Hechos 27 - Quiché Bible

Ri Pawl xtak bic pa Rom

¹ Aretak xchomaxic chi cujbe puwi' ri plo pa Ital, xjach ri Pawl xukuje' ri niq'uiaj ajpache' chic pa u k'ab jun qui nimal jun sient ajch'ojab Julio u bi', are' cätakan paquiwi' ri ajch'ojab ri cäbix aj August che.

² Xujoc c'u pa jun nim jucub aj Adramit, ri elem bic re cäbe pa tak ri tinimit re Asiy ri c'o chuchi' ri plo. Xujel bic, c'o c'u ri Aristarc kuc'. Are' aj Tesalon, tinimit re Masedon.

³ Chucab k'ij xujopan pa Sidon. Ri Julio xuban utzil che ri Pawl, xuya' che chi cäbe che qui ch'abexic tak ri e rachil rech cäya' ri cajwataj che.

⁴ Xujel bic chila', xujbin puwi' ri plo chuxe' ri Chipr, rumal rech chi petinak ri quiakik' chkawäch.

⁵ Aretak ka k'axem chi ri plo ri c'o chuchi' ri Silisiy xukuje' Panpil, xujkaj bic pa Mir, are jun tinimit ri c'o pa Lisiy.

⁶ Ri qui nimal ri jun sient ajch'ojab xurik jun nim jucub aj Alejandriy chila', ri benam cuban pa Ital. Xujucoj c'u chupam.

⁷ Q'ui k'ij c'ut xujbin puwi' ri plo nojimal. Ruc' c'ax xujopan chuwäch ri Cänid. Rumal c'u rech chi cujuk'atij ri quiakik', xa' jeri' xujoc'ow chuwäch ri Salmon, xujoc'ow chrij ri Cret, jun ch'akap ulew c'o pa ri plo.

⁸ Ruc' c'ax xkabinibej ri Cret, xujopan pa jun c'olbal ri Utzalaj Tak Oquibal u bi', chunakaj c'u ri' c'o wi ri tinimit Lasey.

⁹ E oc'owinak chi c'u q'ui k'ij, xibibal chic ri binem puwi' ri plo, rumal rech chi cänakajin chic ri ic' re ri sak tew. Rumal wa', ri Pawl xebupixbej,

¹⁰ xubij chque: “Achijab, quinwilo chi ri binem puwi' ri plo cäban na ruc' xibibal. Quinwilo chi cäkatzak na ri nim jucub ruc' ri eka'n, xukuje' we ne cäkatzak na ri ka c'aslemal.”

¹¹ Are c'u ri qui nimal ri jun sient ajch'ojab xucoj na ri u tzij ri ajchak'e ri nim jucub xukuje' ri c'amal u be ri nim jucub, chuwäch ri u tzij ri Pawl.

¹² We oquibal ri' pa ri plo, man utz ta che roc'owisaxic ri k'ij re ri tew. Rumal ri' are e q'ui na ri xquiya' no'j chi quebel bic chila'. Cäraj ne quecuinic quebopan pa Penis che roc'owisaxic ri k'ij re ri tew. Are jun oquibal pa ri plo re ri Cret ri cäca'y pa ri u niq'uiajil u wiquiak'ab kajebal k'ij xukuje' pa ri u niq'uiajil u mox kajebal k'ij.

Xpe nimalaj quiakik' puwi' ri plo

¹³ Aretak xpe ri quiakik' pa ri u mox k'ab ri elebal k'ij, man nim ta ri u chuk'ab, rumal ri' xquichomaj chi quecuinic cäquitakej ri qui be. Xebel bic xquitakej binem chunakaj ri tak'aj re ri Cret.

¹⁴ Xpe c'u jun nimalaj quiakik' jäb chrij ri nim jucub, ri u binam aj u niq'uiajil riquiak'ab elebal k'ij.

¹⁵ Xch'icmix c'u bic ri nim jucub, man xujcuin taj xujbin chkawäch rumal ri quiakik'. Xkaya' c'u kib, xujc'am bic.

¹⁶ Xojoc'ow chrij jun alaj ch'akap ulew Caud u bi'. Ruc' c'ax xujcuin che u yaquic ri alaj jucub ri ka jurum ulok.

¹⁷ Aretak pakabam chi ulok ri alaj jucub pa ri nim jucub, xquicoj colop che u to'ic ri jucub rech man cäjak'in taj. Cäquixe'j quib, we ne cäquichak'ij quib cho ri k'et re sanyeb Sirt u bi'. Xkesaj c'u ri u wi' ri nim jucub, je u banom wa' xc'am bic.

¹⁸ Xujel c'u ch'u'j rumal ri nimalaj quiakik'. Chucab k'ij xquiq'uiak can ri eka'n pa ri plo.

¹⁹ Churox k'ij c'ut, cuc' tak ri qui k'ab, xequiq'uiak can ri u chacubal ri nim jucub.

²⁰ Q'ui k'ij ri man xkil ta u wäch ri k'ij, man xkil ta qui wäch ri ch'imil. Ka rikom c'u c'ax rumal ri nimalaj quiakik'. Rumal ri' man c'o ta chi cäcu'bi wi ka c'u'x chi cujcolotajic.

²¹ Q'ui k'ij chi c'ut man uj wokinak taj. C'äte ri', xtaq'ui' ri Pawl chquixo'l, xubij chque: “Tatayib, utz we ta xnimaj alak ri nu tzij, chi ma ta xujel ulok pa Cret, rech ma ta cäkarik we c'axc'olil ri', rech ma ta cätzak ri eka'n.

²² Camic c'ut quinpixben chech alak chi cu'ba' c'u'x alak. Man c'o ta c'u na jun chech alak ri cäcämic. Xak xuwi cayojyob na ri nim jucub.

²³ Chak'ab c'ut xpe jun tako'n aj caj. Ri takom ulok rumal ri Dios, ri in ajchak'e, ri quinpatanij. Ri tako'n aj caj xtaq'ui' wuc'.

²⁴ Xubij c'u chwe: ‘Maxe'j awib, Pawl. Rajawaxic chi cattac'abax na chuwäch ri Sesar. Chatampe', rumal awech, ri Dios quebuto' na conojel ri e c'o awuc' pa ri nim jucub chuwäch ri cämical.’

²⁵ Rumal c'u ri', tatayib, cu'ba' c'u'x alak. Quincoj c'u ri u tzij ri Dios chi je cäban na jas ri xbix chwe rumal ri tako'n aj caj.

²⁶ Cujekaj c'u na pa jun ch'akap ulew.”

²⁷ Pa ri ucajlajuj chak'ab c'ut, aretak xujc'am bic pa ri plo Adriat u bi', pa niq'uiaj ak'ab ri ajchaquib re ri nim jucub xquichomaj chi e c'amom bic chunakaj ulew.

²⁸ Aretak xquiq'uiak bic ri etabal, xquetamaj ri u najil u pam ri plo are cawinak (40) bara'. Xujbin chi apan jubik', xquiq'uiak chi bic ri etabal, xquetamaj chi juwinak lajuj (30) bara' chic ri u choil.

²⁹ Xquixe'j c'u quib, we ne cäkachak'ij kib cho tak abaj. Xequikasaj bic quiejeb alal chrij ri nim jucub, xkatz'onoj c'u che ri Dios chi cäsakaric.

³⁰ Raj xebanimaj bic ri ajchaquib pa ri jucub. Xquikasaj bic ri alaj jucub chupam ri plo, je ta ne ri cäquitzokopij cakan ri alal chuwäch ri nim jucub.

³¹ C'äte ri' ri Pawl xubij che ri qui nimal ri jun sient ajch'ojab xukuje' chque ri ajch'ojab: “We man quecanaj can wa' chupam ri nim jucub, man cuya' taj cäcol ib alak.”

³² E are c'u ri ajch'ojab xquikopij tak ri colop che ri alaj jucub, xquitzak bic pa ri plo.

³³ Aretak craj jubik' casakaric, ri Pawl xebubochi'j conojel chi chquic'ama' que ri wa, xubij chque: “Camic ucajlajuj k'ij ri alak eye'm alak jas ri cäkac'ulmaj na. Alak c'o pa numic, man c'o ta tijom alak.

³⁴ Rumal ri' quinbochi'n chech alak chc'ama' ech alak ri wa, rech cacolotaj alak. Man c'o ta c'u jun chech alak cätzak na jun u wi'.”

³⁵ Xbitaj wa' rumal, xuc'am ri wa, xumaltioxij che ri Dios chquiwäch conojel. Xpirtaj c'ut, xuchaplej u tijic.

³⁶ Conojel c'ut xquicu'ba' qui c'u'x, xukuje' ri e are' xewa'ic.

³⁷ Uj quieb sient ruc' oxc'al waklajuj (276) winak chi konojel ri uj c'o pa ri nim jucub.

³⁸ Aretak e nojinak chic, xquiq'uiak bic ri trico chupam ri plo rech quel ri al pa ri nim jucub.

Xch'ape' ri nim jucub chupam ri sanyeb re ri plo

³⁹ Aretak xsakaric, man xquich'ob taj jas ri ulew ri c'o apan chquiwäch. Xquil c'u jun u tza'm plo oquinak bic pa ri ulew, sanyeb u chi'. Chila' xquichomaj resaxic wi bic ri nim jucub, we quecuinic.

⁴⁰ Xequiquir can ri alal, xequiya' can pa ri plo. Junam xukuje' xquiquir ri colop che ri che' c'amal be. Xquiyac ri atz'iak ri c'o chuwäch, xquiwalijisaj chuwäch ri quiakik', xquichap benam che u suq'uil ri ulew ri sanyeb u chi'.

⁴¹ Are c'u ri jucub xopan pa jun tanatic sanyeb ri xquinim wi bic. Ri u jolom ri jucub xch'ape can chupam ri sanyeb, man slabetaj ta chi c'ut. Ri u tza'm ri jucub chrij xpak'inic rumal ri u chuk'ab ri u wäch ri plo.

⁴² Ri qui chomanic ri ajch'ojab chi quecämisax ri ajpache', rech man c'o ta jun cämuxanic, canimaj bic.

⁴³ Are c'u ri qui nimal ri jun sient ajch'ojab xraj xucol ri Pawl, rumal ri' man xuya' ta chque ri ajch'ojab chi je cäquibano. Xtakanic chi ri queta'm quemuxanic chquiq'uiaka' quib pa ri plo, quebopan c'u nabe pa ulew.

⁴⁴ Xtakanic chi ri niq'uiaj chic, quebe jujun chque cho ch'akatak tz'alam, ri jujun chic cho tak ri ch'akatak re ri nim jucub. Je c'u ri' conojel xecolotajic, xebopan cho ri ulew.