Juyuwem 2 - Quiché Bible

Ucab juyuwem

¹ ¡Sibalaj nim ri royowal ri Ajawaxel, chi u k'ekumarisam ri je'lalaj Sion! U t'akim ri u je'lical ri Israel pa ulew, jacha' ri u najil ri caj ruc' ri ulew; mawi c'u ne xnataj ta che, chupam ri royowal ri u tac'alibal ri rakan.

² Ri Ajawaxel man xutac'aba' ta can mawi jun chque ri e rachoch ri Jacob; chupam jok'otaj royowal u yojim ri e to'bal rib ri je'lalaj Juda; e u t'akim pa ulew, e u mach'irisam, ri ajawibal xukuje' tak ri e u k'atal tak tzij.

³ Aretak xnicow ri royowal, xa' jut'oy xuya' che ronojel ri u cuinem ri Israel. Xuk'il ri u to'banic ri u cuinem chke aretak xujbe che u c'ulaxic kib ruc' ri c'ulel; ¡u t'ikom jun k'ak' pa Jacob jun k'ak' ri cujarisaj ronojel ri curiko!

⁴ Ri Ajawaxel, jacha' ta ne jun c'ulel, xutanij ri q'uiakbal ch'ab, xucoj u chuk'ab ri u k'ab; junam ruc' jun c'ulelanel, xuc'äjij ri sibalaj je'l quilic; jacha' jun k'ak', xuq'uiak ri royowal paquiwi' ri winak ri e c'o chupam ri je'lalaj Sion.

⁵ Ri Ajawaxel je xubano jacha' cuban jun c'ulel: xuq'uistzij puwi' ri Israel; xebut'akij conojel tak ri nimak tak cachoch, xebut'akij tak ri e to'bal tak rib, xunojisaj ri je'lalaj Juda che c'axcolil chrij c'axc'olil.

⁶ Jacha' jun eläk'om, xutokij ri u k'ijilabal xuyojij ri c'olbal ri queban wi ri mulin tak ib. Ri Ajawaxel xubano chi pa Sion quesach pa qui jolom coc'owisaxic tak ri e nimak'ij xukuje' ri k'ij que uxlanem. Pa ri u k'ak'al ri royowal, xuxutuj ri ajawinel xukuje' ri cojol tabal tok'ob.

⁷ Ri Ajawaxel u xutum ri u porobal wi tabal tok'ob che, retzelam u wäch ri cäk'ijilax wi; e u jachom tak pa u k'ab ri c'ulel ri e nimak tapia ri e k'atibal rij ri tinimit. ¡E c'o jun rakoj tak chi'aj chupam ri Rachoch ri Ajawaxel, je ta ne jun k'ij re nimak'ij!

⁸ Ri Ajawaxel xuya' u tzij chi quet'akix ri e u tapia ri je'licalaj Sion. Xusuc'uba' ri chomanic che ri yojyobisanic xutz'akatisaj c'u u banic man xuxlan taj. Tapia tak xukuje' nimak tak tapia xebuya' pa bis, xak c'ätel xewilijic.

⁹ Ri tinimit man e c'o ta chi tz'apibal u chi' mawi e c'opibal tak rech: ¡Xepak'ix tak canok xepobax can tak cho ri ulew! Ri rajawinel xukuje' ri e u k'atal tak tzij e c'o chquixo'l tak ri e k'ijilal tak diosib; man c'o ta chic ri u pixab ri Dios. ¡Mawi ta ne tak ri k'axal tak u tzij quequil ta chic c'utwächinic ri cuya' ta ri Ajawaxel chque!

¹⁰ Ri e u ri'jab tak tatayib ri je'lalaj Sion quet'uyi cho ri ulew man quech'aw taj, quequiq'uiakala' ulew pa qui jolom quequicoj wakwoj tak atz'iak chquij. Ri c'ojolab aj Jerusalen quequipachba' ri qui jolom c'a cho ri ulew.

¹¹ Ri ok'ej quequitzajisaj ri nu bak'wäch, quinna' c'ut chi carokopij ri uwo nu c'u'x; ri chajin anima' ri c'o wuc' kajinak c'a cho ri ulew rumal ri rilic chi sachinak u wäch ri qui tinimit ri e nu winak, rumal ri rilic chi ri ac'alab ri c'ä quetunic quecäm che wi'jal xo'l tak ri ja pa ri tinimit.

¹² Quecha' c'ut ri ac'alab chque ri qui nan: “¡Man c'o ta chic ka wa mawi u wa'l ka uva!” Quetzak c'ut je ta ne ri e socom che cämical xo'l tak ri ja re ri tinimit, cäq'uis c'u relic ri q'uisbal cuxlab pa qui k'ab ri qui nan.

¹³ ¿Jas ta ruc' catinjunamaj wi o catinjunamataj ta wi, je'licalaj Jerusalen? ¿Jas ta ri c'utbal ri quincuin ta che u ya'ic chawäch che u cu'bisaxic a c'u'x, ch'ajch'oj xukuje' je'licalaj tinimit re Sion? Sibalaj nim jacha' ri plo ri u sachisaxic a wäch; ¿jachin ta lo ri cäcuinic cuya' ta jubik' uxlanic chawe?

¹⁴ Ri e c'utwächinic ri xequiya' tak qui bixic tak ri e k'axal tak tzij ri e c'o awuc' chawe xa' e jujun itzelalaj tak subunic. Man xquiya' ta ri a mac chisak chawäch rech xq'extaj taj ri cataklebej, xequiya' qui bixic subunelalaj tak c'utwächinic chawe, xquiban c'u chawe chi quebacojo.

¹⁵ Aretak catquil ri queboc'ow pa ri be caquipak'apa' qui k'ab che a yok'ic; quexulk'ubic caquislabaj c'ut ri qui jolom che retz'bexic a wäch, je c'u caquibij wa' che ri je'lalaj Jerusalen: “¿La are ta c'u tinimit wa' ri cabinaxic ri tz'akatalaj je'lical re ri uwächulew?”

¹⁶ Ri caquiban qui c'ulel chawe xquijak ri qui chi' che a yok'ic. Quexulk'ubic caquibanala' qui palaj caquikuch'uch'ej qui ware, je caquibij wa': “Ketzelam ronojel. Are k'ij wa' ri sibalaj keyem; ¡Xujcuin c'u na che rilic!”

¹⁷ Ri Ajawaxel xuq'uis qui banic tak ri e u chomanic, xutz'akatisaj ri u tzij ri kas u bim ulok ojer; xsachisan wächaj ma xcuyun ta c'ut; xuya' c'olbal chi ri c'ulel cutze'j a wäch xuya' u chuk'ab ri catc'ulelanic.

¹⁸ ¡Chatz'onoj che ri Ajawaxel chi chatuto', Sion, je'licalaj tinimit! ¡Chaya' che ri u wa'l a wäch chi chbelel chi pa k'ij chi chak'ab! ¡Matanaba' ok'ej, maya' chque ri e a bak'wäch chi chetanic!

¹⁹ Chatwalijok charakakej a chi' pa tak ri chak'ab, chabeytajisaj ri u rakic a chi'; chajamij ri awanima' chuwäch ri Ajawaxel, chaya' che chi belelok jacha' ri ja'; chebalic'a' ri a k'ab chusuq'uil chatz'onoj tok'ob chatbochi'n puwi' ri qui c'aslemal tak ri e awal, ri quec'am xo'l tak ri be re ri tinimit rumal wi'jal.

²⁰ Chila la, Ajawaxel, choc la che u chomaxic chi mawi jumul c'o ta jun ri je ta banom la wa' che. Ri nanaxelab, ¿la quequitij ta na lo tak ri cal ri c'ä quetunic? Ri e cojol tabal tok'ob xukuje' tak ri e k'axal tak tzij ¿la quecämisax ta na lo chupam ri k'ijilabal ri cak'ilax wi la?

²¹ E liq'uiloj ri c'ojolab xukuje' ri nimak tak winak xo'l tak ri ja re ri tinimit; xecämisax rumal ch'ich' re ch'o'j. Chupam ri k'ij re ri oyowal la, xsocon la che cämical ¡Xcämisan la man ruc' ta tok'obisam wächaj!

²² E banom la chi quepe u q'ueyowal pa ronojel c'olbal, e jacha' ta ne ri quepe pa jun nimak'ij; chupam ri k'ij re ri oyowal la, Ajawaxel, man c'o ta jachin ta jun ri cäto'taj ta na. Ri xebenwinakirisaj xukuje' xebenjic'o ri c'ulel xebucämisaj.