Juyuwem 3 - Quiché Bible

Urox juyuwem

¹ In ri in oc'owinak chupam ri rikoj c'ax chquixe' ri e u xuk'unic tak ri royowal ri Ajawaxel.

² In u c'amom bic chquipam k'ekumalaj tak c'olbal, u banom chwe chi in bininak pa k'ekumalaj tak be;

³ jumul camul pa apachique jok'otaj, cutak ulok ri c'ax panuwi'.

⁴ U banom chi ri'jobinak ri nu ti'jal xukuje' ri nu tz'umal, e u c'äjim tak ri nu bakil;

⁵ u walijisam jun sutibal wij jun c'ayilaj k'atibal xukuje' rikoj tak c'ax

⁶ u banom chwe chi in jekelinak pa k'ekumalil, jacha' ri xecäm sibalaj ojer.

⁷ Xinutz'apij chupam jun k'atibal ri man c'o ta wi elebal ib; xinuxuculej cuc' alalaj tak tikom tak ch'ich';

⁸ pune' xinrak nu chi' che u tz'onoxic to'banic, man c'o ta xubij u c'u'x chque tak ri e nu bochi'nic;

⁹ xuk'atij ri nu be cumal nimak tak tapia re abaj, ¡xuq'uex ri u beya'l tak ri nu be!

¹⁰ Ri are' uxinak jun coj chwe ri u c'u'm rib, jacha' jun os ri cuq'uiak' ta rib chwij.

¹¹ In u jech'obisam che ri nu be, in u jisom, ¡in u nojisam che xibin ib!

¹² ¡Xutanij ri q'uiakbal ch'ab xinutac'aba' c'ut rech chwe in quebuq'uiak wi ri e u ch'ab!

¹³ Ri ch'ab c'ut ri e u q'uiakom ri Ajawaxel sibalaj naj e t'ist'obinak bic chwe.

¹⁴ Conojel ri e nu winakil quetz'en chwe; jok'otaj chi jok'otaj in u cach' ri etz'ben wächaj ri cäquiban chwe.

¹⁵ Ri Ajawaxel in u nojisam chque c'ayil; c'a ri uq'uia' ri u yo'm chwe.

¹⁶ Xebuc'äjij tak ri nu ware cho ri ulew; xuban chwe chi xinti' ri puc'uc' ulew.

¹⁷ Ri jamaril najtininak chwe sachinak chic pa nu jolom ri c'olem pa utzil.

¹⁸ Oquinak chi c'u ne pa nu jolom chi cäminak chic ri jicomalaj weyebal c'u'x chrij ri Ajawaxel.

¹⁹ Cänataj ri nu bis xukuje' ri nu tuquelal chwe, ri nu c'ayil xukuje' ri nu rikoj c'ax;

²⁰ quinoc che u chomaxic wa' cäpe c'u wanima'.

²¹ Jun jasach c'ut quinwaj chi ma ta cäsach pa nu jolom quinjiquiba' c'ut ri weyebal c'u'x chrij:

²² Ri u lok'ok'ebal c'u'x ri Ajawaxel man c'o ta u q'uisic, mawi quetzaj taj ri e rutzil.

²³ Ak'abibal chi ak'abibal quec'ac'aric; ¡Sibalaj nim ri u jiquil!

²⁴ Quinbij c'u chwe chbil wib: ¡Ri Ajawaxel are' ronojel chwe in; rumal ri' chrij are' quinjiquiba' wi nu c'u'x!

²⁵ Ri Ajawaxel utz, cuc' ri caquicu'ba' qui c'u'x chrij, cuc' ri quenakajin che.

²⁶ Are utz na cakeyej ri u to'banic ri Ajawaxel man ruc' ta ch'ach'atem.

²⁷ Are utz na che ri winak we cucoj rib chuxe' ri eka'bal pa ri u ch'utinal.

²⁸ Ri winak rajawaxic cacanaj u tuquel mach'ach'at c'ut aretak cätak che u banic rumal ri Ajawaxel;

²⁹ rajawaxic che, cumach'irisaj rib cutz'umaj ri ulew, craj ne c'ä c'o eyebal c'uxaj che;

³⁰ rajawaxic chuchi'j ri u perajil ri u palaj chuwäch ri casocowic, chutakej c'u u c'ulaxic ri c'ax.

³¹ Ri Ajawaxel man xa' ta jumul ri' uj ta u tzakom ta canok.

³² Pune' ta cubano chi cäriktaj c'ax, quel c'u na u c'u'x xukuje', rumal rech chi man c'o ta je ri u lok'ok'ebal c'uxaj.

³³ Man c'u cakaj ta chuwäch u banic c'ax mawi ri u banic k'oxomal chque ri winak.

³⁴ Ri quixak'alexic ri e c'o pa che' ri e aj tinimitib man ruc' ta tok'obisam wächaj.

³⁵ Ri man u banic ta suq'uilal che jun winak jacha' ri ya'tal che kas chuwäch ri Aj Chicajil,

³⁶ ri u jech'obisaxic ri u banic ri suq'uilal puwi' jun il e jastak wa' ri quebuc'okoj ri Ajawaxel.

³⁷ Aretak c'o jas caya' u bixic, aretak c'o c'ulmatajinak are' c'ut ri Ajawaxel u takom u banic.

³⁸ Ri e utzil tak xukuje' tak ri etzelal quepetic rumal rech chi je cubij ri Aj Chicajil.

³⁹ Uxinak c'ut ri winak jun ajmac. ¿Jas ta ri cuch'ach'atej chupam we c'aslemal ri'?

⁴⁰ Kas utz u nic'oxic ri ka c'aslemal ka bana', chujtzelej c'ut ruc' ri Ajawaxel.

⁴¹ Chekapakaba' chuwäch ri Dios ri c'o chicaj ri e ka chomanic xukuje' tak ri ka ch'awem ruc' Dios.

⁴² Ri e ka mac tak xukuje' tak ri e ka c'ulelanic, ¿la ma ta casach ka lo mac chque wa'?

⁴³ Xujsutij la ruc' ri oyowal la, xujterenej la pa kakan, ¡xesaj la ri ka c'aslemal man xcoj ta la tok'obisam wächaj!

⁴⁴ Xabolk'otij ib la chupam jun sutz' rech man quetatabej ta la ri e ka bochi'nic.

⁴⁵ Uj yo'm la pa nimalaj yok'ical chquiwäch conojel ri winak.

⁴⁶ Conojel ri qui banom qui c'ulel chke caquijak ri qui chi' che ka yok'ic;

⁴⁷ xibin tak ib, c'amibal tak, yojinic xukuje' etzeletajic, ¡are wa' ri uj kajbeninak!

⁴⁸ Nima' re u wa'l tak wächaj quebel ulok chque ri e nu bak'wäch chuwäch ri u sachisaxic u wäch ri lok'alaj ka tinimit.

⁴⁹ Quebok' ri nu bak'wäch man quebuxlan taj, man c'o ta c'u uxlanic.

⁵⁰ C'ä ri Ajawaxel ri c'o pa ri caj caca'y na ulok chke chila' chicaj.

⁵¹ Quebopan ri e u k'oxomal ri nu bak'wäch c'ä ruc' ri wanima', rumal ri xquic'ulmaj ri e u mia'l ri nu tinimit.

⁵² Man c'o ta jas weklem, ri quinquic'ulelaj in kajinak pa qui k'ab jacha' ta ne jun chicop ri c'o ri u xic';

⁵³ in c'aslic xinquimuk chupam jun c'ua', xquichuk c'u ri u wi' ruc' jun abaj.

⁵⁴ Ri ja' xinumuk ronojel, xinchomaj c'ut “Sachinak ba' nu wäch.”

⁵⁵ In, Ajawaxel, quinataj ri bi' la kas c'ä chupam ri c'ua':

⁵⁶ chtatabej la ri nu ch'abal; choc la il chque tak ri nu bochi'nic.

⁵⁷ Pa ri k'ij ri chinsiq'uin che la saj la wuc', chbij c'u la chwe: “Maxe'j awib.”

⁵⁸ Chinto' la, Ajawaxel, chupam ri nu tijoj chuk'ab, ¡Chto'tajisaj la ri nu c'aslemal!

⁵⁹ Chila la Ajawaxel, ri man suq'uilal taj ri e nu coch'om, ¡chbana' ba' la ri suq'uilal chwe!

⁶⁰ Chila la tak ri qui rayinic che nu ch'äquic xukuje' tak conojel ri qui chomanic che u banic c'ax chwe.

⁶¹ Chetatabej la Ajawaxel, ri e qui il tzakoj xukuje' conojel tak ri qui chomanic che u banic c'ax chwe;

⁶² ri e qui yok'onic tak ri qui banom qui c'ulel chwe, ri xak amak'el quinquiyoko' che u banic c'ax chwe.

⁶³ ¡Chila la chi pa conojel tak ri e qui banoj cäquetz'bej nu wäch!

⁶⁴ Chya' ba' la chque, Ajawaxel, ri takal chque, chya' ba' la chque jachique tak ri e takal chque tak ri e qui banoj.

⁶⁵ Chabajirisaj ri qui ch'obonic, chkasaj la ri c'okonic paquiwi'.

⁶⁶ Chebeterenej la pa cakan ruc' oyowal, Ajawaxel, ¡bana' la chi chsach qui wäch cho we uwächulew ri'!