Hechos 3 - Quiché Bible

Xcunax jun achi ch'oco'j

¹ C'o c'u jun k'ij, ri Lu', rachil ri Xuan junam cätajin quebopan pa ri rachoch Dios pa ri urox jok'otaj benak'ij, are jok'otaj wa' ri cäban ch'awem ruc' Dios.

² Catelex ulok jun achi ri ch'oco'j ulok kas pa ri u c'u'x ri u nan. Ronojel k'ij quelyok can chuchi' ri rachoch Dios, chuchi' ri oquibal ri cäbix “Je'lic” che. Cutz'onoj u cochinic chque ri winak ri quebopan pa ri rachoch Dios.

³ Aretak xeril ri Lu' xukuje' ri Xuan chi oquem cäquiban chupam ri rachoch Dios, xutz'onoj u cochinic chque.

⁴ Ri Lu' xukuje' ri Xuan xeca'y che. Xubij c'u ri Lu' che: “Chatca'y chke.”

⁵ Ri achi xca'y chque, are pa u c'u'x chi c'o caya' che.

⁶ Ri Lu' xubij che: “Sak puak, k'an puak man c'o ta wuc'. Are c'u ri c'o wuc' quinya' chawe: pa ri u bi' ri Jesucrist aj Nazaret, chatwalijok, chatbinok.”

⁷ Ri Lu' xuchap che ri u k'ab re u wiquiak'ab, xuwalijisaj. Chanim xecowir ri rakan xukuje' ri u kul tak rakan.

⁸ Ri ch'oco'j xtaq'ui'c, xch'oplenic, xbinic. Junam xoc cuc' pa ri rachoch Dios. Cätajin cäbinic ruc' ri kas rakan, cäch'oplenic, cunimarisaj u k'ij ri Dios.

⁹ Conojel ri winak ri xquilo chi ri achi cäbinic, xquilo chi cunimarisaj u k'ij ri Dios.

¹⁰ Cäquich'ob c'u u wäch chi are wa' ri cät'uyi' che u tz'onoxic u cochinic chuchi' ri oquibal pa ri rachoch Dios, ri u binam Je'lic. Sibalaj xquimayo, xsach qui c'u'x rumal rech ri xbantajic.

Ri u tijonic ri Lu' pa ri u rakan ja ri Salomon

¹¹ Ri ch'oco'j ri xcunaxic e u chapom ri Lu' xukuje' ri Xuan. Conojel ri winak xexiq'uinic, xebe cuc' pa ri u rakan ja ri Salomon. Conojel xemayinic.

¹² Ri Lu', aretak xril wa', xebuch'abej ri winak: “Achijab aj israelib, ¿jasche camay alak wa'? ¿Jasche caca'y alak chke, je ta ne ri rumal ta ri ka chuk'ab uj o rumal ta ri ka nimanic che ri Dios xkabano chi cäbin we achi ri'?

¹³ Ri u Dios ri Abraham, ri Isaac xukuje' rech ri Jacob, ri qui Dios tak ri e ka mam u yo'm u k'ij ri Jesus ri pataninel rech. Ri xwalijisaj alak tzijtal chrij chuwäch ri Pilat. Aretak ri Pilat are ta xraj xutzokopij ta ri Jesus, ri alak man xaj ta alak.

¹⁴ Che u q'uexwäch ri are ta xtz'onoj alak ri u tzokopixic ri Jesus, ri tastalic xukuje' suc', ri alak are xtz'onoj alak u tzokopixic jun cämisanel.

¹⁵ Xcämisaj alak ri jun ri xbanow ri c'aslemal. Xc'astajisax c'u wa' rumal ri Dios chquixo'l ri cäminakib. Ri uj c'ut xkilo chi kastzij xc'astajic.

¹⁶ Rumal c'u ri cojonic che ri u bi' ri Jesus, xecowir ri rakan we achi ri' ri quil alak ri eta'm alak u wäch. Ri cojonic che ri Jesus, are yowinak che ri achi chi utz chic chwäch alak onojel alak tz'akat chic ri u cuerp.

¹⁷ Camic c'ut, wachalal, weta'm chi xban alak wa' rumal rech man c'o ta etamabal alak, je jas ri xquiban ri e c'amal be alak xukuje'.

¹⁸ Je c'u xbantaj wa' jas ri u bim ulok ri Dios pa qui chi' conojel ri e k'axal tak tzij: chi ri u Crist curik na c'ax.

¹⁹ Rumal ri' q'uexa' c'u'x alak, tzelej alak ruc' ri Dios, rech ri Dios quebuchupisaj tak ri e mac alak, craj c'u ne ri Ajawaxel quebutak ulok tak k'ijol re jamaril chech alak.

²⁰ Cutak c'u ulok ri Jesus, kas pa ri chapletajic u cha'om ulok are' c'u Crist alak wa'.

²¹ Are c'u ri camic rajawaxic chi cäcanaj na can pa ri caj c'ä pa ri k'ij aretak ri Dios quebusuc'umaj na conojel ri jastak, jacha' ri xubij ri Dios pa qui chi' ri e u k'axal tak tzij pa ri ojer tak k'ijol.

²² Are' ri Moises xubij: ‘Ri Ajawaxel, ri i Dios cuwalijisaj na jun k'axal u tzij chquixo'l ri e iwachalal, jacha' ri in. Chinimaj ronojel ri cubij na chiwe.

²³ Ronojel c'ut ri man cäniman ta che we k'axal tzij ri', quesax na chquixo'l ri winak.’

²⁴ Conojel ri e k'axal tak tzij, pa ri qui cholajil kas ruc' ulok ri Samuel, xequitzijoj ulok tak we k'ijol ri'.

²⁵ Alak ri' ri quechben alak ri chi'nic ri xebujekeba' ri Dios cumal ri e k'axal tak ri e u tzij, xukuje' ix echbenelab rech ri c'ulwächinic ri u banom ri Dios cuc' ri e mam alak, xubij c'u ri Dios che ri Abraham: ‘Conojel ri winak ri e c'o cho ri uwächulew quetewechitaj na cumal quech ri e awija'lil.’

²⁶ Ri Dios, aretak xuc'astajisaj ri u C'ojol, chech alak xutak wi nabe, je xubano rech catewichitaj alak, rech chijujunal alak cäya' can alak ri etzelal.”