwi c'u in cuininak che u cojic camic ri in petinak xukuje' wilom cuc' ri kas e nu bak'wäch. Kastzij, chi mawi ne pa niq'uiaj ri tzijom chwe, ri no'j la xukuje' ri e k'inomal la e c'o na chuwäch ri xinta' u tzijol.

⁸ ¡Sibalaj ba' utz na quech ri e ixokil tak la, sibalaj c'u e c'o wa' we pataninel tak ech la pa quicotemal, ri amak'el e c'o chnakaj la quequitatabej tak ri e aj no'jalaj tak tzij la!

⁹ ¡Tewichital ba' ri Ajawaxel ri Dios la, ri xkaj la chuwäch xujach c'ut ri ajawibal re Israel che la! ¡Rumal ri nimalaj u lok'obal c'u'x ri Ajawaxel ri c'o ruc' amak'el che ri Israel, u banom ajawinel che la rech cak'atan la tzij ruc' colomal xukuje' suq'uilal!”

¹⁰ Ri ixok ajawinel xujach jumuch' wukub (87) quintal k'an puak, jumulaj c'oc'al, xukuje' je'licalaj tak abaj ri pakal cajil. Mawi jumul opaninak pa Israel jumulaj c'oc'al jacha' ri xusipaj ri ixok ajawinel re Saba che ri ajawinel Salomon.

¹¹ C'o chi c'u wi ri', ri k'an puak ri xuc'ama' ulok ri Hiram pa tak ri jucub pa Opir, xukuje' xebuc'am ulok jumulaj che' re q'uisis xukuje' je'licalaj tak abaj ri pakal cajil.

¹² Ri ajawinel xebucoj ri che' q'uisis che tak u k'atibal ri rachoch ri Ajawaxel xukuje' che ri rachoch ajawinel, xukuje' xebucoj che qui banic arp xukuje' nimalaj arp chque tak ri ajk'ojomab. Mawi jumul opaninak, mawi ilom u wäch c'ä camic, jumulaj che' re q'uisis.

¹³ Are' c'u ri ajawinel Salomon xuya' che ri ixok ajawinel re Saba ronojel ri xraj xutz'onoj che, c'o wi na ri' ri xusipaj ri Salomon che pa re wi. Xtzelej c'u ri ixok ajawinel pa ri rulew achilatal cumal ri winak ri e c'o che chajil rech.

Nim u tzijol ri Salomon xukuje' ri u k'inomal

¹⁴ Ri k'an puak ri cuc'am ri Salomon chujunab copan chi quiejeb sient jumuch' quiejeb (484) quintal.

¹⁵ Mawi xijilax ri cuchuj ri caquitoj ri ajc'ayib, xukuje' ri ajlok'omanelab, conojel c'ut ri ajawinelab re Arab xukuje' ri k'atal tak tzij re ri ulew.

¹⁶ Ri ajawinel Salomon xutak qui banic quieb sient (200) nimak tak quetecak tak ch'ich', ri xcoj oxlajuj (13) libra coc' k'an puak che u banic jujun.

¹⁷ Xukuje' xutak qui banic oxib sient (300) ri e quetecak tak ch'ich' ri ch'utik na que k'an puak, ri xcoj che qui banic jujun c'o na jubik' chuwäch oxib libra ruc' job onz, xebuya' c'ut chupam ri rachoch ri cabix “C'ache'laj aj Libano” che.

¹⁸ Xukuje' xutak u banic jun je'licalaj tem re ajawibal re marpil, xuya' c'u takanic chi cach'uk che utzalaj k'an puak.

¹⁹ Ri tem re ajawibal xcoj wakib pakalibal che; ri u tem re ajawibal chrij c'o jun retz'balil quetequic xukuje' tok'ebal pa tak u xcut ri t'uyulibal, ri chacal jun coj pa ri jujun u xcut.

²⁰ Xukuje' c'o cablajuj (12) coj ri e chacachoj pa tak qui xcut ri wakib pakalibal. ¡Mawi jumul yacom ta pa jun ajawibal jastak ri e junam ta ruc' wa'!

²¹ Conojel c'ut ri queruq'uiaj wi ri e ruq'uia' ri ajawinel e re k'an puak, xukuje' conojel ri lak ri e c'o pa ri rachoch ajawinel rech ri “C'ache'laj aj Libano.” Man c'o ta jun jasach re sak puak, pa tak ri u k'ijol ri Salomon man pakal ta rajil wa',

²² ri e u jucub tak ri ajawinel ri quebe pa Tarsis xa' jumul quebec quetzelej ulok pa oxib junab, cachil tak quib cuc' tak ri u jucub ri Hiram, cuc'am ulok k'an puak, sak puak, marpil, c'oyab xukuje' tak juyubal no'sab cotz'i'j quij.

²³ Ri ajawinel Salomon xoc'ow na u banic chquiwäch conojel tak ri ajawinelab ri e c'o cho ri uwächulew pa ri u k'inomal xukuje' ri u no'j.

²⁴ Conojel ri winak cäcaj caquilo xukuje' caquitatabej ri u no'j ri u yo'm ri Dios che,

²⁵ conojel c'ut caquic'am bic jun sipanic che chujunab: jastak re sak puak xukuje' k'an puak, k'ubal, banbal ch'ojibal tak, jastak ri quec'oc'atic, quiejab xukuje' mulayib.

Ri Salomon xebuc'ayij tak carwaj xukuje' tak quiej

²⁶ Ri Salomon xebumulij tak carwaj xukuje' tak ajquiejab. Xebumulij jun mil quiejeb sient (1,400) carwaj xukuje' cablajuj mil (12,000) ajquiejab, ri xebuya' pa tak ri cachoch ri ajch'ojab quech carwaj quech ch'o'j xukuje' chque ri ajch'ojab ri quechajin ri Jerusalen.

²⁷ Ri ajawinel xumulij sak puak pa Jerusalen jacha' ta ne ri qui banom ri abaj xukuje' ri chacalte' jacha' ri qui banom ri qui che'al tak ri juyubal tak higo pa ri lianic.

²⁸ Ri quiej tak che ri Salomon quec'am ulok pa Muzri xukuje' pa Silisiy, are' c'u ri e rajc'ayib quebequilok'o' ulok chila'.

²⁹ Jun carwaj ri quec'am ulok pa Ejipt rajil wakib sient (600) ch'akatak sak puak, are c'u ri jun quiej, jun sient ruc' cawinak lajuj (150). Conojel c'ut ri ajawinelab aj hititib xukuje' ri aj siriyab quequilok' cuc' ri e u tako'n ri Salomon.