Marcos 2 - Quiché Bible

Ri Jesus xucunaj jun winak cäminak u cuerp

¹ E oc'owinak chic quieb oxib k'ij, ri Jesus xopan chic pa Capernaum. Xak xuwi' c'u xetamatajic chi c'o cho jun ja.

² Chanim xquimulij quib q'ui winak, jeri' chi man c'o ta chi c'olbal chque, mawi ne chuchi' ri ja. Ri Jesus cutzijoj c'u ri u tzij ri Dios chque.

³ Xepe c'u quiejeb achijab, qui telem ulok jun cäminak u cuerp chuwäch ri Jesus, e quiejeb ri e teleninak ulok.

⁴ Man xecuin ta c'ut xekeb chuwäch ri Jesus, rumal rech chi e q'ui ri winak e c'olic. Xquesaj apan jubik' u wi' ri ja ri c'o wi, xquiban jun jul, xquikasaj bic ri yawab ri c'o pa jun ch'atum che'.

⁵ Xril c'u ri Jesus ri qui cojonic, xubij che ri achi ri cäminak u cuerp: “Nu c'ojol, ri a mac e cuyutajinak.”

⁶ E t'uyut'oj c'u chila' jujun chque ri ajtijab re ri pixab. Ri e are' xechoman pa canima':

⁷ “¿Jasche je cätzijon wa'? Cuc'ulelaj ri Dios. ¿Jachin ta lo ri cäcuinic cuya' sachbal mac, xane' xak xuwi ri Dios?”

⁸ Xretamaj c'u ri Jesus pa ri ruxlabal ri qui chomanic ri ajtijab pa canima', xubij chque: “¿Jasche je quichomaj wa' pa iwanima'?

⁹ ¿Jachique ri man c'ax taj, ri u bixic che ri cäminak u cuerp: ‘Ri a mac e sachtajinak,’ o ri u bixic: ‘Chatwalijok, chawalijisaj ri a pop, chatbinok?’

¹⁰ Rech ba' quiwetamaj chi ri Rija'l Winak c'o takanic pa u k'ab che u sachic qui mac ri winak cho ri uwächulew, xubij c'u che ri achi ri cäminak u cuerp:

¹¹ ‘Quinbij chawe: Chatwalijok, chawalijisaj bic ri a pop, jät cho awachoch.’ ”

¹² Chanim c'ut xwalijic, xuwalijisaj ri u pop, xel bic chquiwäch conojel. Jeri' chi conojel xquimayo, xquixe'j quib. Xquinimarisaj u k'ij ri Dios xquibij: “Mawi jumul je kilom wa'.”

Ri Jesus xusiq'uij ri Levi

¹³ Ri Jesus xbe chi jumul chuchi' ri cho. Xenakajin q'uialaj winak ruc' xuchaplej c'u qui tijoxic.

¹⁴ Oc'owem cubano, xril ri Levi (u c'ojol ri Alpey) t'uyul jawije' ri cätoj wi alcabal. Ri Jesus xubij che: “Chinaterenej.” Xwalij c'u ri Levi, xuterenej.

¹⁵ Xc'ulmataj c'ut chi ri Jesus c'o pa wa'im pa ri rachoch ri Levi. E q'ui tok'il tak alcabal xukuje' e jule' tak ajmaquib chic e c'o ruc' ri Jesus pa ri mexa e rachil ri e u tijoxelab. E q'ui c'ut ri qui terenem ri Jesus.

¹⁶ Ri ajtijab re ri pixab xukuje' ri pariseyib, aretak xquilo chi ri Jesus cäwa' cuc' “aj maquib” xukuje' tok'il tak alcabal, xquibij chque ri u tijoxelab: “¿Jasche cäwa' ri Jesus cuc' tok'il tak alcabal xukuje' ‘aj maquib’?”

¹⁷ Ri Jesus aretak xuta' wa, xubij chque: “Ri winak ri e utz man rajawaxic ta ajcun chque, xane' ri c'o yabil chque. Man in petinak taj che qui siq'uixic ri e suc', xane' in petinak che qui siq'uixic ajmaquib.”

Ri u cholajil ri man u tijic ta wa

¹⁸ Ri u tijoxelab ri Xuan Bautist xukuje' ri qui tijoxelab ri pariseyib man cätajin ta cäquitij qui wa. Xebopan c'u jujun winak ruc' ri Jesus, xquibij che: “Ri u tijoxelab ri Xuan xukuje' ri qui tijoxelab ri pariseyib man cäquitij ta qui wa. ¿Jas c'u che ri tijoxelab la man je ta cäquibano?”

¹⁹ Ri Jesus xubij chque: “¿La cuya' puch man cäquitij ta qui wa ri e siq'uim pa jun c'ulanem? Aretak c'o ri achajilaxel, man cuya' taj quewa'ic ri e rula'.

²⁰ “Copan c'u na jun k'ij aretak quesax ri achajilaxel chquixo'l, c'äte ri' pa ri k'ij ri' man cätijow ta wa.

²¹ Man c'o ta jun cut'is jun c'ac' c'ojbal che jun k'e'l atz'iak. We ta jeri', ri c'ac' c'ojbal cäresaj bic jubik' che ri k'e'l atz'iak, cänimar c'u ri u tek'tobic.

²² Man c'o ta jun ri cuya' c'ac' u wa'l uva pa k'e'l tak tz'um. We ta jeri', ri c'ac' u wa'l uva quebut'ubij ri' ri k'el tak tz'um, cäsach c'u na u wäch ri' ri u wa'l uva, xukuje' tak ri tz'um. Xane' cäya' ri c'ac' u wa'l uva pa c'ac' tak tz'um.”

Ri tijoxelab xquich'up u jolom trico pa k'ij re uxlanem

²³ Pa jun k'ij re uxlanem, xoc'ow ri Jesus pa tak ri tico'n. Ri u tijoxelab c'ut xquichaplej qui ch'upic u jolom trico.

²⁴ Ri pariseyib xquibij c'u che ri Jesus: “Chawilampe', ¿jasche cäquiban ri awas u banic pa ri k'ij re uxlanem?”

²⁵ Ri Jesus xubij chque: “¿La mawi jumul i siq'uim jas xuban ri David ojer aretak xeq'uetetic, xnumic xukuje' ri e rachil?

²⁶ Xoc ri David pa ri rachoch Dios aretak ri Abiatar are qui nimal ri cojol tabal tok'ob, xutij ri caxlanwa ri yo'm chuwäch ri Dios, xuya' c'u quech ri e rachil. Ri awas cäquitijo, rumal rech chi xak xuwi chque ri cojol tak tabal tok'ob ya'tal wi u tijic.”

²⁷ Xukuje' xubij chque: “Ri k'ij re uxlanem xban rumal quech ri winak. Man are ta xeban ri winak che ri k'ij re uxlanem.

²⁸ Jeri' ri Rija'l Winak c'o xukuje' u takanic puwi' ri k'ij re uxlanem.”