Hechos 28 - Quiché Bible

Ri Pawl pa Malt

¹ Aretak uj to'tajinak chic, xketamaj chi Malt u bi' ri ch'akap ulew.

² Ri e aj chila' nimalaj tak utzil xquiban chke. Xquicuch jun k'ak', xujquic'ulaj konojel, rumal rech chi cätajin jäb xukuje' c'ax tew.

³ Ri Pawl, xumulij jupatzaj xic'ay chaki'j, xuya' pa ri k'ak'. Jun cumätz c'ut sachoj xanimaj ulok chuwäch ri k'ak', xtzayi' che ri u k'ab.

⁴ Ri e aj chila', aretak xquil ri cumätz tzayal che ri u k'ab, xquibila': “Kastzij we achi ri' cämisanel. Pune' xto'tajic man xjik' ta chupam ri plo, ri suq'uilal man cuya' ta canok chi cäc'asi'c.”

⁵ Ri Pawl xutota' c'ut ri cumätz pa ri k'ak'. Man c'o ta c'ax xuriko.

⁶ Ri e are' c'ut queyem chi cäsipojic, o chanim cätzakic cäcämic. Aretak naj chic queyem, xquilo chi man c'o ta jun c'ax xuc'ulmaj, xquiq'uex qui chomanic, xquibij c'ut chi ri Pawl are' jun dios.

⁷ Chuxcut ri c'olbal ri' c'o wi ri rulew ri achi ri nim u banic pa Malt, Publio u bi'. Ri are' xujuc'ulaj oxib k'ij cho rachoch. Xuya' ka warabal, xuban utzil chke.

⁸ C'ulmatajinak c'ut chi ri u tat ri Publio kajinak pa ch'at, u rikom c'ax rumal nimalaj k'ak' ri c'o chrij, xukuje' sibalaj c'o pamaj che. Xoc c'u bic ri Pawl ruc', xuban ch'awem ruc' Dios puwi', xuya' ri u k'ab puwi', xcunataj c'ut.

⁹ Bantajinak chi wa', xebopan chi niq'uiaj ri e c'o pa ri ch'akap ulew ri' xukuje' e yawabib, xecunax c'ut.

¹⁰ E are c'u ri' xukuje' nim xujquil wi, q'ui jastak xquiban chke che u nimarisaxic ka k'ij. Aretak xujel bic pa ri nim jucub ri winak xquiya' bic ronojel ri rajawaxic chke che ri ka binem.

Ri Pawl xopan pa Rom

¹¹ E oc'owinak chi oxib ic', c'äte ri' xujbe puwi' ri plo pa jun nim jucub aj Alejandriy, ri xroc'owisaj ri k'ij re tew pa Malt. Are e c'o ri qui wächbal ri diosib Castor xukuje' ri Polux che retal.

¹² Aretak uj opaninak chic pa Siracus, xujc'oji' oxib k'ij chila'.

¹³ Te c'u ri' xujel bic chila', xujbe puwi' ri plo chuxcut ri ulew, xujopan pa Rejiy. Oc'owinak chi c'u jun k'ij, xpe jun quiakik' pa ri u mox k'ab ri relebal k'ij. Chucab k'ij xujopan pa Puteol.

¹⁴ Xekarik jujun kachalal chila', xquitz'onoj chke chi chujcanaj can wukub k'ij cuc'. Je c'u xkaban wa', chuq'uisbalil c'ut xujopan pa Rom.

¹⁵ Ri kachalal chila' xquita' ka tzijol, xebel ulok che ka c'ulaxic c'ä pa ri C'ayibal re Apiy xukuje' pa ri c'olbal Oxib Okxanibal u bi'. Ri Pawl, aretak xerilo, xumaltioxij che ri Dios, xcu'bi u c'u'x.

¹⁶ Aretak xujopan pa Rom, xya' c'u che ri Pawl chi cäc'oji' u tuquiel, ruc' jun ajch'o'j che u chajixic.

Ri Pawl xutzijoj ri utzalaj tak tzij pa Rom

¹⁷ Aretak oc'owinak chi oxib k'ij, ri Pawl xebusiq'uij ri qui nimakil ri aj judeyib. Aretak qui mulin chi quib, xubij chque: “Wachalal, ri in man c'o ta jas xinban chquij ri ka winakil, mawi chrij ri qui nak'atisabal ri ka mam. Xinya' c'u pa che' pa Jerusalen, xinjach pa qui k'ab ri aj romab.

¹⁸ Aretak qui c'otom chi nu chi', are ta xcaj xinquitzokopij, rumal rech chi man c'o ta jun mac chwij ri takal ta wi nu cämisaxic.

¹⁹ Are c'u ri aj judeyib xquibij chi man quintzokopix taj. Rumal ri' rajawaxic xintz'onoj c'ut chi quintak ulok chuwäch ri nimalaj k'atal tzij Sesar. Man c'o ta c'u jas ri quebentzujuj ta wi ri nu nim tinimit.

²⁰ Rumal ri' xintakan che siq'uixic alak rech quinwil wäch alak, xukuje' che tzijobexic alak; kas c'u ne rumal rech ri keyebal c'u'x uj ri uj aj israelib, ximom we tikom ch'ich' ri' chwe waral.”

²¹ Xquibij che: “Man c'o ta wuj petinak pa Judey, ulinak ta kuc', ri cubij ta jun jasach chawij, xukuje' man c'o ta jun chque ri kachalal aj judeyib ri e ulinak ri qui bim ta jun lawaloyil chawij.

²² Are c'u kakaj cäkatatabej ri cachomaj. Keta'm c'ut chi pa conojel c'olbal cac'ulelax wi we c'ac' juk'at ri'.”

²³ Xquich'ic c'u jun k'ij che, chi e q'ui quepe na chupam ri rachoch ri u kajom. Pa ri ak'abibal c'ä pa ri u benebal k'ij, ri Pawl xuk'alajisaj ri rajawibal ri Dios chquiwäch. Xucoj u chuk'ab rech quecojon che ri Jesus, jas ri cubij ri u pixab ri Moises xukuje' ri xequibij ulok ri e k'axal tzij.

²⁴ E c'o jujun xquic'amowaj ri xubij ri Pawl, ri niq'uiaj chi c'ut man xquicoj taj.

²⁵ Rumal c'u rech chi man junam ta xechoman conojel, xquichaplej quelic bic. Ri Pawl xubij chque: “Utz ri xubij ri Ruxlabal ri Dios chque ri e mam alak rumal ri Isaiy ri k'axal tzij, ri xubij:

²⁶ ‘Jät jabij c'u che we tinimit ri': Pune' sibalaj quixtatabenic, man quixch'oban ta na; pune' sibalaj quixca'yic, man quiwil ta na.

²⁷ Pimarinak c'ut ri u chomabal we tinimit ri', e tz'apital ri qui xiquin ri e qui bak'wäch e yupuyoj, rech man quecuin taj queilonic mawi quetanic, mawi quech'obonic; rech man quetzelej ta wuc' quebencunaj ta c'ut.’

^28-29 Chetamaj alak we colobal ib ri' ri cuya' ri Dios takom bic chque ri man aj judeyib taj, ri e are' c'ut quetataben na'.”

³⁰ Ri Pawl xcanaj can quieb junab tz'akat chupam ri ja ri u kajom, ri quebuc'ulaj wi conojel ri quebopan che rilic.

³¹ Xutzijoj ri rajawibal ri Dios. Xebutijoj ri winak che ri Ajawaxel Jesucrist. Man cuxe'j ta rib, man c'o ta c'u jachin jun xyo'w ta latz' che.