Marcos 13 - Quiché Bible

Ri Jesus xubij chi cäwulix na ri rachoch Dios

¹ Aretak xel ulok ri Jesus pa ri rachoch Dios, jun chque ri u tijoxelab xubij che: “¡Ajtij, chilampe la tak we abaj ri' xukuje' nimak tak ja ri'!”

² Ri Jesus xubij che: “¿La quebawil we nimak tak ja ri'? Copan na jun k'ij aretak man cäcanaj ta can jun abaj puwi' ri jun chic, xane' ronojel cäwulix na.”

Ri etal ri quebantaj na aretak majok ri q'uistajic

³ Aretak xt'uyi' ri Jesus chupam ri qui juyubal tak ri u Che'al Aseitun, chuwäch apan ri rachoch Dios, ri Lu', ri Santiag, ri Xuan xukuje' ri Trix xquita' che xa pa u tuquiel wi.

⁴ Bij la chke: “¿Jampa' quebantaj we jastak ri'? ¿Jas c'u ri etal aretak majok chebantaj ronojel wa'?”

⁵ Ri Jesus xuchaplej u bixic chque: “Chichajij iwib c'o jun mixsubuwic.

⁶ E q'ui quepe na, pa ri nu bi' cäquibij: ‘In ri' ri Crist’. Quequisub na q'ui winak.

⁷ Aretak chito chi e c'o ch'o'j, aretak quita' na u tzijol tak ch'o'j, mixsachic. Rajawaxic c'ut chi je cäc'ulmax na wa'; c'ä majok c'u ri q'uistajic.

⁸ Cäwalij na jun nim tinimit chrij jun nim tinimit chic, cäwalij na jun ajawibal chrij jun ajawibal chic. Cuban na cabrakan pa jalajoj tak c'olbal, quepe na wi'jal. Chaplebal c'u wa' que k'oxowem.

⁹ Ri ix c'ut chichajij iwib. Quixjach c'u na pa tak qui k'ab ri k'atal tak tzij. Quixch'ay na pa tak ri ja ri cäquitijoj wi quib ri aj judeyib che ri pixab. Quixc'am na bic chquiwäch ri c'o takanic pa qui k'ab xukuje' chquiwäch ajawinelab rumal wech in. Jeri' cuya' quixk'alajisan na chwij chquiwäch ri e are'.

¹⁰ Rajawaxic chi nabe cätzijox na ri tzij re colobal ib pa tak conojel nimak tak tinimit.

¹¹ Aretak quixc'am na bic chquiwäch ri k'atal tak tzij, mixe'j iwib, michomaj bic jas ri quibij na. Xane' chitzijoj jas ri cäya' na chiwe pa ri jok'otaj ri'. Man ix ta c'ut ri quixtzijonic, xane' are ri Ruxlabal ri Dios.

¹² E c'o winak quequijach na ri cachalal pa cämisaxic, xukuje' c'o tatayib quequijach na ri calc'ual. E c'o alc'ualaxelab ri cäquiwalijisaj na quib chquij ri qui tat qui nan, quequicämisaj na.

¹³ Quetzelax na i wäch cumal conojel rumal rech ri nu bi'. Apachin c'u ri cuk'i' ri c'ax c'ä pa ri q'uistajic, are' ri' cacolotaj na.

¹⁴ Aretak c'u quiwil ri tz'ilalaj jasach pa ri c'olbal ri man takal ta wi che chi cac'oji' chila', (ri jun ri cusiq'uij we tzij ri', chuch'obo'), c'äte ri' ri e c'o pa Judey chebanimaj bic pa tak ri juyub.

¹⁵ Ri c'o puwi' ri ja, mäkaj ulok moc pa ri ja che u c'amic bic jun jasach.

¹⁶ Ri c'o pa ri juyub, mätzelej ulok che u c'amic bic ri u k'u'.

¹⁷ ¡Tok'ob c'u qui wäch ri ixokib yawab tak winak chic! ¡Tok'ob qui wäch ri ixokib ri quetu'bisanic!

¹⁸ Chitz'onoj che ri Dios chi mäc'ulmax wa' pa ri u k'ijol ri sakloloj tew.

¹⁹ Pa tak ri k'ij ri' quepe na c'axc'olil ri man ilom ta ulok kas pa ri u tiquiritajic ri uwächulew c'ä camic ri xuban ri Dios, mawi cäc'ulmax na.

²⁰ We ta ma ta queco'pix we k'ij ri' rumal ri Ajawaxel, ma ta c'o jun ri cac'asi' ta canok. Rumal c'u quech ri winak ri e u cha'om, cuco'pisaj ri k'ij ri'.

²¹ We c'o c'u jun cubij chiwe: ‘Chiwilampe', waral c'o wi ri Crist’, o ‘Chiwilampe', jela' c'o wi’, micoj ri cubij.

²² Quewalij na winak ri cäquijaluj quib chi e crist, cäquijaluj quib chi e k'axal tak tzij. Quequiban na etal xukuje' mayibal che qui subic we quecuin chque xukuje' ne ri e cha'talic.

²³ Ri ix c'ut chiwila'. Nu bim chi c'u apan ronojel wa' chiwe.”

Ri u tzelejic ulok ri Rija'l Winak

²⁴ “Pa tak c'ut ri k'ij ri', ri cac'ow ri k'ijol rech ri c'axc'olil, ri k'ij cäk'ekumar na, ri ic' man cuya' ta na ri u sakil.

²⁵ Ri ch'imil ri e c'o chicaj quetzak na ulok, ri chuk'ab ri e c'o chicaj queyicopisax na.

²⁶ C'äte ri' quil na ri Rija'l Winak petinak pa tak ri sutz' ruc' nimalaj cuinem, nim u k'ij cäpetic.

²⁷ C'äte ri' quebutak c'u na ri e u tako'nib aj caj, quebumulij na ri e u cha'om, pa ri elebal k'ij, pa ri u kajebal k'ij, ri e c'o pa u moxk'ab xukuje' u wiquiak'ab ri elebal k'ij, c'ä naj che ri uwächulew, ri c'ä naj che ri caj.

²⁸ Chich'obo' ri c'ambal no'j chrij ri u che'al higo: Aretak queräxar ri u k'ab, quetux c'u ri u xak, iweta'm chi petinak chic ri k'aläj.

²⁹ Jeri' xukuje' ri ix, aretak quiwilo chi quebantaj we jastak ri', chich'obo' chi ri Rija'l Winak c'o chic, chi' tak ri ja.

³⁰ Kastzij quinbij chiwe, chi c'ä maja' quecäm ri winak ri e c'o cho ri uwächulew camic, aretak quec'ulmax na conojel we jastak ri'.

³¹ Queboc'ow na ri caj ulew. Are c'u ri nu tzij man queboc'ow taj.

³² Man c'o ta jun reta'm jachique jok'otaj, mawi jachique k'ij cäbantaj na wa'. Man queta'm ta ri tako'nib aj caj, mawi ne ri C'ojolaxel. Xuwi ri Tataxel reta'm.

³³ Chiwila', chixc'asc'atok; man iweta'm ta c'u ri k'ij.

³⁴ Are je jas jun achi ri xbe naj, xuya' can ri rachoch, xuya' can takanic pa qui k'ab ri rajchaquib, xuya' can qui chac chquijujunal. Xtakan che ri chajil uchi'ja chi rajawaxic cäc'asc'atic.

³⁵ Chixc'asc'at ba'. Man iweta'm ta c'ut jampa' cäpe ri rajaw ja, we pa xk'ekal, we pa niq'uiaj ak'ab, we aretak cok' ri ama' ec', we aretak cäsakaric.

³⁶ Chixc'asc'at ba', rech we xa' c'ätetal cäpetic, mixlurika' cätajin quixwaric.

³⁷ Ri quinbij chiwe, quinbij c'u chque conojel: Chixc'asc'atok.”