Hechos 7 - Quiché Bible

Ri Estebn xuto' rib chquiwäch ri nimak qui banic

¹ Xubij c'ut ri qui nimal ri e cojol tabal tok'ob che ri Estebn: “¿La kas jewa' we jastak ri'?”

² Ri Estebn xubij: “Wachalal tak xukuje' tatayib, tampe' alak ri nu tzij. Ri Dios ri sibalaj nim u k'ij xuc'ut rib chuwäch ri ka mam Abraham aretak c'ä c'o pa Mesopotam, c'ä majok chejekel pa Haran.

³ Ri Dios xubij che: ‘Chayacan ri awulew xukuje' ri e awachaxic. Jät pa ri ulew ri quinc'ut na chawäch.’

⁴ Xel c'u ulok pa ri culew ri winak aj caldeyib, xec'ol pa Haran. Aretak cäminak chic ri u tat, ri Dios xuk'axej pa we ulew ri' ri alak c'o wi camic.

⁵ Man xuya' ta c'u jun rechbal chupam we ulew ri', mawi ri cutac'aba' wi jun rakan. Xuchi'j c'u che chi cuya' na we ulew ri' che rechbal, xukuje' chque ri e rija'l ri quebalax na. C'ä majok c'ut c'o ralc'ual ri Abraham.

⁶ Xubij c'u ri Dios che chi ri e rija'l quec'oji' na pa jun tinimit ri man qui tinimit taj, queboc na che lok'om tak pataninelab chila', quiejeb sient (400) junab cäban na c'ax chque.

⁷ Ri Dios xubij: ‘Ri in quink'at na tzij puwi' apachique nim tinimit ri cuban lok'om pataninelab chque. Aretak coc'ow na ri c'ax, quebel na ulok, quinquipatanij na pa we c'olbal ri'.’ ”

(Abraham, Isaac)

⁸ Chupam ri u c'ulwächinic, ri Dios xuya' takanic che ri Abraham ri u tiquibaxic ri u cojic ri etal che u kopixic ri u tz'umal ri u wi' ri achi wi. Rumal ri', wajxakib k'ij chic alatajinak ri Isaac, ri Abraham xucoj ri etal che u kopixic ri u ti'jal. Junam xukuje' xuban ri Isaac che ri Jacob ri u c'ojol. Junam xukuje' xuban ri Jacob chque ri cablajuj u c'ojol, e are ri' ri qui mam ri aj israelib.

(Jacob)

⁹ “We e u c'ojol we Jacob ri', ri e ka mam, xquiquiäk rayij ri cachalal ri Jose, xquic'ayij c'u bic rech cac'am bic pa Ejipt. Are c'u ri Dios c'o ruc' ri Jose.

¹⁰ Xuto'tajisaj pa ri c'axc'olil. Xuya' u no'j, xuban c'u che chi xuch'äc ri u tok'ob ri paraon; ajawinel aj Ejipt, ri xucoj ri Jose che k'atal tzij puwi' ri Ejipt xukuje' puwi' ri rachoch.

¹¹ Xc'oji' c'u wi'jal xukuje' nimalaj rikoj c'ax puwi' ronojel ri Ejipt xukuje' pa Canaan, e are c'u tak ri e ka mam man c'o ta chi caquitijo.

¹² Aretak c'u xretamaj ri Jacob chi c'o trico pa Ejipt, xebutak bic ri e u c'ojol, ri u bixic ri e ka mam. Are nabe qui bic wa'.

¹³ Aretak xebe che ri u camul, ri Jose xuk'alajisaj rib chquiwäch ri rachalal, jeri' ri paraon xretamaj e jachin tak ri rachalaxic ri Jose.

¹⁴ Xtakan c'u ri Jose che u siq'uixic ri Jacob ri u tat xukuje' conojel ri e rachalal, e oxc'al olajuj chi winak.

¹⁵ Xak jeri' xejekel ri Jacob pa Ejipt. Chila' xcäm wi. Xukuje' ri e ka mam xecäm chila'.

¹⁶ Ri e u bakil ri Jacob xc'am bic pa Siquem, xemuk chupam ri mukubal ri xulok' ri Abraham chque ri ralc'ual ri Hamor ruc' sak puak chila' pa Siquem.”

(Moises)

¹⁷ “Nakaj chic ri k'ij aretak cuban na ri Dios jas ri u chi'm ulok che ri Abraham, xq'uiy ri tinimit Israel, xeq'uiyir ri aj israelib pa Ejipt.

¹⁸ Te c'u ri' xoc jun achi chic che ajawinel puwi' ri Ejipt, ri man xretamaj ta u wäch ri Jose.

¹⁹ We ajawinel ri' xebusub ri e ka winakil, xuban c'ax chque ri e ka mam. Xtakanic chi ri alaj tak calc'ual quebeq'uiak canok rech quecämic.

²⁰ Pa tak ri k'ij ri' xalax ri Moises, je'l xil rumal ri Dios. Xq'uiyisax oxib ic' pa rachoch ri u tat.

²¹ Aretak c'ut q'uiaktajinak chi canok, ri u mia'l ri ajawinel paraon xuyaco, xuq'uiyisaj, xuban ral che.

²² Xtijox ri Moises che ronojel ri qui no'j ri e aj Ejipt. Ticarel c'ut pa tak ri tzij, xukuje' chque tak banoj.

²³ Aretak c'o chi cawinak u junab, xpe pa u c'u'x quebusolij ri u winakil, e are wa' ri aj israelib.

²⁴ C'o c'u jun k'ij xril jun u winakil ri cäban c'ax che rumal jun aj Ejipt. Xuto'o, xucämisaj c'ut ri aj Ejipt, xutoj u q'uexel ri c'ax ri xban che wa'.

²⁵ Pa ri u chomanic ri Moises, chi cäquich'ob ri e u winakil chi ri Dios quebutzokopij na rumal ri are'. Man xquich'ob ta c'ut.

²⁶ Chucab k'ij chic, xopan cuc' quieb aj israelib ri cätajin cäquich'ay quib. Are ta xraj cujamarisaj ri ch'o'j, xubij chque: ‘Achijab, ix iwachalal iwib. ¿Jasche quiban c'ax chbil iwib?’

²⁷ Are c'u ri cätajin cuban c'ax che ri rachil xupakchi'j ri Moises, xubij che: ‘¿Jachin xatcojow che c'amal ka be xukuje' che k'atal tzij pakawi'?

²⁸ ¿La are cawaj quinacämisaj, je jas ri xabano aretak xacämisaj ri aj Ejipt iwir?’

²⁹ Ri Moises, aretak xuta' we tzij ri', xanimajic, xk'ax pa Madian, xc'oji' chila', man u tinimit ta c'ut, xec'oji' c'u quieb u c'ojol.

³⁰ E oc'owinak chi cawinak (40) junab, xuc'ut rib jun tako'n aj caj chuwäch pa ri chaki'j uwo sak chunakaj ri juyub Sinai. Pa jun rak' k'ak' xuc'ut wi rib pa juwi' q'uix ri canicowic.

³¹ Ri Moises xumay ri jun jasach ri xc'utwächin chuwäch. Xkeb che u ca'yexic, xuta' c'u ri u ch'abal ri Ajawaxel.

³² Ri Ajawaxel xubij: ‘In ri' ri qui Dios ri a mam, ri qui Dios ri Abraham, ri Isaac, xukuje' ri Jacob.’ Are c'u ri Moises xbirbitic, man cucoch' ta chic cärilo.

³³ Ri Ajawaxel xubij che: ‘Chebawesaj ri xajäb chque ri e awakan, rumal rech chi ri c'olbal ri at tac'al wi are tastalicalaj c'olbal.

³⁴ Kas wilom ri qui c'axc'olil ri winak re ri nu tinimit ri e c'o pa Ejipt. Nu tom chi quebok'ic. In kajinak ulok che qui tzokopixic. Camic c'ut tasaj, catintak bic pa Ejipt.’

³⁵ Are Moises wa', ri xquetzelaj u wäch aretak xquibij: ‘¿Jachin xatcojow che c'amal be, xukuje' che k'atal tzij?’ Pune' jeri', are ri are' ri xtak bic rumal ri Dios che c'amal qui be paquiwi' xukuje' che to'l quech. Je xuban ri Dios rumal ri tako'n aj caj ri xuc'ut rib chuwäch pa ri juwi' q'uix.

³⁶ Are Moises wa' ri xebesan ulok ri ka mam. Xebuban mayibal xukuje' etal pa ri ulew Ejipt. Je xuban pa ri Quiäk Plo. Cawinak junab je xuban pa tak ri chaki'j uwo sak.

³⁷ Are Moises wa' ri xbin chque ri aj israelib: ‘Ri Ajawaxel, ri i Dios cuya' na jun k'axal u tzij chquixo'l ri iwachalal je jas ri in.’

³⁸ Are Moises wa' ri xc'oji' cuc' ri comon aj israelib pa ri chaki'j uwo sak, ri xc'oji' ruc' ri tako'n aj caj ri xch'aben pa ri juyub Sinai, ri xc'oji' cuc' ri e ka mam. Are' c'ut ri xc'amow ri tzij re c'aslemal ri xuk'axej chke.”

(Ri aj israelib xquitzolk'omij ri canima' ruc' ri Ejipt)

³⁹ “Ri e ka mam, man xcaj taj xquinimaj we tzij ri'. Xane' xquitzak canok, xquitzolk'omij ri canima' ruc' ri Ejipt.

⁴⁰ Xquibij che ri Aaron: ‘Chebabana' ka diosib, ri quenabej na chkawäch. Are c'u we Moises ri', ri xujresaj ulok pa Ejipt, man keta'm taj jas xuc'ulmaj.’

⁴¹ Pa tak ri k'ij ri', xquiban jun dios ri junam ruc' jun alaj ama' wacax, xquichi'j c'u tabal tok'ob che ri qui dios, xquiban jun nimak'ij che u ya'ic u k'ij ri xquiban ruc' ri qui k'ab.

⁴² Ri Dios xebuya' canok, xebujach che qui k'ijilaxic ri k'ij, ri ic', ri ch'imil. Jas ri tz'ibatal pa ri qui wuj ri e k'axal tzij: ‘Aj israelib, ¿la xebicämisaj lo awaj che tabal tok'ob chnuwäch, a xebiya' lo sipanic chnuwäch pa ri cawinak (40) junab aretak ix c'o pa tak ri chaki'j uwo sak?

⁴³ Man xiya' taj, xane' are xiwekaj ri cak'ijilax wi ri dios Moloc, xukuje' ri u ch'imil ri dios Repan, qui wächbal tak diosib ri kas ix xebibano che qui k'ijilaxic. Rumal ri' quixin q'uiak na bic pa jun ulew chic naj che ri Babilon.’

⁴⁴ Xc'oji' ri Lic'om Rachoch re ri C'ulwächinic cuc' ri e ka mam pa ri chaki'j uwo sak, jas ri xtakan wi ri Dios aretak xubij che ri Moises chi chubana' je jas ri u cholajil ri c'utbal ri xrilo.

⁴⁵ Ri e ka mam xquic'am we Lic'om Rachoch Dios ri' che echbal, e are' tak c'ut ri e achilaninak ri Josue xquic'am ulok cuc' aretak xeboc che qui ch'äquic ri culew ri jule' tak tinimit chic, ri xeburokij bic ri Dios chquiwäch. Je c'u xtakex u banic c'ä pa tak u k'ijol ri David.

⁴⁶ Ri David xc'oji' ri u tok'ob ri Dios ruc'. Xutz'onoj chi chyok che chi cuban jun rachoch ri u Dios ri Jacob.

⁴⁷ Are c'u ri Salomon xyacow ri rachoch Dios.

⁴⁸ Pune' c'u ri Dios aj chicaj man cäc'oji' ta pa tak ja ri e banom che k'abaj, jas ri xubij ri k'axal tzij:

⁴⁹ ‘Ri caj are nu tem ajawibal, ri ulew are qui tac'alibal ri wakan. ¿Jas u wäch chi ja quiyac ta na chwe? cächa ri Ajawaxel. ¿O jas u wäch c'olbal quinuxlan ta wi?

⁵⁰ ¿La ma ta nu k'ab e banowinak conojel we jastak ri'?’ ”

⁵¹ Ri Estebn xutakej u bixic: “Ri alak amak'el uxinak alak tac, e c'o xiquin alak xukuje' anima' alak ri man quecojon taj. Amak'el cak'atij alak u wäch ri Ruxlabal ri Dios. Alak junam c'u cuc' tak ri e mam alak.

⁵² ¿Jachin ta chque ri e k'axal tak tzij ri ma ta xban c'ax che cumal tak ri e mam alak? Ri e are' xequicämisaj jachin tak ri xeyo'w u bixic ri u petic ri suc' ulinak c'ut, ri alak xjach alak pa ri cämical.

⁵³ Alak ri xc'am alak ri pixab cumal ri tako'nib aj caj, man xinimaj ta c'u alak.”

Xcämisax ri Estebn

⁵⁴ Aretak xequita' jas xubij ri Estebn, xyactaj coyowal, xquikuch'uch'ej qui ware rumal rech ri u tzij.

⁵⁵ Nojinak c'u ri Estebn che ri Ruxlabal ri Dios, cäca'y chicaj, xril ri u juluwem ri Dios, xril ri Jesus tac'al pa ri u wiquiak'ab ri Dios.

⁵⁶ Xubij: “¡Chilampe' alak! Quebenwil ri caj e jakajoj, quinwil ri Rija'l Winak, c'o pa ri u wiquiak'ab ri Dios.”

⁵⁷ C'äte ri' ri winak xquirak qui chi' ruc' chuk'ab, xquitz'apij ri qui xiquin. Conojel xa' junam qui wäch xebe chrij ri Estebn.

⁵⁸ Xquesaj bic chuchi' ri tinimit, xquibuc' che abaj; e are' tak c'ut ri quetzujunic xcokxanij ri qui k'u' ruc' jun ala, Sawl u bi'.

⁵⁹ Xquibuc' ri Estebn che abaj. Ri Estebn xuta' ri u to'banic ri Ajawaxel, xubij: “Wajaw Jesus, c'ama' la ri wuxlabal.”

⁶⁰ Xxuquic, xurak u chi' ruc' chuk'ab: “¡Ajawaxel majilaj la we mac ri' chquij!” Xbitaj c'u wa' rumal, xcämic.