Juyuwem 4 - Quiché Bible

Ucaj juyuwem

¹ ¡E k'ekarinak c'ut ri k'an puak! ¡U tzakom ri u ruc'upinic ri coc'alaj k'an puak! ¡E jabuninak pa conojel tak ri xquina ri abaj tak rech ri tastalic k'ijilabal!

² Ri e aj Sion, sibalaj nimak qui k'ij, ri c'o na cajil chuwäch ri k'an puak camic e xa' je quebil chic e jacha' bo'j re t'ac ri banom rumal apachique banal bo'j.

³ Xukuje' ne ri catitab ri xexalaj tak awajib caquiya' ri qui tu' quequitubisaj c'u ne ri alaj tak cal, are c'u ri u chuch ri nu tinimit co ranima', c'o ranima' jacha' jun abestrus aj chaki'j uwo sak.

⁴ Sibalaj cachaki'j qui chi' ri ac'alab ri c'a quetunic canaq'ui c'ut ri cak' pa qui chi'. Ri ac'alab caquitz'onoj qui wa man c'o ta c'u jachin ri cayo'w ta chque.

⁵ Ri sibalaj je'l u tzukic quib caquiban nabe, camic quecäm rumal wi'jal xo'l tak ri ja pa ri tinimit. Ri xeq'uiy pa qui niq'uijil tak ri k'inomal, camic e jekel pa tixbal tak mes.

⁶ Ri retzelal ri u chuch ri nu u tinimit c'o na chuwäch ri macaj ri xuban ri Sodom, ri xa' pa jok'otaj xsachisax u wäch man c'o ta c'u jun ri xelch'ojin ta ruc'.

⁷ Ri rachijab ri e cha'talic c'o na ri qui sakil chuwäch ri tew, c'o na ri qui sakil chuwäch ri leche; ri qui cuerp c'o na qui quiäkal chuwäch ri quiäk abaj ri coral; ri e u je'lical ri cakan qui k'ab e jacha' ri räx abaj ri sapir.

⁸ Are c'u ri camic c'o na ri qui k'ekal chquiwäch ri k'ekumalil; man c'o ta jachin jun cach'obow ta chquiwäch xo'l tak ri ja re ri tinimit. Ri qui tz'umal quenaq'ui cho tak ri qui bakil, ¡e uxinak chaki'j jacha' ri si'!

⁹ Are utz na quech ri xecäm chupam ri ch'o'j chquiwäch ri xecäm rumal wi'jal, rumal rech chi nojimal xecäm wa' aretak xeq'uis tak ri qui wächinic ri ulew.

¹⁰ Cuc' tak ri kas qui k'ab, ixokib ri ch'uch'uj canima' xequitzacala' tak ri cal; ri kas e cal xebajwataj che qui wa cuq'uia' aretak xsach u wäch ri u chuch ri nu tinimit.

¹¹ Ri Ajawaxel xukasaj ronojel ri royowal xutzopij ri u c'amal ri u k'ak'al ri royowal; xut'ik k'ak' che ri Sion xusachisaj c'u u wäch c'ä chuxe'.

¹² Mawi jubik' xquicoj tak ri ajawinelab re ri uwächulew, conojel ri quebajawin cho ri uwächulew, chi ri c'ulel ri banal c'ulelanic, coc ta na pa tak ri e rok'ibal ri Jerusalen.

¹³ ¡Ronojel u mac rech ri qui mac ri e k'axal tzij ri e c'o cuc', qui mac ri quetzelal tak ri e cojol tabal tok'ob, ri xquitix quic' kas chupam ri nimalaj tinimit ri man c'o ta u mac!

¹⁴ Ruc' queblan c'uxaj quebinic e jacha' ta ne moyab, xo'l tak ri ja pa ri tinimit; sibalaj e tz'ilotajinak rumal quic' chi man c'o ta jun cuchajij ta anima' cunak ta ri catz'iak.

¹⁵ Ruc' rakoj chi'aj xbix chque: “¡Chitasa' iwib, chitasa' iwib; e ch'uluj tak winak, mebinako! Xak e wacatelab ri man quejeki' taj, man ya'tal ta chque chi caquitakej c'aslem waral, quecha' ri e k'ijilal tak diosib.”

¹⁶ Ri u wächbal ri Ajawaxel xejabunic, man xuya' ta chi u wäch chque. Man nim ta chi xebil wi ri e cojol tabal tok'ob mawi xtok'obisax qui wäch ri ri'jab tak winak.

¹⁷ Cuc' ri ka bak'wäch ri e cosinak, uj c'asc'atinak c'ut, xak lok' keyem ri to'banic. Xak keyem ri ropanem jun tinimit ri man cacuin taj catobanic.

¹⁸ Xak c'u uj queyem pa kakan; man cujcuin taj cujel ta bic xo'l tak ri be pa ri tinimit. Ri q'uisbal u sachisaxic ka wäch nakaj c'o wi, opaninak ri ka k'ijol; ¡opaninak c'ut ri q'uisbal ka k'ij!

¹⁹ C'o na ri canibal chquiwäch tak ri cot ri querapin cho ri caj ri uj okataninak; cuj qui terenej pa kakan pa tak ri juyub, ¡quequicoj c'amibal chkawäch pa ri chaki'j uwo sak!

²⁰ Ri cha'tal rumal ri Ajawaxel oquisam pa che', ri cuya' chajin anima' che ri ka c'aslemal, ri ajawinel ri xkabij wi: “Chuxe' ri u mujal cujjeki' wi na chquixo'l tak ri tinimit.”

²¹ ¡Chattzenok, chatjajatok, nim tinimit aj Edom; at ri catajawin chupam ri rulew ri Uz! ¡Xukuje' chawe at copan wi na ri jutrik' c'ayil, cätux c'u na can k'abarel xukuje' ch'analic!

²² Xq'uis ri u c'äjisaxic a wäch, tinimit aj Sion, ri Ajawaxel man catuc'am ta chi bic pa jun ulew chic. Cuc'äjisaj c'u na u wäch ri awetzelal, nim tinimit aj Edom, quebuya' c'u na tak ri e a mac chisak.