Marcos 1 - Quiché Bible

Ri Xuan Bautist xtzijon pa ri chaki'j uwo sak

¹ U tiquitajic ri utzalaj u tzijol ri Jesucrist, ri u C'ojol ri Dios.

² Jas ri tz'ibam rumal ri Isaiy ri k'axal tzij: “Chawilampe', quintak bic ri nu tako'n chawäch, ri cusuc'umaj na ri a be.

³ C'o jun ch'abal ri curak u chi' pa ri chaki'j uwo sak, cubij: ‘Chisuc'umaj ri u be ri Ajawaxel, chisuc'umaj ri alaj tak u be.’ ”

⁴ Xc'utun c'u ri Xuan pa ri chaki'j uwo sak xuya' k'alajisanic. Xubij chque ri winak chi chiquik'ila' quib quitanaba' qui banic tak ri macaj cheban ri qui bautism che u c'utic chi quiq'uexom qui c'u'x, quecuy c'u tak ri e qui mac rumal ri Dios.

⁵ E q'ui ri e aj Judey xukuje' e aj Jerusalen xebel ulok che u tatabexic. Quequik'alajisaj tak ri e qui mac, ri Xuan xebuban c'ut ri qui bautism pa ri nima' Jordan che u c'utic chi qui q'uexom qui c'u'x.

⁶ Are c'u ri Xuan u cojom rismal camey che ratz'iak, räx tz'um ri u pas. Ri u wa ruq'uia' e sac' rachil juyubal räx cab.

⁷ Xtzijon c'ut, xubij: “C'o jun petinak chwij ri c'o na u cuinem chnuwäch in. Man takal ta chwe chi quinpachi che qui quiric ri e u c'amal ri u xajäb.

⁸ In quink'alajisaj chi xquiq'uex qui c'u'x aretak xebenban ri qui bautism pa ri ja'; ri cätajin cakepetic quebucoj na pa ri Ruxlabal ri Dios.”

Ri Jesus xban ri u bautism pa ri nima' Jordan rumal ri Xuan

⁹ Pa tak ri k'ij ri', ri Jesus xel ulok pa Nazaret re Galiley. Xban c'u ri u bautism pa ri nima' Jordan rumal ri Xuan.

¹⁰ Pa ri jok'otaj aretak xel ulok chupam ri ja', ri Jesus xrilo chi xejaktaj ri caj, ri Uxlabaxel xkaj ulok puwi', je ta ne u banic jun palomax.

¹¹ Xtataj c'u jun ch'abal chicaj ri xubij: “At ri' ri lok'alaj nu C'ojol, sibalaj quinquicot awuc'.”

Ri Jesus xtakchi'x che mac

¹² Chanim ri Uxlabaxel xuc'am bic ri Jesus pa ri chaki'j uwo sak.

¹³ Xc'oji' cawinak k'ij pa ri chaki'j uwo sak, xtakchi'x che mac rumal ri Satanas. Xc'oji' cuc' ri juyubal tak awaj. Cäpatanix c'u cumal ri tako'nixelab aj caj.

Ri Jesus xuchap ri u chac pa Galiley

¹⁴ Cojom c'u ri Xuan pa che', ri Jesus xbe pa Galiley, xutzijoj ri utzalaj tak u tzij ri Dios chque ri winak.

¹⁵ Xubij: “Xtz'akat ronojel, xopan ri k'ij. Nakaj chic c'o wi ri rajawibal ri Dios. Chiq'uexa' i c'u'x, chixcojon che ri utzalaj tak u tzij.”

Ri Jesus xebusiq'uij quiejeb chapal tak cär

¹⁶ Xoc'ow c'u ri Jesus chuchi' ri cho re Galiley. Chila' xril wi ri Simon rachil ri Trix ri rachalal. Ri e are' cätajin cäquiq'uiak ri c'at chapbal cär pa ri cho, e chapal tak cär c'ut.

¹⁷ Ri Jesus xubij chque: “Chixteren chwij, quinban c'u na chi quixux chapal tak winak.”

¹⁸ Chanim xequiya' can ri qui c'at, xquiterenej.

¹⁹ Oc'owinak chi c'u apan jubik', ri Jesus xril ri Santiag (u c'ojol ri Zebedey) rachil ri Xuan ri rachalal. E c'o pa jun jucub, quequic'ojoj ri qui c'at.

²⁰ Ri Jesus xebusiq'uij. Ri e are' xquiya' can ri qui tat, ri Zebedey, pa ri jucub e rachil ri rajchaquib, xebe ruc' ri Jesus.

Jun achi c'o itzel uxlabal che

²¹ Xebopan pa Capernaum. Pa ri k'ij re uxlanem, ri Jesus xoc pa ri ja ri cäquitijoj wi quib ri aj judeyib che ri pixab, cätijon c'u chila'.

²² Ri winak xquimay ri u tijonic, rumal rech chi quebutijoj ruc' takanic. Man junam ta ruc' ri cäquiban ri ajtijab re ri pixab.

²³ C'o c'u apan pa ri ja ri caquitijoj wi quib ri aj judeyib che ri pixab, jun achi ri c'o jun itzel uxlabal che. Ri xurak u chi',

²⁴ xubij: “¿Jas awe chke, Jesus aj Nazaret? ¿La at petinak che u sachic ka wäch? In quinch'ob a wäch, weta'm c'ut chi at ri Tastalic rumal ri Dios.”

²⁵ Ri Jesus xuyaj ri itzel uxlabal, xubij: “Chatz'apij u pa chi'. Chatel che ri achi.”

²⁶ Ri itzel uxlabal xuyäcya' ri achi, xurakakej u chi', xel bic che.

²⁷ Conojel xquimayo, xquixe'j quib. Jeri' chi xquic'otola' qui chi', xquibij: “¿Jas wa'? ¡Are' cuya' jun c'ac' tijonic, c'o takanic pa u k'ab! ¡Cätakan paquiwi' ri itzel tak uxlabal, queniman c'u che!”

²⁸ Chanim xel u tzijol ri Jesus pa ronojel c'olbal ri c'o chunakaj ri Galiley.

Ri Jesus xucunaj ri u ji' chuchu' ri Lu'

²⁹ Chanim xebel bic ri Jesus pa ri ja ri cäquitijoj wi quib ri aj judeyib che ri pixab. Xopan cho cachoch ri Simon xukuje' ri Trix, e rachilam c'u ri Santiag xukuje' ri Xuan.

³⁰ Ri u ji' chuchu' ri Simon kajinak pa ch'at, c'o nimalaj k'ak' chrij. Chanim c'ut xquitzijoj ri yawab che ri Jesus.

³¹ Ri Jesus xkeb ocok ruc' ri chuchu', xuchap che ri u k'ab, xuwalijisaj. Chanim xtäni' ri k'ak' chrij, xuchaplej c'u qui patanixic.

Ri Jesus xebucunaj e q'ui yawabib

³² Aretak xk'ekal chic, kajem cuban ri k'ij, xec'am ulok chuwäch ri Jesus conojel ri yawabib xukuje' ri winak ri c'o itzel tak uxlabal chque.

³³ Conojel ri aj tinimit xquimulij quib chuchi' ri ja.

³⁴ Ri Jesus xebucunaj q'ui yawabib ri e c'o q'ui qui wäch yabilal chque. Xeresaj bic e q'ui itzel tak uxlabal. Man cuya' ta c'u chque ri itzel tak uxlabal chi quech'awic, rumal rech chi queta'm u wäch.

Ri Jesus xtzijon pa Galiley

³⁵ Sibalaj ak'ab ri Jesus xwalijic, c'ä majok cäsakaric. Xel bic, xbe pa jun c'olbal cätz'inowic, xuban ch'awem ruc' Dios chila'.

³⁶ Ri Simon cuc' ri rachil xequitzucuj ri Jesus.

³⁷ Xequirika', xquibij che: “Cätzucux la cumal conojel ri winak.”

³⁸ Ri Jesus xubij chque: “Jo' pa jule' tak c'olbal chic ri c'o nakaj, che u ya'ic we tijonic ri' chque ri winak ri e c'o chila'. Che c'u wa' in petinak wi.”

³⁹ Xbin pa ronojel Galiley, xtzijon pa tak ri ja ri cäquitijoj wi quib ri aj judeyib che ri pixab, xeresaj itzel tak uxlabal chque ri winak.

Ri Jesus xucunaj jun winak c'o ch'a'c chrij

⁴⁰ Xpe jun achi c'o ch'a'c chrij, xopan ruc' ri Jesus. Xxuqui' chuwäch, xubochi'j, xubij che: “We caj la, cäcuin la che nu cunaxic rech quinux ch'ajch'oj.”

⁴¹ Ri Jesus xel u c'u'x che, xuyuk ri u k'ab, xuchap ocok, xubij: “Quinwaj, chatux ch'ajch'oj.”

⁴² Chanim xel ri ch'a'c che, xux ch'ajch'oj.

⁴³ Ri Jesus sibalaj xupixbej ri achi, xutak bic,

⁴⁴ xubij che: “Chawila' c'o jas mabij che jachin jun. Xane' jät, chac'utu' awib chuwäch ri cojol tabal tok'ob. Chaya' ri sipanic ri xtakan wi ri Moises che k'alajisanic chquiwäch chi at ch'ajch'oj chic.”

⁴⁵ Aretak elinak chi bic ri achi, sibalaj xutzijoj ri xbanic. Je c'u ri' ri Jesus man cäcuin ta chic coc bic chi sakil pa tak ri tinimit, xane' cacanaj can chquij tak ri tinimit pa tak c'olbal ri man e c'o ta wi winak. Xebel c'u ulok ri winak pa conojel tak tinimit, che rilic.