Hechos 4 - Quiché Bible

Ri Lu' xukuje' ri Xuan xec'am bic chquiwäch ri k'atal tak tzij

¹ Ri Lu' xukuje' ri Xuan c'ä cätajin quetzijon cuc' ri winak aretak xepe ri e cojol tabal tak tok'ob chquij, cachil ri c'amal qui be ri e chajil ri rachoch Dios xukuje' ri saduseyib.

² Xpe coyowal chque ri Lu' xukuje' ri Xuan rumal rech chi quequitijoj ri winak, cäquibij chi ri Jesus xc'astaj chquixo'l ri cäminakib.

³ Xequichapo, xebe qui cojo' can pa che' c'ä che ri jun k'ij chic, rumal rech chi kajinak chic ri k'ij.

⁴ E q'ui c'ut chque ri winak ri xquita' ri tijonic xecojonic. Cäraj ne xetz'akat job mil ri cajilabal ri cojonelab xuwi achijab.

⁵ Chucab k'ij xepe ri e c'amal qui be ri aj judeyib xukuje' ri e nimak tak tatayib xukuje' ri ajtijab re ri pixab, xquimulij quib pa Jerusalen.

⁶ Xukuje' c'o ri Anas ri qui nimal ri cojol tabal tok'ob. E c'o ri Caipas, ri Xuan, ri Alejandr. Conojel ri e cachalaxic ri qui nimakil ri e cojol tabal tok'ob e c'o chila'.

⁷ Xquiya' takanic chi chetac'abax ri Lu' xukuje' ri Xuan pa qui niq'uiajil, xquita' chque: “¿Ruc' jachique cuinem, o jachin pa u bi' i banom wa'?”

⁸ Ri Lu', nojinak che ri Ruxlabal ri Dios, xubij chque: “Ri alak, ri c'amom alak u be ri tinimit xukuje' tak ri e nimak tak tatayib.

⁹ We cäc'ot alak ka chi' camic chrij ri utzil ri banom che jun achi ri yawab, jas rumal xcunaxic,

¹⁰ chetamaj alak onojel alak, chretamaj ronojel ri tinimit Israel, chi pa ri u bi' ri Jesucrist aj Nazaret xcunax we achi ri'. Are ri Jesus ri xrip alak, ri xc'astajisax chquixo'l ri cäminakib rumal ri Dios, rumal c'u ri are', we achi ri' tac'al chwäch alak utz chic.

¹¹ We Jesus ri' are' ri abaj ri xetzelaj alak u wäch alak ri alak yacanelab are c'u uxinak ri abaj ri tz'apibal u wi' ri chac.

¹² Man c'o ta chi jun c'o ta wi colobal ib, ri Dios c'ut man u yo'm ta chke ri u bi' ta chi jachin jun cho ri uwächulew ri cujcuin ta wi cujcolotaj ta wi.”

¹³ Aretak ri e nimak tak tatayib xquilo chi ri Lu' xukuje' ri Xuan man cäquixe'j ta quib quech'awic; xukuje' xquilo chi xak e winak ri man c'o ta quitijom wi quib quemayijinic; queta'm c'u qui wäch chi xec'oji' ruc' ri Jesus.

¹⁴ Xquil ri achi ri xcunaxic, chi tac'al cuc'. Man c'o ta c'u jas quequic'ulalaj ta wi.

¹⁵ Xequitako chi chebel bic pa ri k'atbal tzij. E elinak c'u bic ri Lu' xukuje' ri Xuan, xechoman chquixo'l,

¹⁶ xquibij: “¿Jas cäkaban chque we achijab ri'? Kastzij c'ut, k'alaj chi qui banom jun etal. Etamatal c'u wa' cumal conojel ri e aj Jerusalen. Man cujcuin ta c'ut cäkesaj kib chupam.

¹⁷ Rech c'u man cäjabux ta u tzijoxic ri xc'ulmataj chquixo'l ri winak, chekacojo' qui xib, rech kas camic cachapletaj bic man cäquitzijoj ta chic ri u bi' ri Jesus che jun winak.”

¹⁸ Xequisiq'uij, xetakan chque chi mawi jumul mech'aw chic, mawi metijon chic pa ri u bi' ri Jesus.

¹⁹ Are' c'u ri Lu' xukuje' ri Xuan xquitzelej u bixic chque: “Chomaj alak we suc' chi are nabe cujniman chech alak chuwäch ri u nimaxic ri Dios.

²⁰ Man cujcuin ta c'ut chi ma ta cäkatzijoj ri kilom ri ka tom.”

²¹ Xecoj c'u qui xib cumal ri k'atal tak tzij, xequitzokopij c'u bic. Man cäquirik taj jas cäquiban che u c'äjisaxic qui wäch, rumal rech chi conojel ri winak cäquiya' u k'ij ri Dios rumal ri xbantajic.

²² Are c'u ri achi ri xban wi we etal ri' re cunanic, oc'owinak chi cawinak u junab.

Ri cojonelab xquitz'onoj qui chuk'ab che ri Dios

²³ Ri Lu' xukuje' ri Xuan xetzokopix bic, xebe cuc' ri e cachil. Xquiya' u bixic ronojel ri xbix chque cumal ri e c'amal qui be ri e cojol tabal tok'ob xukuje' ri e nimak tak tatayib.

²⁴ Ri e are', aretak xquito, junam xquiban ch'awem ruc' Dios, xquibij: “Kajaw, lal ri' ri Dios ri xbanow la ri caj, ri ulew, ri plo, xukuje' conojel ri jastak ri e c'o chquipam.

²⁵ Xbij la rumal ri Ruxlabal ri Dios pa u chi' ri ka mam David, ri pataninel ech la: ¿Jasche quewojcor ri nimak tak tinimit? ¿Jasche ri winak cäquichomaj jastak ri man c'o ta u patan?

²⁶ Ri ajawinelab xukuje' ri k'atal tak tzij re ri uwächulew junam xquiwalijisaj quib chrij ri Ajawaxel xukuje' chrij ri Crist, ri u cha'om.

²⁷ Kas c'u ne tzij ri Herod xukuje' ri Pons Pilat xquimulij quib waral, chupam we tinimit ri', e cachil ri aj judeyib xukuje' niq'uiaj winak chic, xquimulij quib chrij ri tastalicalaj pataninel ech la ri Jesus, ri cha'om la.

²⁸ Xquimulij quib che u banic ronojel ri c'utum ulok ojer rumal ri k'ab la xukuje' ri chomanic la, chi cäbantaj na.

²⁹ Camic c'ut, Kajaw, chilampe' la. Qui bim chi cäquiban c'ax chque ri ajchaquib la. Ya' la chque ri e pataninel tak ech la chi cäquicoj qui chuk'ab che u bixic ri tzij la, ma ta cäquixe'j quib.

³⁰ Ruc' ri chuk'ab la, bana' la cunanic, bana' la etal, bana' la mayibal pa ri u bi' ri tastalicalaj pataninel la ri Jesus.”

³¹ Aretak qui banom chi ch'awem ruc' Dios, xyicop ri c'olbal ri qui mulin wi quib. Conojel c'ut xenojisax che ri Ruxlabal ri Dios. Xquicoj c'u qui chuk'ab che u tzijoxic ri u tzij ri Dios.

Conojel ri jastak e quech conojel

³² Ri q'uialaj cojonelab xa jun qui chomanic, xa jun canima'. Man c'o ta jun cubij chi rech ri jastak re. Ri jastak que, e quech conojel.

³³ E are' c'u ri takomxenlab ruc' nimalaj cuinem xquibij chque ri winak chi ri Cajaw Jesus xquilo xc'astajic. Ri nimalaj u tok'ob ri Dios c'o paquiwi' conojel.

³⁴ Man c'o ta c'u jun chquixo'l ri c'o ta jas rajawaxic che. Conojel ri e c'o tak culew xukuje' cachoch, quequic'ayila', cäquic'am c'u ulok ri cajil tak ri jastak ri quequic'ayij,

³⁵ cäquiya' pa qui k'ab ri takomxenlab. Ri e are' c'ut cäquijach wa chquiwäch ri c'o qui rajawaxic.

³⁶ C'o c'u jun achi Jose u bi', ri cäbix Bernabe che cumal ri takomxenlab. Quel cubij wa': “Ralc'ual Cu'bisabal C'uxaj” Ri are' aj levitib, ija'l re Chipr.

³⁷ Ri Bernabe xuc'ayij jun rulew, xuc'am ulok ri puak, xuya' pa qui k'ab ri takomxenlab.