Juyuwem 5 - Quiché Bible

Uro' juyuwem

¹ Chnataj che la, Ajawaxel, ri ka c'ulmam; ca'y la chke, chila la ri ka yok'ic ri cäbanic.

² Ronojel ri kech oquinak pa qui k'ab ri winak ri man e ka winakil taj; camic ri kachoch e quech chic ri winak ri man keta'm ta qui wäch.

³ Uj canajinak minorib, man c'o ta ka tat; ri e ka nan e canajinak e jacha' ta ne malca'nib.

⁴ ¡Ri kas ka ja' rajawaxic na u lok'ic kumal; ri kas ka si' rajawaxic na u lok'ic kumal!

⁵ Cojom jun eka'bal chrij ka wi'; cujcosic, man caya' ta c'u chke chi cujuxlanic.

⁶ Rech cätz'akat ri cäkatijo cäkalic ri ka k'ab chque ri aj ejiptib xukuje' chque ri aj siriyab.

⁷ Ri e ka tat xemacunic, man e c'o ta chi c'ut, uj c'ut ri uj ekaninak ri qui chak'maquil.

⁸ Camic are quetakan ri pataninelab lok'om pakawi', man c'o ta c'u jachin cujto'tajisan ta pa qui k'ab.

⁹ Che u rikic ri ka wa xak quieb tzij cubij pakawi' qui mac quech ri e banal tak ch'o'j ri e c'o chupam ri chaki'j uwo sak.

¹⁰ Ri ka tz'umal canicowic jacha' jun jorno, rumal ri nimalaj k'ak' ri cuya' ri wi'jal chke.

¹¹ Pa Sion xukuje' chquipam tak ri tinimit re Juda, ixokib xukuje' alitomab e nakom.

¹² Ri e c'ämal tak ka be xetzayibax chque tak ri qui k'ab, ri nimak tak tatayib man nim ta xeilic.

¹³ Ri achijab ri sibalaj nimak na qui chuk'ab xecoj che quienic; ri c'ojolab xekaj chuxe' ri ralal ri si'.

¹⁴ Man e c'o ta chi nimak tak tatayib che tak ri e u chi' ri tinimit; man quetataj ta chic ri qui bixonic tak ri c'ojolab.

¹⁵ Man c'o ta chi ka quicotemal chupam ri kanima'; ri e ka xojoj re jajatem xeq'uis ruc' bis.

¹⁶ Xtzak ri ka corona ri c'o che ri ka jolom; ¡tok'ob ka wäch, chi uj macuninak!

¹⁷ Rumal rech wa' yawabarinak ri kanima'; rumal rech wa' sutz'arinak ri ka bakwäch.

¹⁸ Ri juyub aj Sion jumulaj yojyobic; quebinicat tak ri yac paquiwi'.

¹⁹ Are c'u ri lal, Ajawaxel, amak'el cajawin na la; ¡kas amak'el xak lal c'o wi chupam ri tem re ajawibal la!

²⁰ ¿Jas ta c'u che kas xa' jumul uj sachisam la pa jolom la? ¿Jas ta c'u che cujwonoba' la canok q'ui k'ijol?

²¹ ¡Bana' la chke chi chujtzelej uc' la, Ajawaxel cujtzelej c'u na! ¡Bana' la chi ri ka c'aslemal chi chux chi na jumul jas ri u banom can nabe!

²² Are c'u ri lal kas uj tzakom la canok; ri oyowal la kuc' kas oc'owinak u wi'.